Нӕ лӕугӕ хох, нӕ цӕугӕ мӕсыг

0
27

Ирон лӕджы куы бафӕрсай, кӕмӕй  у сӕрыстыр нӕ Ирыстон, зӕгъгӕ, уӕд, ӕвӕццӕгӕн, бирӕ нӕ разындзӕни, Хетӕгкаты Леуаны фырт Къостайы ном чи нӕ зӕгъа, ахӕм.

Иры цыт ӕмӕ намыс, Иры лӕугӕ хох ӕмӕ цӕугӕ мӕсыг Къостайы райгуырдыл ӕххӕст кӕны 161 азы. Талынг Нары, фӕздӕгдзыд ӕвгъӕддоны цӕрӕццаг сабийы сӕ къухтӕм цы сылгоймӕгтӕ систой, уыдон цӕмӕй зыдтой, уый, цыкурайы фӕрдыгау, стыр хӕзна кӕй суыдзӕн ӕрмӕст Ирыстонӕн нӕ, фӕлӕ нӕ бӕстӕйы, дунейы культурӕйӕн.

3ӕххы цъарыл кӕд исчи амондджын сахат саргъ сӕвӕрдта поэзийы ӕфсургъыл ӕмӕ йыл цыппӕрвадӕй, ныфсджынӕй атахт, уӕд уыдонӕй у нӕхи Къоста.

Ирыстон цӕмӕй йӕ абоны кадджын  уавӕрмӕ схызтаид, ууыл бирӕ  фӕлтӕртӕ ӕмӕ куырыхон лӕгтӕ фӕкуыстой удуӕлдайӕ. Уыцы адӕймӕгты ӕхсӕн, бонвӕрнонау, ӕрттивы ӕмӕ ӕрттивдзӕни Хетӕджы-фырты ном. Уырыссаг ӕмӕ дунейы литературӕ ӕмӕ аивад, ирон адӕмон сфӕлдыстад чысылӕй фӕстӕмӕ, мады ӕхсырау, ахъардтой йӕ туджы, йӕ зӕрдӕ йын агайдтой, бахсыстой йын йӕ зонд. Уыдон ӕмӕ йӕ ӕрдзӕй рахӕсгӕ курдиат уыдысты йе сфӕлдыстады фидар бындур. Ӕхсӕнадон царды уӕвгӕйӕ, ирон дзыллӕйы рӕсугъд удыхъӕд ӕмӕ хъизӕмӕрттӕ систы йӕ поэзийы рӕбинаг цӕджындзтӕ. Уый нӕ уарзта политикон фӕзындтытӕм иуварсӕй кӕсын. Кӕддӕриддӕр-иу смидӕг рӕстдзинадыл, амондыл, лӕджы кадыл тохӕн йӕ тӕккӕ тъыфылы.

Къоста… Иры цырагъдар. ӕфхӕрд дзыллӕты сӕрхъуызой.Сидзӕрты рӕвдауӕг. Ирон ӕмӕ Кавказы иннӕ адӕмты этнос лӕмбынӕг сгарӕг ӕмӕ арф иртасӕг. Адӕмты хӕлардзинады зарӕггӕнӕг. Поэзийы ӕнӕсысгӕ фурд. Дзырды зӕрингуырд. Не ‘взаджы ӕппӕты рӕсугъддӕр ныхӕстӕ дӕр не сфаг уыдзысты уый сурӕт бӕлвырдӕй, рӕсугъдӕй равдисынӕн. Ахӕм лӕджы аккаг дзырдтӕ ӕнцон ссарӕн не сты.

