«Аланийы дыргъдӕттӕ»

0
55

Нӕ республикӕйы зӕхкусджытӕ се ‘ргом аздӕхтой дыргъты куыстмӕ. Зӕрдиагӕй чи кусы, уыдонимӕ ис куыстуат «Аланийы дыргъдӕттӕ» дӕр. Елхоты зӕххытыл арӕзт ӕрцыд 2014 азы.

Ныртӕккӕ хӕдзарады иумӕйаг фӕзуат у 335 гектары, уыдонӕй 180 гектары ныридӕгӕн дыргъ дӕттынц. Куыстуаты разамынды арӕхстджын архайдӕй ӕххӕст сты ӕппӕт хъӕугӕ техникӕйӕ ӕмӕ ифтонггӕрзтӕй, цӕмӕй бӕлӕстӕм афойнадыл ӕмӕ ӕмбӕлгӕ хуызы зилой, уымӕн. Быдыртӕм цӕуы хорз фӕндӕгтӕ.

Куыстуаты генералон директор Ӕрчъегкаты Батырбег куыд зӕгъы, афтӕмӕй сӕ сӕйраг культурӕ у фӕткъуы. 294,5 гектарыл зайынц «Айдаред», «Пинова», «Либерти», «Гала» ӕмӕ ӕндӕр хуызтӕ. Уымӕй уӕлдай дзы зайы чылауи, кӕрдо, бал, алтъами ӕмӕ нектарин.

Ацы фӕззыгон бонты дыргъдоны куыст ӕхсиды, адӕм ӕмбырд кӕнынц фӕткъуыйы тыллӕг.

— Райсомы аст сахатыл вӕййӕм нӕ куысты уӕлхъус. Алы фӕткъуы дӕр арӕхстгай тонӕм ӕмӕ ӕвӕрӕм, цӕмӕй хъыгдард ма баййафа ӕмӕ ӕлхӕнӕгмӕ рӕсугъдӕй бахӕццӕ уа. Разы стӕм нӕ мыздӕй дӕр, зӕрдӕрухсӕй кусӕм, зонӕм ӕй, нӕ фӕллой арфӕйаг кӕй у, уый, — зӕгъы фӕткъуытӕ ӕмбырдгӕнджыты бригадир Козаты Эльзӕ.

Йӕ бӕрны цы 19 адӕймаджы ис, уыдон ӕвзарынц цӕттӕ тыллӕг, рувынц бӕлӕсты алыварс. Сырх, бурфарс ӕмӕ цъӕх фӕткъуытӕ быдырӕй ӕфснайӕн уазалгӕнӕнмӕ йӕ тракторыл аласы Гайты Феликс. Фӕллойы ветеран хӕрз ӕрыгонӕй кусын райдыдта Ираны хъӕуы колхоз «Рӕстдзинад»-ы механизаторӕй. Бонмӕ 7-8 хатты йӕ тракторы гуыффӕйы аласы дыууӕ тоннӕйы бӕрц фӕткъуы.

Куыстуаты иудадзыг фӕллой кӕнынц 26 адӕймаджы, тыллӕг ӕфснайыны рӕстӕг та ма сыл бафты 100 адӕймаджы бӕрц.

— Ныридӕгӕн уал бафснайдтам 40 гектары, ӕрӕмбырд кодтам 980 тоннӕйы. Ныфс нӕ ис, ӕдӕппӕтӕй 6 мин тоннӕйы кӕй сӕмбырд кӕндзыстӕм, уымӕй, — зӕгъы Батырбег. Йӕ ныхасмӕ гӕсгӕ, ацы аз ӕрдзон уавӕртӕ уыдысты зӕхкусӕджы ныхмӕ, хус рӕстӕг бирӕ ахаста, тыхджын хур ӕмӕ дымгӕтӕ дӕр бӕлӕстӕн зиан ӕрхастой. Ӕрдзы хорзӕх куы уыдаид елхотаг дыргъгуыстгӕнджыты, уӕд 10 мин тоннӕйӕ къаддӕр нӕ уыдаид сӕ фӕткъуыйы тыллӕг.

