Реком ӕнусы размӕ…

0
36

Цъӕйы комы ис нӕ адӕмы удварны тӕккӕ стырдӕр цыртдзӕвӕнтӕй иу — Рекомы кувӕндон. Незамантӕй фӕстӕмӕ ирон адӕм ардӕм цӕуынц Стыр Хуыцаумӕ, уӕларвон зӕдтӕм бакувыны тыххӕй. Фӕкурынц фарн, амонд ӕмӕ дунейы сабырдзинад.

Ацы хорздзинӕдтӕ къухы цӕмӕй бафтой, уымӕн та суанг хӕххон ӕрдз дӕр ӕххуыс фӕкӕны. Рекомӕй цалдӕр къахдзӕфы ӕддӕдӕр Цъӕйы ихджын доны уынӕр фӕхъуысы арф комӕй. Нӕзы ӕмӕ заз бӕлӕсты хӕрздӕфӕй байдзаг вӕййы уӕлдӕф. Алыварс айнӕг къӕдзӕхты сӕрты та Адайы хох фӕцыд арвмӕ ӕмӕ дӕрдтыл фӕлгӕсы. Иу ныхасӕй, ӕрдзы нывтӕм ахӕм тых вӕййы, ӕмӕ адӕймаджы бафӕнды сыгъдӕгзӕрдӕ уӕвын, йӕ сӕры кӕд галиу хъуыдытӕ уыдис, уӕд та сӕ хӕххон дымгӕ фӕхӕссы кӕдӕмдӕр.

Рекомы кувӕндон кӕд фӕзынд, уый бӕрӕг нӕу, фӕлӕ йӕ кар мингай азтӕй баргӕ кӕй у, ууыл ныхас дӕр нӕй. Ацы хъуыддагыл дзурӕг сты, кувӕндоны кӕй ссардӕуыд, канд уыцы дзаумӕттӕ нӕ, фӕлӕ ма ирон эпосы ӕрмӕг дӕр. Нарты кадджыты куыд дзырдӕуы, афтӕмӕй Реком, Мыкалгабыртӕ ӕмӕ Таранджелосӕн ис уӕларвон равзӕрд.

Цӕвиттон, кувӕндӕттӕ арӕзт ӕрцыдысты, Хуыцау, Батрадзы мардыл хъыггӕнгӕйӕ, ӕртӕ цӕссыджы зӕххыл кӕцы рӕтты ӕрӕппӕрста, уым. Иннӕ таурӕгъы та ныхас цӕуы, зӕгъгӕ, ныртӕккӕ цъити кӕм ис, ууылты кӕддӕр уӕрӕх фӕндаг уыд Цъӕйы ком ӕмӕ Фӕскавказы ӕхсӕн. Аланты бӕстӕйӕ алыхуызон уӕзӕгтӕ ластой Гуырдзыстонмӕ, стӕй скъӕрдтой фысвосы дзугтӕ.

Дарддӕр таурӕгъы куыд ныхас цӕуы, афтӕмӕй хуссайраг фӕхстӕй фӕндагыл ласт цыдысты, чи не ‘мбийы, ахӕм хъӕдтӕ. Сыгъдӕг Уастырджийы амындмӕ гӕсгӕ, галтӕ цы хъӕдӕрмӕг ластой уӕрдӕтты, уый ӕвдӕлонгонд цыдис ӕнӕ адӕймаджы ӕххуысӕй. Ӕмӕ фӕстӕдӕр ам хъӕдӕй конд агъуыст сырӕзт.

Таурӕгъы ӕцӕгдзинадыл мах нӕ дзурдзыстӕм, фӕлӕ XIX ӕнусы дыккаг ӕмбисы Ирыстонмӕ цы бӕлццӕттӕ ӕмӕ ахуыргонд адӕмтӕ цыдысты (В.Толстов, В. Пфаф, П. Уварова, В. Миллер, Г. Вертепов), уыдон нын Рекомы тыххӕй ныууагътой бӕлвырд хабӕрттӕ.

