Горӕты боны ног ӕууӕлтӕ

0
18

 

Цӕгат Ирыстоны цӕрджыты уарзондӕр бӕрӕгбӕттӕй иу у Дзӕуджыхъӕуы бон. ӕрвылаз уыцы бӕрӕгбоны кадӕн арӕзт мадзӕлттӕ ӕхсызгонӕй бабӕрӕг кӕнынц не ‘мзӕххонтӕ ӕмӕ республикӕйы уазджытӕ. Фӕлӕ иннӕ азтӕй хъауджыдӕр ацы хатт дзӕуджыхъӕуккӕгты райдзаст бӕрӕгбонмӕ сӕвзӕргӕ эпидемиологон уавӕр зынгӕ ивддзинӕдтӕ бахаста.

Коронавирусы пандеми нырма йӕ тыхы кӕй ис, уыцы ӕууӕл хынцгӕйӕ, стӕй, «Роспотребнадзор» ӕмӕ Цӕгат Ирыстоны ӕнӕниздзинад хъахъхъӕнынады министрады амынддзинӕдтӕ зӕрдыл даргӕйӕ, организацион комитеты уынаффӕйӕ Горӕты боны кадӕн мадзӕлттӕ арӕзт ӕрцыдысты иу бынаты — Хъесайы-фырты уынджы фӕлладуадзӕн бынаты.

Фӕлӕ кӕд бӕрӕгбоны мадзӕлтты географи ӕмӕ нымӕц, амӕй размӕ азтимӕ абаргӕйӕ, къаддӕр уыдысты, уӕддӕр бӕрӕгбон зӕрдӕмӕдзӕугӕ рауад. Уыцы бон фӕлладуадзӕн бынатмӕ чи саккаг кодта, уыцы адӕм аргъгӕнӕг систы ирон чъиритӕ ӕмӕ пловы фестивалты, стӕй футболон турниры архайджыты арӕхстдзинад ӕмӕ дӕсныдзинадӕн. Фӕзы куыстой республикӕйы ӕрмдӕсныты ӕрмадзтӕ ӕмӕ адӕмон промыслӕты куыстуӕтты продукцийы равдыст. Концертон программӕйы та архайдтой кафджытӕ ӕмӕ зарӕггӕнджыты къордтӕ, стӕй хицӕн артисттӕ…

Сӕрмагонд бынат радих кодтой хъӕууонхӕдзарадон товаруадзджытӕн дӕр — уыдон бӕрӕгбонмӕ ӕрбаластой ӕхсыры продукци, дыргътӕ, мыд ӕмӕ ӕндӕр хӕрзад хойраг.

Бӕрӕгбон цӕмӕй ӕмбӕлгӕ уагыл ацӕуа, уымӕ сӕ цӕст дардтой Мидхъуыддӕгты министрады службӕгӕнджытӕ, адӕмы санитарон ӕдасдзинад та уыд Дзӕуджыхъӕуы администраци ӕмӕ «Роспотребнадзор»-ы минӕвӕртты бӕрны.

Бӕрӕгбоны мадзӕлттӕ бабӕрӕг кодта ӕмӕ дзӕуджыхъӕуккӕгтӕн арфӕ ракодта Цӕгат Ирыстоны Сӕргълӕууӕг Битарты Вячеслав. Республикӕйы Сӕргълӕууӕгимӕ бӕрӕгбоны тематикон фӕзтыл ӕрзылдысты Хицауады Сӕрдары хӕдивджытӕ Фадзайты Ӕхсарбег ӕмӕ Иринӕ Азимова, Дзӕуджыхъӕуы муниципалон сконды сӕргълӕууӕг Икъаты Русланбег, горӕты администрацийы разамонӕг Фӕрниаты Тамерлан, Цӕгат Ирыстоны сӕйраг горӕты Ӕхсӕнадон советы сӕрдар Михаил Шаталов ӕмӕ иннӕтӕ.

— Фыццаджыдӕр арфӕ кӕнын, ацы бӕрӕгбонмӕ чи саккаг кодта, уыцы адӕмӕн, стӕй горӕты ӕппӕт цӕрджытӕн дӕр! Кӕй зӕгъын ӕй хъӕуы, фӕндыд нӕ Горӕты бонмӕ бирӕ фылдӕр мадзӕлттӕ бацӕттӕ кӕнын. Фӕлӕ коронавирусы пандеми ахӕм фадат нӕ дӕтты. Фӕлӕ уӕддӕр бӕрӕгбон бынтондӕр нӕ аивтам — скодтам ӕй сӕвзӕргӕ уавӕртӕм гӕсгӕ. ӕмӕ йӕ ныр уынӕм, кӕй фӕрӕстмӕ, уый — адӕм зӕрдӕрухсӕй архайынц бӕрӕгбоны мадзӕлтты. Нӕ зӕрдӕ дарӕм, эпидемиологон уавӕр хуыздӕрӕрдӕм ивын кӕй райдайдзӕн ӕмӕ ногӕй стыр бӕрӕгбӕттӕ аразыны фӕткмӕ кӕй раздӕхдзыстӕм, ууыл, — йӕ арфӕйы ныхасы фӕбӕрӕг кодта Битары-фырт.

Цӕгат Ирыстоны разамонӕг ӕмӕ иннӕ бӕрнон кусджытӕ базонгӕ сты, национ-культурон ӕхсӕнадтӕ ӕмӕ ӕндӕр организацитӕ цы цымыдисаг равдыстытӕ бацӕттӕ кодтой, уыдонимӕ. Фадатӕй спайда кӕнгӕйӕ, Ирыстоны рагӕй ӕмӕ хӕларӕй чи цӕры, уыцы адӕмты минӕвӕрттӕ ногӕй бафиппайдтой, сӕ мадӕлон ӕвзаг ӕмӕ национ культурӕйы хӕзнатӕ бахъахъхъӕнынӕн республикӕйы ӕппӕт фадӕттӕ дӕр арӕзт цӕуы.

Республикӕйы Сӕргълӕууӕг ӕмӕ бӕрӕгбоны архайджытӕн рауад зӕрдӕмӕдзӕугӕ ныхас, куыд бӕрӕгбоны хабӕрттыл, афтӕ адӕмы ӕрвылбоны царды ӕндӕр фарстытыл дӕр.

Сланты Аслан

Къамтӕ систа Хъайырты Дианӕ

ОСТАВЬТЕ ОТВЕТ

Please enter your comment!
Please enter your name here