Къостайы райгуырдыл сӕххӕст 161 азы

0
40

Поэт — фарны лӕг

Хуры рухс алцы йӕхимӕ куыд здахы, афтӕ Къостайы стыр уд йӕхимӕ ӕлвӕста дзыллӕты. Ӕхсӕнады алы фӕлтӕртӕ ӕмбырд кодтой йӕ алыварс, агуырдтой дзы ӕххуыс ӕмӕ уынаффӕ, фӕндыд сӕ йӕ зонын, сӕхи буц кодтой йӕ хӕлар ахастӕй, ӕфсарм сӕм зынди йӕ курдиаты раз. Уыдӕттӕ чысыл не сты, лӕг сӕрыстыр цӕмӕй уа, уымӕн. Фӕлӕ уӕддӕр, Врубелы Демонау, йӕ цӕстыты бадти ӕнусон хъыг…

Стырӕн йӕ уарзт дӕр стыр вӕййы. Уарзт та удӕн фӕлварӕг дур у. Стыр цы у, уый цымыдисаг дӕр у, ӕмӕ тӕссаг дӕр. Къостайы уарзтмӕ бӕллыдысты бирӕ рӕсугъдтӕ. Йӕхицӕй та афтӕ зӕгъы: «Нӕй афтӕ гӕнӕн, ӕмӕ ӕз, йӕ уды гӕзӕмӕдӕр змӕлӕнтӕ кӕмӕн нӕ зонон, уый уарзон.» Зыдта Аннӕтӕ, Раисӕ ӕмӕ Лулуйы зӕрдӕты уаг ӕмӕ сын йӕ уарзт уымӕн хъардта. Фӕлӕ, Тютчевы загъдау, тӕссаг у поэты уарзт, уӕлдайдӕр ӕнӕнцой ӕмӕ хауӕггаг поэты уарзт. Андухъапарӕй ирӕд куы ‘рдомдтой йӕ «фидӕны каистӕ», уӕд Къоста азым хаста Иры чызджытӕм, уыдон, зӕгъы, «ахицӕн сты нӕхионтӕй, фӕлӕ нӕма баййӕфтой иннӕты.» Афтӕ нӕ поэт йӕ мӕстӕй загъта. Бӕгуыдӕр, Иры чызджытӕм нӕма уыд декабристты уарзӕтты зондахаст. Нӕ сӕм уыд, Наташӕ хаст Цомахъимӕ йӕ цард куыд сбаста, уыцы ныфс. Фӕлӕ сӕм фидауцӕй уӕлдай уыд, Къостайӕн адджын цӕмӕй уыдысты, ахӕм миниуджытӕ. Гайттаты Раисӕ ӕмӕ Зӕлийы фыстӕджытӕ сты хӕрзахуыр чызджыты фыст. Уыдоны зыны уӕздандзинад, зонд ӕмӕ хъӕздыг уды рухс. Уыдон ӕвдисынц ирон сылгоймаджы монон рӕзт.

Ӕцӕг курдиат вӕййы бирӕвӕрсыг, ӕнӕнцой ӕмӕ агурӕг. Уый нӕ зоны ӕфсис уарзт ӕмӕ куыстӕй, уымӕ ис тохы монц, уый йӕхи судзы цырагъау ӕмӕ уадзы рухс. Сӕтӕлӕг йӕ хъузджы куыд ныгъуылы, бирӕтӕ афтӕ ныгъуылдӕй цӕрынц сӕ къуымты, фыссынц ӕдас ран ӕмдзӕвгӕтӕ, афтӕмӕй сӕ хъӕуы поэты ном, лӕджы бынат ӕмӕ пехуымпары кад. Ӕнӕхъуаджы!

Къостайы куыст уыд титаны куыст — уӕлмонц, ӕгӕрон ӕмӕ удхайраг. ӕнувыдӕй архайдта, Дзӕуджыхъӕуы, Стъараполы ӕмӕ Пятигорскы цыдӕриддӕр ӕхсӕнадон, культурон ӕмӕ рухсадон хъуыддӕгтӕ цыдис, уыдоны. Уыдис сӕ амидингӕнӕг ӕмӕ сӕ сӕйраг аразӕг. Диссаг — куыд сыл ӕххӕсти! ӕмбисонд — куыд сӕ фӕрӕзта! Йӕхӕдӕг фыссы: «Ӕрбынӕттон дӕн Стъараполы… Зын бауырнӕн у, уым алыхуызон ӕхсӕнадон куыстыл цырынӕй куыд бафтыдтӕн, уый…» Удуӕлдайӕ газеты алы рӕнхъыл дӕр уадзы йӕ зӕрдӕйы рухс, бастайыны онг йӕ хъару хардз кӕны йӕ нывтыл, ӕвӕрӕз ахуырдзауты пайдайӕн ӕвӕры спектаклтӕ, аразы сын декорацитӕ, хъазы хицӕн сӕрӕтты, лекцитӕ кӕсы разагъды лӕгты тыххӕй, сӕ нывтӕ сын саразы, афтӕмӕй. Тох кӕны хицауадимӕ, сӕ фыдмитӕ сын хӕссы хурмӕ, ӕнтысы йын уыдонӕй бирӕты сӕ куыстӕй тӕрын, ӕмӕ ноджы фыссы генион уацмыстӕ. Ӕмӕ судзы алӕмӕты уарзтӕй.

Джыккайты Шамил

ОСТАВЬТЕ ОТВЕТ

Please enter your comment!
Please enter your name here