«Хъӕд бахъахъхъӕнӕм»

0
31

Ӕппӕтуӕрӕсеон экологон акци «Хъӕд бахъахъхъӕнӕм»-ы фӕлгӕты дзыллон мадзал арӕзт ӕрцыд Кировы хъӕды хӕдзарады дӕр. Акцийы архайджытӕ 15 гектары фӕзуатыл ныссагътой тулдзы 70 мин талайы.

Хъӕды хӕдзарады кусджытӕй уӕлдай, ӕрдзхъахъхъӕнӕн мадзалы зӕрдиагӕй архайдтой ӕндӕр ведомствӕтӕ ӕмӕ организациты минӕвӕрттӕ. Се ‘хсӕн уыдысты ӕппӕтуӕрӕсеон адӕмон фронты регионалон хайады, Цӕгат Ирыстоны паддзахадон университеты, Тӕрхонадон уынаффӕтӕ ӕххӕстгӕнӕг федералон службӕйы регионалон дӕлхайады, беслӕйнаг рӕвдауӕндон «Березка»-йы минӕвӕрттӕ, стӕй бархионтӕ ӕмӕ журналисттӕ (ӕдӕппӕт — 300 адӕймагӕй фылдӕр).

Республикӕйы ӕрдзон фӕрӕзтӕ ӕмӕ экологийы министры хӕдивӕг Дойаты Хъазыбег куыд радзырдта, афтӕмӕй акцийы мадзӕлттӕ фӕззӕджы дӕргъы цӕуынц бӕстӕйы фылдӕр регионты. Йӕ ныхасмӕ гӕсгӕ, уыцы мадзалы фӕлгӕты Цӕгат Ирыстоны хъӕды хӕдзарады кусджытӕ 71 гектары фӕзуатыл ныссадздзысты 280 мин талайы.

Ӕмӕ ныр Заманхъулмӕ ‘ввахс бынаты цы 70 мин талайы ныссагътой, уый уыд акцийӕн йӕ сӕйрагдӕр хай.

«Ацы бон нӕ фарсмӕ чи ӕрбалӕууыд, уыцы адӕм ирдӕй равдыстой, сӕ алфамбылай ӕрдзы фӕрныгадыл ныхӕстӕй нӕ, фӕлӕ, хъуыддагӕй кӕй тыхсынц, уый. Уыимӕ, уӕлдай ӕхсызгон у, азӕй-азмӕ акцийы архайджыты нымӕц зынгӕ кӕй рӕзы, уый. Ӕппӕт организацитӕ ӕмӕ ӕхсӕнадон иугӕндты минӕвӕрттӕн дӕр бузныг зӕгъӕм», — фӕнысан кодта Дойаты Хъазыбег.

Ӕппӕтуӕрӕсеон акци «Хъӕд бахъахъхъӕнӕм» райдыдта 26 августы Камчаткӕйы. ӕмӕ уырдыгӕй «раивылд» бӕстӕйы иннӕ регионтӕм. Мадзалӕн фадӕттӕ саразынц УФ-йы ӕрдзон фӕрӕзтӕ ӕмӕ экологийы министрад ӕмӕ Хъӕды хӕдзарады федералон агентад. Цӕгат Ирыстоны акцийыл бӕрнон у ӕрдзон фӕрӕзтӕ ӕмӕ экологийы регионалон министрад.

Дзыныхты Аленӕ

ОСТАВЬТЕ ОТВЕТ

Please enter your comment!
Please enter your name here