Рухс ӕнкъарӕнтимӕ…

0
38

Ӕмӕ та мӕнӕ ӕрхӕццӕ Ахуыргӕнӕджы бон. Уӕд ӕппӕты хуыздӕр арфӕтӕ ӕмӕ лӕвӕрттӕ фӕкӕнӕм, царды нын зондамонӕг чи басгуыхт, нӕ уыцы уарзон ахуыргӕнджытӕн.

Ахуыргӕнӕг у хурӕн цӕдисон. Уый та уымӕн афтӕ у, ӕмӕ нӕ хур куыд бахъарм кӕны, афтӕ нын ахуыргӕнджытӕ дӕр сӕ удты хъармӕй, сӕ арф ӕмӕ бирӕвӕрсыг зонындзинӕдтӕй фӕхъӕздыг кӕнынц нӕ зонд ӕмӕ нӕ зӕрдӕтӕ, цӕмӕй нын царды фӕндагыл ӕнцондӕр цӕуӕн уа, ууыл зӕрдиагӕй бацархайынц.

Фӕсивӕдӕн царды уӕрӕх фӕндӕгтӕ кӕм гом кӕнынц ӕмӕ сын ирон ӕгъдауы, ӕфсармы кӕнонтӕ рӕсугъдӕй кӕм амонынц, уыцы ахуырадон артдзӕстытӕй иу у Дзӕуджыхъӕуы Хетӕгкаты Къостайы номыл 13-ӕм астӕуккаг скъола. Ам алы ахуыргӕнӕг дӕр зоны ӕмӕ йӕ зӕрдӕйӕ арф ӕнкъары, фӕсивӕды раз ыл цы бӕрнон хӕс ӕвӕрд ис, уый. Скъоладзауты ахуырӕн ӕмӕ хъомыладон куыстӕн ам ис ӕппӕт хъӕугӕ фадӕттӕ. Алы кълас дӕр дзы ифтонг у нырыккон ахуырадон ӕмӕ цӕстуынгӕ ӕрмӕджытӕй. Ис дзы, скъоладзаутӕ разӕнгардӕй кӕдӕм цӕуынц, ахӕм уӕлӕмхасӕн ахуырады къордтӕ.

Цалдӕр азы размӕ та дзы байгом бӕстӕзонӕн музей, ӕмӕ нӕ номдзыд поэт Хетӕгкаты Къостайы номыл сӕрмагонд кълас. Уӕдӕ нӕ республикӕйы ахӕм бӕрӕгбон нӕ вӕййы, ӕмӕ дзы скъолайы ахуырдзаутӕ ма архайой. Ныр та ацы скъолайы цӕттӕ кӕнынц йӕ историйыл дзурӕг чиныг. Уый арӕзт цӕуы, ацы ахуырадон артдзӕстӕн йӕ ивъуыд азтыл ӕмӕ ныры дуджы цы рухстауӕн архайд кӕнынц, ууыл дзурӕг ӕрмӕджытӕй.

Кӕстӕртӕн, фыццаджыдӕр, хӕрзхъӕд зонындзинӕдтӕ радтын, ӕгъдау ӕмӕ ӕфсарм сӕм куыд уа, ууыл сӕ ахуыр кӕнынӕн ацы ахуырадон артдзӕсты ис ӕппӕт хъӕугӕ фадӕттӕ.

Ног ахуыры азыл ӕмӕ ахуыргӕнӕджы боныл ам цавӕр зӕрдӕйы уагимӕ ӕмбӕлынц, стӕй ног ахуыры аз куыд райдыдтой, уый тыххӕй нын радзырдта скъолайы директор, РЦИ-Аланийы сгуыхт ахуыргӕнӕг Сӕлбиты-Колыты Иринӕ.

— Ахуыргӕнӕгӕн сӕрмагондӕй бӕрӕгбон кӕй ис, уый тынг хорз хъуыддаг у. Ахӕм адӕймаг нӕй, ӕмӕ йӕ фӕрцы царды уӕрӕх фӕндагмӕ чи нӕ рацыд. Рухстауыны хъуыддаг ӕнцон нӕу, ӕмӕ йӕ чи равзӕрста, уыцы адӕймагыл та уӕлдай бӕрнон хӕс ӕвӕрд ис. Ног ахуыргӕнӕг нӕм кусынмӕ скъоламӕ куы ӕрбацӕуы, уӕд ӕй ӕз, фыццаджыдӕр, бафӕрсын, сывӕллӕтты уарзы, ӕви нӕ, уымӕй.

Ног ахуыры аз райдыдта. Ӕмӕ кӕд коронавирусы аххосӕй тӕссаг уавӕр сӕвзӕрд ӕппӕт дунейы дӕр, уӕддӕр скъоладзаутыл сӕмбӕлдыстӕм ӕхсызгонӕй. Се ‘ппӕт дӕр, скъоламӕ куы ӕрбахызтысты, уӕд тынг цин кодтой сӕ уарзон зондамонджытыл ӕмӕ ӕмбӕлттыл. Ӕмӕ куыд нӕ, ӕхсӕз мӕйы не скъоладзаутӕ скъолайы нӕ уыдысты.

Кӕд дӕрддзӕгмӕ ахуыр кодтой, уӕддӕр сын ахуыргӕнджытӕ арф ӕмӕ бирӕвӕрсыг зонындзинӕдтӕ лӕвӕрдтой, уӕддӕр скъолайы ахуыры уаг ӕмӕ хъомылад ӕвӕрццӕгдӕрӕй зыны сӕ зондахастыл.

Ӕз не скъолайы ахуыргӕнджытӕй бадомдтон, цӕмӕй ногӕй ӕркӕсой сӕ ахуырадон ӕмӕ хъомыладон пълантӕм, сӕ гӕнӕнтӕм, ӕмӕ ныртӕккӕ ахуыры уаг куыд домы, уымӕ гӕсгӕ сӕ ногӕй рацаразой. Зӕгъӕм, ног ахуырадон ӕрмӕг скъоладзаутимӕ фӕлхатт кӕнынӕн сын раздӕр цы сахӕттӕ лӕвӕрд уыд, уыдон фӕцыбырдӕр кодтой. Сӕхӕдӕг равзӕрстой, ахсджиагдӕр сӕм цы темӕтӕ кӕсынц, уыдон. Ӕмӕ сӕ ахуырадон уаг аразынц уымӕ гӕсгӕ.

Ныр та мӕ Ахуыргӕнӕджы боны фӕдыл зӕрдиаг арфӕ ракӕнын фӕнды ӕппӕт Ирыстоны ахуыргӕнджытӕн. Мӕ зӕрдӕ сын зӕгъы, царды ӕмӕ сӕ арфӕйаг рухстауӕн куысты ӕнтыстджын куыд уой. Уымӕй уӕлдай ма мӕ фӕнды, цӕмӕй уарзӕм нӕ райгуырӕн Ирыстон ӕмӕ не Стыр Уӕрӕсе, нӕ мадӕлон ӕвзаг ӕмӕ не ‘гъдӕуттӕ. Афтӕ куы уа, уӕд нӕ ницавӕр тых басӕтдзӕн. Афтӕмӕй не ‘ппӕты дӕр бӕрӕгбоны хорзӕх уӕд!

Гасанты Валери

ОСТАВЬТЕ ОТВЕТ

Please enter your comment!
Please enter your name here