Цӕгат Ирыстоны хъомыс ӕмӕ йӕ дарддӕры рӕзты ног нысантӕ

0
114

Нӕ республикӕйы кусӕг балцы уыд Уӕрӕсейы Федерацийы Хицауады Сӕрдары хӕдивӕг Юрий ТРУТНЕВ.

Цӕгат Ирыстонмӕ ссӕугӕйӕ, Уӕрӕсейы Хицауады вице-премьер, фыццаджыдӕр, бабӕрӕг кодта курортон-рекреацион комплекс «Мамысон»-ы арӕзтад. Уыд Беслӕны фыццӕгӕм скъолайы, дидинджытӕ дзы сӕвӕрдта ӕмӕ ссардта, спортивон залы чи бабын, уыцы ӕнаххос сабиты ӕмӕ сӕ хистӕрты рухс нӕмттӕ. Уый фӕстӕ федта ӕрхонкӕйы ног цалцӕггонд рынчындон.

Фӕстӕдӕр Юрий Трутнев фембӕлд республикӕйы разамындимӕ, ӕмӕ ӕрныхас кодтой Цӕгат Ирыстоны социалон-экономикон рӕзты нысантыл ӕмӕ гӕнӕнтыл. Юрий Трутнев куыд загъта, афтӕмӕй ахӕм кусӕг балцы бон раздӕр уыд Хъӕрӕсе-Черкесты Республикӕйы.

— Ныр та ӕркӕсын хъӕуы Республикӕ Цӕгат Ирыстон-Аланийы социалон-экономикон уавӕрмӕ, сбӕлвырд кӕнын йӕ дарддӕры рӕзты нысантӕ ӕмӕ, цӕмӕй фӕхъомысджындӕр уа, уымӕн цавӕр гӕнӕнтӕ ис, уыдон.

Раст зӕгъын хъӕуы, республикӕйы социалон-экономикон бӕрӕггӕнӕнтӕ бынтон зӕрдӕмӕдзӕугӕ не сты. Фӕстаг цалдӕр азы дӕргъы бӕрӕг дары, мидбӕстон иумӕйаг продукцийы гуырахст, регионалон иумӕйаг продукци ӕмӕ промышленнон куыстады индекс къаддӕр кӕй кӕнынц, уый. Хъӕууон хӕдзарады продукцийы бӕрц дӕр, Уӕрӕсейы хъӕууонхӕдзарадон продукцийы рӕстӕмбис бӕрцӕй у къаддӕр. Кӕй зӕгъын ӕй хъӕуы, куыд иннӕ регионты, афтӕ Цӕгат Ирыстоны экономикӕйыл дӕр ӕвзӕрӕрдӕм фӕзындысты, коронавирус цы къуылымпытӕ расайдта, уыдон. Ацы аз 1 сентябрмӕ республикӕ йӕ цӕрджытӕй дары мызд 31,1 милуан сомы, уыимӕ, бюджетон кусджытӕн мызд фидынӕй хӕс нӕ дары. Розницӕйы базарады зилдух ацы аз, фаронимӕ абаргӕйӕ, фӕкъаддӕр 13,8 проценты, бындурон капиталмӕ инвестицитӕ фӕкъаддӕр сты 10,2 проценты (Уӕрӕсейы — 4 проценты).

Уавӕр цӕмӕй фӕхуыздӕр уа, уый тыххӕй республикӕйы Сӕргълӕууӕгимӕ бакусдзыстӕм ӕмӕ сбӕлвырд кӕндзыстӕм республикӕйы рӕзтӕн ахъазгӕнӕг сӕйраг фӕзилӕнтӕ. Мӕнмӕ гӕсгӕ, уыдонӕй иу у туризм. Цӕгат Ирыстоны арӕзт цӕуы стыр туристон комплекс «Мамысон». Йӕ саразынӕн ис бӕлвырд хӕслӕвӕрдтӕ нӕ бӕстӕйы Президентӕй. Федералон бюджеты йӕ саразынӕн ӕвӕрд ӕрцыд 6,36 миллиард сомы. Йӕ сӕххӕст кӕнынмӕ хъӕуы инвесторты ӕргом ӕрбаздахын. Цӕгат Ирыстонӕн йӕ ӕрдз у диссаг ӕмӕ алӕмӕтаг, доны ӕвӕрӕнтӕ — хъӕздыг. Тынг бирӕ уӕм ис, бахъахъхъӕнинаг чи у, ахӕм ӕрдзон фӕзуӕттӕ, цыппарӕн дзы ис федералон нысаниуӕг. Уыдон республикӕйы экономикӕйӕн, йӕ социалон царды къабазӕн цас пайда сты, уымӕ дӕр хъӕуы ӕркӕсын.