— Нӕ фӕткъуытӕ уӕйгонд цӕуынц, фыццаджыдӕр, Ирыстоны цӕрджытӕн, агурынц сӕ ӕндӕр регионты, суанг Сыбыры дӕр. Фидарӕй мӕ бон зӕгъын у: нӕ продукци экологон ӕгъдауӕй у сыгъдӕг, хӕрзад ӕмӕ хӕрзхъӕд. Афӕдзы дӕргъы, куыд ӕмбӕлы, афтӕ зилӕм бӕлӕстӕм, сӕ алыварс сын кӕрдӕм, низты ӕмӕ хилӕгойты ныхмӕ сӕ пырх кӕнӕм хостӕй. Уыдон адӕймаджы ӕнӕниздзинад ӕппындӕр нӕ хъыгдарынц, — загъта куыстуаты разамонӕг.

Фӕстӕдӕр бӕлӕстӕ зымӕгиуатмӕ цӕттӕ кӕнын райдайдзысты, суӕгъд сӕ кӕндзысты хус къалиутӕй, сӕ бынтӕ сын сфӕлмӕн кӕндзысты, цӕмӕй та уалдзӕджы ног хъарутимӕ дидинӕг ракалой.

«Аланийы дыргъдӕттӕ»-йы коммерцион директор Хъайттаты Батрадз куыд загъта, афтӕмӕй хӕстӕгдӕр рӕстӕг сӕ дыргъдоны фӕзуат фӕпарахатдӕр уыдзӕн. Абоны домӕнтӕн дзуапп чи дӕтты, ахӕм дыргъдонӕн йӕ фӕзуат уыдзӕн 100 гектары, алы таламӕ дӕр дон ӕртахгай кӕлдзӕн, нырыккон технологитӕм гӕсгӕ хъахъхъӕд цӕудзӕн ихуардӕй ӕмӕ хурсыгъдӕй.

— Нӕ куысты нын алывӕрсыг ӕххуыс кӕны республикӕйы Хъӕууон хӕдзарад ӕмӕ хойраджы министрад. Цы хӕрдзтӕ скӕнӕм, уыдоны иу хайӕн райсӕм субсидитӕ. Куыд зонӕм, афтӕмӕй Уӕрӕсе ӕрмӕст 35 проценты бӕрц йӕхи ифтонг кӕны фӕткъуыйӕ, иннӕ хай та у ӕрбаласӕггаг. Фӕткъуы ӕхсызгонӕй агурынц бирӕ рӕтты, ӕмӕ кусдзыстӕм. Ацы бӕлӕстӕй алкӕцы дӕр ныр 15 килограммы бӕрц дӕтты, дыууӕ — ӕртӕ азы фӕстӕ та сыл ноджы фылдӕр ӕрзайдзӕн, — загъта Батрадз.

Цымыдисаг у, талатӕ кӕм рӕзынц, уыцы питомник дӕр. Фаты ӕрдынау раст рӕнхъытӕй сагъд цъӕх бӕлӕсты уындӕй зӕрдӕ рухс кӕны.

«Аланийы дыргъдӕттӕ»-йы разамынд йӕ хӕстӕ куыд ӕххӕст кӕны, цавӕр зындзинӕдтимӕ ӕмбӕлы, стӕй фидӕнмӕ цы нысантӕ ӕвӕры, уый базонынмӕ дыргъдӕттӕ бабӕрӕг кодтой Кировы районы хъӕууон хӕдзарады управленийы хицау Дойаты Руслан, сӕйраг агроном Бедойты Феликс, Хъӕууон хӕдзарад ӕмӕ хойраджы министрады пресс-секретар Тебиаты Ленӕ, дзыллон хабархӕссӕг фӕрӕзты минӕвӕрттӕ ӕмӕ, цы федтой, уымӕй разыйӕ баззадысты.

Гугкаты Жаннӕ

Къамтӕ систа Хъайырты Дианӕ

ОСТАВЬТЕ ОТВЕТ

Please enter your comment!
Please enter your name here