Къоста сыгъзӕрин ӕндӕхтӕй цы алдымбыдтӕ скодта, уыдон рӕстӕджы уӕзӕй хуыздзыд нӕ фесты. Уый нӕ, фӕлӕ ма бонӕй-бонмӕ тынгдӕр тӕмӕн калдтой ӕмӕ абоны чиныгкӕсӕгмӕ, абоны фӕлтӕрмӕ ӕрхӕццӕ сты тынг аив, тынг фидыцӕй. Йӕ «Ирон фӕндыр»-ы рӕнхъытӕ, сӕууон ӕртӕхтау,  сыгъдӕг, рӕсугъд музыкӕйы зӕлтау, рӕвдауынц адӕймаджы, йӕ зӕрдӕйы йын гуырын кӕнынц цин ӕмӕ маст, уарзт ӕмӕ ӕнӕуынондзинад, сидынц ӕм хӕлардзинад ӕмӕ тохмӕ. Тохмӕ? Фӕрсдзӕн исчи. О, тохмӕ. Кӕд уыйбӕрц рӕстӕджы размӕ фыст уыдысты, уӕддӕр сты нӕ абоны царды чъизи миты ныхмӕ тохы тырысайы аккаг. Амонынц цӕстмӕхъус ныхас ӕмӕ уӕлдӕрӕн козбау кӕныны ныхмӕ тох кӕнын. Ирон ӕвзаг ӕмӕ ирон лӕджы намыс хъахъхъӕныныл тох кӕнын.

Уӕдӕ, уӕдӕ, дзӕгъӕл хуымӕтӕджы нӕ цӕуы Къостайы кадджын ном ирон адӕмы иу фӕлтӕрӕй иннӕмӕ. Уыцы бар бакуыста йӕ тугвӕллойӕ. Уыцы кад бакуыста йӕ зонд ӕмӕ йӕ хъаруйӕ. Нӕ бӕстӕйы бирӕнацион литературӕйы фарны бынат йӕхӕдӕг ссардта йӕхицӕн. Нӕ, уӕд ууыл нӕ хъуыды кодта, ахӕм хӕдӕфсарм адӕймаджы йӕхи уды, йӕхи кады мӕтмӕ нӕ февдӕлы: аргъгӕнӕг ын адӕм вӕййынц.

Хетӕгкаты Къоста куы амард, уӕдӕй нырмӕ бирӕ рӕстӕг рацыд. Фӕлӕ йӕ ном цӕры. Цӕры йӕ поэзийы, йӕ нывты. Ӕппӕты сӕйрагдӕр та, цӕры  адӕмы зӕрдӕты. Уарзынц ӕй, нымайынц ӕй ирон адӕм. Цӕры Къостайы ном: ӕвӕрд ӕрцыд хъӕутӕ ӕмӕ уынгтыл, колхозтӕ ӕмӕ ахуыргӕнӕндӕттыл.

Хетӕгкаты Къостайы ном хӕссы Цӕгат Ирыстоны паддзахадон университет дӕр. Уый не ‘ппӕтӕн дӕр — ахуыргондӕй, ахуыргӕнинагӕй, кусӕгӕй, службӕгӕнӕгӕй — стыр кады хъуыддаг у. О, уӕвгӕ ӕрмӕст кады хъуыддаг нӕу. Стыр лӕджы ном цӕмӕй ноджы кадджындӕр уа, уый тыххӕй махӕй алкӕй дӕр йӕ бынаты тынгдӕр архайын хъӕуы: кӕй наукӕйы, кӕй ахуырады. Цас фылдӕр нын бантыса, уыйас тынгдӕр сӕххӕст кӕндзыстӕм Иры намысджын хъӕбул Къостайы фӕ7дзӕхст рухсмӕ ӕнӕзивӕгӕй цӕуыны тыххӕй.

Цыбыр дзырдӕй, нӕ уарзон поэты загъдау «Рухсмӕ ӕнӕзивӕг цомут ӕнгомӕй».

Мӕхӕмӕтты Ахуырбег,

ЦИПУ-йы президент, историон наукӕты доктор, профессор

ОСТАВЬТЕ ОТВЕТ

Please enter your comment!
Please enter your name here