Бабӕрӕг кодтам цалдӕр ногарӕзт социалон объекты. Хицӕн ныхасы аккаг у ӕрдзон хъӕздыгдзинӕдтӕ хъахъхъӕныны, стӕй пайдаджын ӕрзӕттӕ агурыны фарст. Хъӕууон хӕдзарады къабазы республикӕ цы проекттӕ ӕххӕст кӕны, уыдон дӕр хъуамӕ уой фылдӕр. Кӕй зӕгъын ӕй хъӕуы, ӕнӕлыггонд фарстытӕ — бирӕ, афтӕ бирӕ сты, нырма нӕм разӕй цы куыстытӕ ӕнхъӕлмӕ кӕсынц, уыдон дӕр.

Экономикӕйы рӕзтыл ныхас кӕнгӕйӕ, фыццаджыдӕр, хъуыды кӕнын хъӕуы адӕмыл, сӕ царды уавӕртӕ фӕхуыздӕр кӕныныл, уӕлдайдӕр, стыр бӕллӕхы чи бахауд, уыцы адӕмы цардыл. Мӕ ныхас у Беслӕны цӕрджытыл. Нӕ бӕстӕйы разамындӕн ацы фарст у уӕлдай ахсджиагдӕр ӕмӕ йӕм иудадзыгдӕр йе ‘ргом здахы, — загъта Уӕрӕсейы Федерацийы вице-премьер.

Йӕ арфӕйы ныхасы нӕ республикӕйы Сӕргълӕууӕг Битарты Вячеслав куыд загъта, афтӕмӕй федералон нысанмӕ арӕзт программӕтӕ ӕмӕ национ проекттӕ республикӕ кӕй ӕххӕст кӕны, уый фӕрцы регионы социалон-экономикон фарстытӕй бирӕтӕ цӕуынц лыггонд.

— Комкоммӕ де ‘ххуысӕй, Уӕрӕсейы Федерацийы экономикон рӕзты министрады ӕххуысӕй, нӕ бӕстӕйы Президент Владимир Путин курорт «Мамысон» саразыны фӕдыл цы бӕлвырд хӕстӕ радта, уыдон ӕххӕстгонд цӕуынц. Ацы проект куы сцӕттӕ уа, уӕд ӕппӕт бӕстӕйӕн дӕр уыдзӕн канд федералон нӕ, фӕлӕ дунеон нысаниуӕджы ӕвӕджиауы хӕххон-рекреацион комплекс. Уый ӕрмӕст экономикон проект нӕу, фӕлӕ ма у ахсджиаг социалон проект дӕр. Йӕ фӕрцы нӕм дыууӕ азмӕ фӕзындзӕн дыууӕ мин кусӕн бынаты ӕмӕ уымӕй дӕр фылдӕр. Хицӕн инвестортӕ ныридӕгӕн цӕттӕ сты курорты арӕзтадӕн 10 миллиард сомы радтынмӕ. Нырмӕ дӕр ӕххӕст кодтам ӕмӕ дарддӕр дӕр ӕххӕст кӕндзыстӕм республикӕйы социалон-экономикон уавӕр размӕ ракӕнынӕн национ проекттӕ ӕмӕ федералон нысанмӕ арӕзт программӕтӕ.

2017 азы Уӕрӕсейы Федерацийы Хицауад бафыста уынаффӕ. Уым амынд сты, 2018-2025 азты Республикӕ Цӕгат Ирыстон-Аланийы социалон-экономикон рӕзтӕн ахсджиагдӕр чи у, уыцы фыццаградон мадзӕлтты номхыгъд. Зонын ӕй, сӕ сӕххӕст кӕнынӕн Уӕрӕсейы разамынд ӕппӕтвӕрсыгӕй дӕр кӕй архайы, уый, — загъта республикӕйы Сӕргълӕууӕг ӕмӕ бафиппайдта, уыцы мадзӕлттӕ ӕххӕст кӕнынӕн сын федералон центрӕй ӕххуыс нырмӕ дӕр кӕй уыд, ӕмӕ дарддӕр дӕр кӕй уыдзӕн, ууыл йӕ зӕрдӕ кӕй дары.

Юрий Трутнев ӕмӕ Битарты Вячеслав дзуаппытӕ радтой журналистты фарстытӕн. Уӕрӕсейы Хицауады вице-премьер куыд бафиппайдта, афтӕмӕй республикӕйы разамындимӕ ацы фембӕлд фӕстаг нӕу.

— Иу мӕйы фӕстӕ Битарты Вячеслав ацӕудзӕн Мӕскуымӕ, ӕмӕ, абон ныхас цы дарддӕры рӕзты нысантыл цыд, уыдон бабӕстон кӕндзыстӕм, ӕмӕ сӕ ӕххӕст кӕныны куыст райдайдзӕн, — загъта Юрий Трутнев.

Йӕ кусӕг балцы кӕрон Юрий Трутнев бабӕрӕг кодта республикӕйы Национ музей ӕмӕ Адӕмон аивадон ӕрмдӕсныты центр.

ДЕДЕГКАТЫ Зӕлинӕ

ОСТАВЬТЕ ОТВЕТ

Please enter your comment!
Please enter your name here