Куыд фыссынц, афтӕмӕй кувӕндон уыдис ставд хъӕдтӕй арӕзт ныллӕггомау агъуыст, йӕ сӕр — фастаг фӕйнӕджытӕй ӕхгӕд ӕмӕ ӕнцад зырнӕйзылд цӕджындзтыл. Бацӕуӕн хъӕдын дуары цъар — ӕфсӕйнагӕй, скӕсӕн ӕмӕ ныгуылӕны ‘рдыгӕй та кувӕндонӕн уыдис фӕйнӕ фӕрссаджы. Кӕрт ӕхгӕд — алырдыгӕй, фӕзы дурӕй амад цардахъытӕ (кувӕг адӕмӕн уыдысты къӕбицтӕ кӕнӕ-иу дзы сӕхи бааууон кодтой къӕвда рӕстӕджы). Кӕртӕй дарддӕр кувӕндонмӕ бацӕуын не ‘мбӕлд. Ӕрмӕстдӕр дзуары лӕгтӕ ӕртӕ чъири ӕмӕ ӕртӕ ӕртӕдзыхоны скувыны фӕстӕ цыдысты мидӕмӕ — мысайнӕгтӕ ӕвӕрынмӕ. Мысайнӕгтӕн та кувӕг адӕм хастой дзӕбидыры ӕмӕ саджы сӕртӕ ӕд сыкъатӕ, дурӕй конд хъуццытӕ, фыстӕ, бабызтӕ, хъазтӕ, ӕгънӕджытӕ, хъусцӕджытӕ, мырмырӕгтӕ, дурынтӕ ӕмӕ ӕндӕртӕ.

Ахуыргонд Пфаф Цъӕйы комы уыдис 1869 азы ӕмӕ фыста, зӕгъгӕ, раздӕр аргъуан уыдис кувӕндоны агъуысты. Ӕцӕгдӕр, ӕртӕ дзӕнгӕрӕджы ауыгъд уыдысты бахизӕн дуары сӕрмӕ, мидӕгӕй та — Мады-Майрӕмы, Ирвӕзынгӕнӕг ӕмӕ Сыгъдӕг Уастырджийы уазнывтӕ. 1903 азы Терчы облӕсты хицауы бардзырдӕй сӕрмагонд къамис Рекомы кувӕндоны ссардта чырыстон дин кӕныны алыхуызон дзаумӕттӕ: ӕвзистӕй конд дзуӕртты фӕлгонцтӕ, будсудзӕнтӕ, заробайы къустӕ, цырагъдарӕнтӕ, сойын цырӕгътӕ ӕмӕ бирӕ ӕндӕр дзаумӕттӕ.

Уымӕй уӕлдай дзуӕртты стыр уазнывтӕй фидыдтой бахизӕн ӕмӕ мидӕггаг дуӕрттӕ. Ӕвӕццӕгӕн, аргъуаны кусджытӕ уыдысты гуырдзиаг сауджынтӕ. Ацы хъуыддагӕн ирд ӕвдисӕн сты, Рекомы кувӕндоны кӕй ссардӕуыд, ахӕм дзаумӕттӕ: дзӕнгӕрӕг гуырдзиаг фыстытимӕ, сӕннуазӕнтӕ ӕмӕ ӕндӕртӕ дӕр. Чырыстон дин 1100 азы размӕ мах райстам Византийӕ.

Раст куы зӕгъӕм, уӕд бирӕ рагон хабӕрттӕ ис Рекомы тыххӕй. Абон махӕн зындгонд чи у, иу ахӕм таурӕгъы дзырдӕуы, зӕгъгӕ, кувӕндоны бынмӕ ис дӕлзӕххон бацӕуӕнтӕ ӕмӕ ӕмбӕхсӕнтӕ. Къаддӕр дзы нӕ уыдис ӕвидигӕ хъӕздыгдзинӕдтӕ ӕвӕрд, фӕлӕ сӕ хъысмӕт абон дӕр ма сусӕгдзинады фӕлмы ӕмбӕрзы.

