Ахуыргӕнӕг, куыд кадджын у дӕ ном!

0
35

Зӕххы цъарыл ахсджиагдӕр, фӕрнӕйдзагдӕр ӕмӕ вазыгджындӕр цыдӕриддӕр дӕсныйӕдтӕ ис, уыдонӕй иу у ахуыргӕнӕджы дӕсныйад. Нӕ кӕстӕртӕн зонд амонын, хъомыл кӕнын ӕмӕ сӕ ахуыр кӕнын — ацы нысанӕн йӕ цард чи снывонд кодта, уыдон знон сбӕрӕг кодтой сӕ профессионалон бӕрӕгбон.

Уый фӕдыл Цӕгат Ирыстоны ахуыргӕнджытӕн кадджын уавӕры арфӕ ракодта ӕмӕ къабазы хуыздӕр минӕвӕрттӕн хӕрзиуджытӕ радта нӕ республикӕйы Сӕргълӕууӕг Битарты Вячеслав.

— Сымах уӕ цард снывонд кодтат нӕ кӕстӕртӕн, ӕмӕ нӕм уӕ фӕрцы абон ис царды ӕппӕт къабӕзты дӕр дӕсны кусджытӕ ӕмӕ специалисттӕ. Алчидӕр нӕ ацыд скъолайы къӕсӕрыл. Алкӕмӕн дӕр йӕ царды стыр къабаз баст уыд скъолаимӕ, ахуыргӕнджытимӕ. Уӕ зӕрдиаг куыстӕй, уӕ курдиатӕй, уӕ куырыхондзинадӕй ӕмӕ фӕразондзинадӕй аразгӕ у нӕ фидӕн, нӕ кӕстӕрты хъысмӕт, ӕмӕ уын мӕ зӕрдӕ зӕгъы, цӕмӕй уӕ фӕрнӕйдзаг куыстӕй макуы бафӕллайат. Уӕлдай арфӕ кӕнын ветерантӕн. Амондджын бӕрӕгбӕттӕ уыл цӕуӕд. Уӕ ахуырдзаутӕ уӕ куыд никуы рох кӕной, ӕмӕ сӕ алкӕддӕр арфӕйаг куыд уат, уыцы амонд уӕ уӕд, — загъта республикӕйы Сӕргълӕууӕг.

Уый фӕстӕ Битарты Вячеслав радта республикӕйы хӕрзиуджытӕ уӕлдӕр ӕмӕ астӕуккаг ахуырады къабазы хуыздӕр кусджытӕн.

Бирӕ азты дӕргъы ахуырады къабазы бакусыны тыххӕй, дӕсныдзинад ӕмӕ педагогон архайды стыр сгуыхтдзинӕдты тыххӕй «Ирыстоны намысӕн»-ы майданӕй хорзӕхджын ӕрцыдысты Басаты Олег — Цӕгат Ирыстоны Хетӕгкаты Къостайы номыл паддзахадон университеты нывкӕнынады кафедрӕйы сӕргълӕууӕг, Бегиты Тамарӕ — Кучиты Юрийы номыл Дзӕуджыхъӕуы 27-ӕм астӕуккаг скъолайы математикӕйы ахуыргӕнӕг ӕмӕ Ортабайты Алыксандр — Сывӕллӕтты республикон спортивон скъолайы директор.

Республикӕ Цӕгат Ирыстон-Аланийы сгуыхт ахуыргӕнӕджы кадджын ном лӕвӕрд ӕрцыд Абайты Зӕринӕйӕн — Мӕздӕджы районы поселок Советоны астӕуккаг скъолайы ирон ӕвзаг ӕмӕ литературӕйы ахуыргӕнӕгӕн, Ольгӕ Абрамовайӕн — прогимназ «Эрудит»-ы райдайӕн кълӕсты ахуыргӕнӕгӕн, Дзебысаты Галинӕйӕн — Елхоты бирӕкъабазджын колледжы математикӕйы ахуыргӕнӕгӕн, Золойты Ларисӕйӕн — Ӕрӕфы районы поселок Советоны астӕуукаг скъолайы математикӕйы ахуыргӕнӕгӕн, Аннӕ Мамутовайӕн — ахуырадон центр «Интеллект»-ы райдайӕн кълӕсты ахуыргӕнӕгӕн, Тамарӕ Пономаревайӕн — Дзӕуджыхъӕуы 43-ӕм астӕуккаг скъолайы райдайӕн кълӕсты ахуыргӕнӕгӕн.

Республикӕ Цӕгат Ирыстон-Аланийы ахуырады сгуыхт кусӕджы кадджын ном лӕвӕрд ӕрцыд Ӕлдаттаты Заремӕйӕн — Алагиры 2-ӕм астӕуккаг скъолайы физикӕйы ахуыргӕнӕгӕн, Ӕхполӕтты Викторияйӕн — Цӕгат Ирыстоны паддзахадон педагогон институты иумӕйаг гуманитарон ӕмӕ социалон-экономикон кафедрӕйы сӕргълӕууӕгӕн, Бесолты Майӕйӕн — педагогон куысты ветеранӕн, Уалыты Нателлӕйӕн — ахуырадон центр «Интеллект»-ы директоры хӕдивӕгӕн, Гӕбӕлаты Этерийӕн — Уӕрӕсейы Хъӕбатыр А. Днепровскийы номыл Дзӕуджыхъӕуы 29-ӕм астӕуккаг скъолайы структрурон дӕлхайады разамонӕгӕн, Неля Гаспарьянцӕн — Мӕздӕджы районы бынӕттон хиуынаффӕйады администрацийы ахуырады управленийы разамонӕгӕн, Зохъоты Ханысятӕн — Дзӕуджыхъӕуы 95-ӕм рӕвдауӕндоны Сывӕллӕтты рӕзты центры хъомылгӕнӕгӕн, Светланӕ Ивановайӕн — Курдиатджын сывӕллӕттимӕ куысты регионалон центры директорӕн, Хъалӕгаты Светланӕйӕн — Цӕгат-Кавказы арӕзтадон техникумы ӕхсӕнадзонынады ахуыргӕнӕгӕн, Кӕсӕбиты Беллӕйӕн — Дзӕуджыхъӕуы физикон-математикон республикон лицейы ахуыргӕнӕгӕн, Кудзаты Азӕйӕн — педагогон куысты ветеранӕн, Мзокты Фатимӕйӕн — ахуырады къабазы кусджыты дӕсныйад бӕрзонддӕр кӕныны Цӕгат Ирыстоны информацион-педагогон центры разамонӕгӕн, Валентинӕ Молодыхӕн — Мӕздӕджы 2-ӕм астӕуккаг скъолайы директорӕн, Тебиаты Делярӕйӕн — Цӕгат Ирыстоны Хетӕгкаты Къостайы номыл паддзахадон университеты физикон ӕмӕ социалон-экономикон географийы кафедрӕйы сӕргълӕууӕгӕн ӕмӕ Фардзинты Аллӕйӕн — педагогон куысты ветеранӕн.

Дзӕуджыхъӕуы ӕмӕ республикӕйы районты ахуыргӕнӕндӕтты хуыздӕр ӕмӕ аккагдӕр педагогтӕ ӕмӕ хъомылгӕнджыты стыр къорд хорзӕхджын ӕрцыдысты Республикӕ Цӕгат Ирыстон-Аланийы Кады грамотӕйӕ.

ДЕДЕГКАТЫ Зӕлинӕ

ОСТАВЬТЕ ОТВЕТ

Please enter your comment!
Please enter your name here