Зындгонд фыссӕг, журналист, публицист, этнограф Цгъойты Хазбийыл сӕххӕст 80 азы

0
46

 

Фӕрнджын ӕмӕ уӕздан хистӕр

Зӕххӕн йӕ паддзах хур у. Йӕ хъарм тынтӕй цӕуы царды тых, йӕ фӕрцы рӕзы адӕймаг, зайӕгойӕ, цӕрӕгойӕ  се ‘ппӕт дӕр йӕ рухсмӕ куыд фӕивазынц сӕхи, раст афтӕ алы куыстуатӕн дӕр йӕ цырв вӕййынц фӕрнджын, зондджын, уӕздан, зӕрдӕхӕлар хистӕртӕ. Газет «Рӕстдзинад»-ы редакцийы кӕддӕриддӕр фидар уыд фӕлтӕрты ‘хсӕн бастдзинад. Уый фӕрцы та астӕуккаг ӕмӕ кӕстӕр кары журналисттӕн фӕлтӕрдджын, бирӕзонаг уацхӕсджытӕ, хайӕдты сӕргълӕуджытӕ вӕййынц сӕ цӕстуарзон зондамонджытӕ. Ахӕм хистӕр  у газет «Рӕстдзинад»-ы хайады сӕргълӕууӕг Цгъойты Хазби. Уый абон бӕрӕг кӕны йӕ 80 азы юбилей.

Газеты редакцийы кусын куы райдыдта, ууыл та сӕххӕст 50 азы.

Хазби йӕ нуарджын ирон ӕвзагӕй фыст ӕрмӕджытӕй газеткӕсджытӕй цал ӕмӕ цал фӕлтӕры зӕрдӕтӕ барухс кодта. Этнографи, культурӕ, фыдӕлты цардыуагыл йе ‘рмӕджытӕ, йӕ рубрикӕтӕ, тематикон фарс «ӕлутон» газет «Рӕстдзинад»-ы фӕрцы ацал-ауал азы лӕвар кӕны йӕ уарзон ирон адӕмӕн.

Нӕ царды фарстыты фӕдыл ӕм   куы бацӕуай,  уӕд дӕ ӕнӕ дзуаппӕй никуы раздахдзӕн. Не ‘хсӕнадон уацхӕсджытӕй, газеткӕсджытӕй  нӕм исчи куы ӕрбацӕуы, уӕд фылдӕр хатт   бацагурынц Хазбийы. Йӕ кусӕнуаты дуар ын чи  бахойы, уымӕн йӕ размӕ рацӕуы, мидбылхудгӕйӕ йын салам радты, йӕ  стъолы акомкоммӕ йӕ ӕрбадын кӕны ӕмӕ йемӕ  уӕздан ныхас фӕкӕны. Афтӕ никуы вӕййы, ӕмӕ йӕ кусӕнуатӕй уазӕг райгондӕй кӕд нӕ рацӕуы. Уый та дзурӕг у йӕ зӕрдӕйы стыр хорзӕхтыл: зӕрдӕхӕлардзинад, уӕздандзинад, фарн ӕмӕ адӕмы хъӕр ӕмбарын ӕмӕ сӕ цинтӕй, сӕ сагъӕстӕй цӕрыны иууыл ахсджиагдӕр ӕмӕ хъӕугӕдӕр миниуджытыл.

Нӕ фыдӕлты ивгъуыд царды цы хорздзинӕдтӕ уыд, уыдон Хазби  абоны цардмӕ канд йӕ уацты ӕмӕ тематикон фарс «ӕлутон»-ы нӕ хӕссы, фӕлӕ ма сӕ аивӕй ранывӕнды йӕ аивадон-литературон уацмысты дӕр. Новеллӕ, радзырд, этюд — се ‘ппӕты дӕр чиныгкӕсӕг банкъары ивгъуыд ӕмӕ ныры дугимӕ  ӕнгом бастдзинад. Уыцы удварнон бастдзинады фӕрцы та Хазби зӕгъынмӕ хъавы: «ӕз уын мӕ уацмысты ӕвдисын ивгъуыд дугтӕ ӕмӕ азты цаутӕ, цӕмӕй, мӕ уарзон, мӕ зынаргъ ирон адӕм, уӕ фидӕны царды фӕндаг хуыздӕр уынат, ӕмӕ уӕ фидӕн бӕллиццагдӕр ӕмӕ рӕсугъддӕр уа».

Ӕмӕ йын уыцы арфӕйаг хъуыддаг, куыд журналист, куыд прозаик, куыд этнограф, афтӕ иттӕг хорз кӕй ӕнтысы, уый тыххӕй йын зӕрдиаг арфӕ кӕнӕм.

Газет “Рӕстдзинад”-ы кусджытӕ

ОСТАВЬТЕ ОТВЕТ

Please enter your comment!
Please enter your name here