Ныронг бӕлвырд нӕу, нӕ адӕмы удварны хӕзнатӕ цы фесты, уый. Ӕнусы размӕ дӕр ма Рекомы ӕвӕрд уыдысты Ос-Бӕгъатыры ӕфсӕн худ, хӕдон, арц ӕмӕ сагъадахъ. Уӕдӕ ӕндон рӕхысы хъысмӕт дӕр бӕрӕг нӕу. Таурӕгъ куыд дзуры, афтӕмӕй ӕрхауд уӕларвӕй ӕмӕ йӕ ссардтой Хохы Дӕргъӕвсы, раздӕр арв зӕхх кӕм ныццавта, уым ӕмӕ йӕ зынгӕй хосы мӕкъуыл басыгъд. Ӕндон рӕхысмӕ та ахӕм тых уыд, ӕмӕ-иу уарын куы бахъуыд, уӕд-иу ӕй дзуары лӕгтӕ Цъӕйы донмӕ ауагътой, ӕмӕ-иу фӕстӕдӕр Хуыцау сӕххӕст кодта йӕ кувӕг адӕмы фӕндон.

Фыдӕлтӕй фӕстӕмӕ цы ӕгъдау баззад, уымӕ гӕсгӕ кувӕндонӕй иу дзаума хӕссӕн дӕр нӕ уыд. Коммӕ чи нӕ каст, уыдонмӕ дзуары фыдӕх ӕнхъӕлмӕ каст алы хатт дӕр. Зӕгъӕм, Нузалы цӕрджытӕ Ос-Бӕгъатыры худ куы рахастой сӕ аргъуанмӕ, уӕд, дам, сыл рын сыстад. Ӕрмӕстдӕр банцад кувӕндоны дзаума йӕ бынаты нывӕрыны фӕстӕ. Иннӕ хабар та баст у уырыссаг инӕларимӕ. XIX ӕнусы дардмӕ уынӕн хӕтӕл ахаста Рекомы кувӕндонӕй ӕмӕ фӕстӕдӕр йӕ бинонтӕй цалдӕр амард ӕбӕрӕг низӕй.

Ӕцӕгдӕр, нӕ фыдӕлты уырныдта Рекомы уӕларвон тых. Арӕх-иу дыууӕ уарзон ӕмгары ам кӕрӕдзийӕн ӕфсымӕртӕ загътой. Ӕгъдау куыд уыдис, афтӕмӕй-иу алчидӕр фат систа йӕ сагъадахъӕй. Иумӕ сӕ ӕрӕвӕрыны фӕстӕ-иу дыууӕ фатӕй иу ӕмбисыл фӕсастой ӕмӕ-иу ӕй ныууагътой кувӕндоны. Кӕнгӕ ӕфсымӕрты хӕс уыди кӕрӕдзи хъахъхъӕнын цӕрӕнбонты. Дыууӕ хӕстонӕй иуы мӕлӕты рӕстӕджы та йӕ хъуамӕ рахастаид тохы быдырӕй ӕмӕ йӕ сӕмбӕлын кодтаид йӕ сыджыты хайыл.

Ацы ӕгъдау рагон кӕй у, ӕмӕ йӕ Ирыстоны арӕх кӕй кодтой, уыдӕттыл дзурӕг сты, кувӕндоны цы мингай фаттӕ разынд, уыдон. Раздӕр Реком хуыдтой Цӕразонты дзуар, фӕлӕ фӕстагмӕ ссис ӕппӕтадӕмон кувӕндон. Алы сӕрд дӕр-иу Кӕрдӕгхӕссӕн бон бирӕ адӕм ӕрцыдис ардӕм Ирыстоны алы рӕттӕй. Фӕсивӕд ерыс кодтой бӕхыл бадынӕй, хъӕбысхӕстӕй, топпӕй ӕхсынӕй, кафын ӕмӕ зарынӕй. Уӕдӕ зӕдтӕ ӕмӕ дауджытӕм бакувыны тыххӕй сау бӕгӕны фыхтой ӕрхуы цӕджджинӕгты, Рекомӕн нывонд галтӕ ӕмӕ фыстӕн та нымӕц дӕр нӕ уыд. Дзуары номыл ӕртӕ чъири ӕмӕ ӕртӕ ӕртӕдзыхоны скувыны фӕстӕ-иу куывд райдыдта ӕмӕ-иу бӕрӕгбон ахаста ӕнӕхъӕн къуыри. Архайдтой дзы ӕрмӕстдӕр нӕлгоймӕгтӕ, сылгоймӕгтӕ ӕмгӕрон дӕр нӕ цыдысты кувӕндоны бынмӕ.

Цӕгат Ирыстоны паддзахадон архивы цы ӕрмӕджытӕ баззад, уыдон куыд дзурынц, афтӕмӕй бынӕттон цӕрджытӕ паддзахы администрациимӕ архайдтой, историон цыртдзӕвӕн раздӕры хуызӕн цӕмӕй баззайа, ууыл. Хъобаны культурӕ байгом кӕныны фӕстӕ бирӕ адӕм ныххӕррӕтт кодтой Ирыстонмӕ. Чидӕртӕ дзы лӕварӕмхасӕнтӕй адӕмӕй ӕлхӕдтой рагон дзаумӕттӕ. Уӕлдай тынгдӕр та «цуан» кодтой Рекомы хӕзнатыл. XIX ӕнусы 90-ӕм азты Нузалы зылды хицау Мзокты Никъалайы къухы бафтыд, туристтӕ Рекомӕй кӕй рахастой, ахӕм предметтӕ: фаты ӕрттигътӕ, бронзӕ ӕмӕ ӕрхуы дзӕнгӕрджытӕ, мырмырӕгтӕ, дзуӕртты уазнывтӕ, ӕлыгӕй конд адӕймаджы сӕры къуыдыр хъусцӕгимӕ ӕмӕ бирӕ ӕндӕртӕ сӕ бынаты нывӕрын.

Кувӕндӕттӕ чи къахта, уыдонӕй нӕ удварны хӕзнатӕ бахъахъхъӕныны тыххӕй 1895 азы Терчы облӕсты хицау, инӕлар Каханов бардзырд радта Рекомы хъалагъур ӕрӕвӕрыны тыххӕй. Уӕды рӕстӕджы зындгонд иртасӕг Г.Вертепов дӕр йӕ фарс рахӕцыд. Уый та фӕндон бахаста Рекомы хӕзнатӕ хуыздӕр бахъахъхъӕныны тыххӕй уыдон ног сарӕзт Терчы облӕстон музейы ӕрӕвӕрын. Фӕлӕ Нузалы, Зӕрӕмӕджы, Мызуры, Уӕлладжыры комы иннӕ хъӕуты цӕрджыты нӕ бафӕндыд фыдӕлты хӕзнатӕ радтын. Ӕрмӕстдӕр 1903 азы кувӕндоны дуарӕхгӕдӕй ӕвӕрд ӕрцыдысты хицӕн скъаппы, ӕмӕ-иу куы бахъуыдысты, уӕд-иу сӕ дзуары лӕгтӕ систой. Ӕмӕ афтӕмӕй фыдӕлты фарн нӕ фесӕфт.

Фӕстӕдӕр, бӕлвырддӕр зӕгъгӕйӕ та, революцийы фыццаг азты нӕ удварны хӕзнатӕ хъахъхъӕныны куыст дзӕвгар фӕлӕмӕгъдӕр. Уый нӕ, фӕлӕ ма ног хицауады оргӕнтӕ зилын райдыдтой дингӕнджыты фӕстӕ. Уыцы азты Ос-Бӕгъатыры хӕцӕнгӕрзтӕ, аргъуаны дзӕнгӕрджытӕ, уӕларвон рӕхыс ӕмӕ ӕндӕр алӕмӕты хӕзнатӕ фесӕфтысты Рекомӕй. Фӕстӕдӕр кувӕндоныл зынг кӕй сирвӕзт ӕмӕ сау ӕвзалы кӕй бацис, уый та Ирыстоны алы цӕрӕгӕн дӕр зындгонд у.

Къорд азы размӕ хъӕппӕрисджын адӕмы ӕххуысӕй кувӕндон ногӕй арӕзт ӕрцыд ӕмӕ ныр у раздӕрӕй нывӕфтыддӕр, раздӕры рӕдыдтытӕ та ӕруадзӕн нӕй. Фидарӕй нӕ уырны, нӕ республикӕйы разамынд фылдӕр ӕргом кӕй аздахдзӕн нӕ историон цыртдзӕвӕнтӕ хъахъхъӕнынмӕ, уӕлдайдӕр, Аланыстоныл саргъуыды 1100 азы бӕрӕгбонмӕ цӕттӕ кӕнгӕйӕ.

Тохсырты Къоста

ОСТАВЬТЕ ОТВЕТ

Please enter your comment!
Please enter your name here