Иры фарны бӕрӕгбон

0
16

Сыгъзӕрин фӕззӕджы  зӕхх куыд бӕркадхӕссӕг у, раст афтӕ ацы афон нӕ дзыллӕйы уд, зонд ӕмӕ зӕрдӕйӕн вӕййы сӕ хъӕздыггӕнӕн, сӕ миддуне сын афӕдзӕй-афӕдзмӕ фӕрнджындӕр чи фӕкӕны, уыцы намысы, ирон дзырды рухс бӕрӕгбон — 15 октябр.

Уӕд, стырӕй-чысылӕй, кад фӕкӕнӕм Иры ӕрдхӕрӕны хъӕбул, номдзыд поэт, прозаик, этнограф, драматург, нывгӕнӕг, публицист, ӕхсӕнадон архайӕг, адӕмы бартыл зынгзӕрдӕ патриот, ӕцӕг демократ Хетӕгкаты Къостайы райгуырӕн бон.

Знон дӕр Къостайы райгуырдыл 161 азы сӕххӕсты бон,  цыма хур дӕр  йӕ фарнӕн ӕмӕ рухс номӕн ӕгъдау лӕвӕрдта, афтӕ рӕдауӕй йӕ тынтӕ ӕрвыста зӕхмӕ. Бӕрӕгбоны сӕйраг мадзӕлттӕ арӕзт ӕрцыдысты Ирон театры уӕрӕх фӕзы, ирон литературӕйы бындурӕвӕрӕгӕн дзы цы диссаджы цыртдзӕвӕн ис, уый раз. Уырдӕм ӕрбамбырд сты РЦИ-Аланийы Хицауады, Парламенты,  Культурӕйы министрады, Мыхуыр ӕмӕ дзыллон коммуникациты комитеты,  ӕхсӕнадон организациты ӕмӕ  Фысджыты цӕдисы разамынд, студенттӕ ӕмӕ скъоладзаутӕ.

Кадджын ӕмбырд йӕ арфӕйы ныхасӕй байгом кодта Мыхуыр ӕмӕ дзыллон коммуникациты комитеты сӕрдар Фидараты Юри.

— Къоста у нӕ адӕмы иузӕрдион хъӕбул. Йе ‘мдзӕвгӕты, публицистон ӕмӕ йӕ иннӕ сфӕлдыстадон бынты ирон адӕмы  цы фарны рухсмӕ хуыдта, уымӕ хъуамӕ тырнӕм ӕмӕ цӕуӕм. Уӕд нӕ фидӕн уыдзӕн бӕллиццаг ӕмӕ фӕлтӕрты раз ӕвӕсмон, — загъта йӕ раныхасы Фидараты Юри.

Уый фӕстӕ раныхас кодта РЦИ-Аланийы Фысджыты цӕдисы сӕрдар, нӕ республикӕйы адӕмон фыссӕг, Хетӕгкаты Къостайы номыл паддзахадон премийы лауреат  Агънаты Гӕстӕн.

— Мах, ирон адӕм, хъуамӕ амондджын хонӕм нӕхи, уымӕн ӕмӕ нын ис Къоста. Уый йӕ царды ӕмӕ сфӕлдыстадон фӕндаджы сгуыхтдзинӕдтӕй ӕрмӕст ирон адӕмы рӕзтыл нӕ аудыдта, фӕлӕ йӕ удварнӕй ӕмӕ зондӕй хорзы бацыд Цӕгат Кавказы цӕрӕг иннӕ адӕмыхӕттытӕн, йӕ литературон бынтӕ систы дунеон дзырдаивады хъӕздыгдзинад. Йӕ номӕн ӕмӕ сфӕлдыстадон сгуыхтытӕн аргъ кӕнынц нӕ бӕстӕйы ӕппӕт адӕмыхӕттытӕ. Нӕ ирон литературӕйы бындурӕвӕрӕгӕн йе ‘мдзӕвгӕты ӕмбырдгонд «Ирон фӕндыр» сси нӕ адӕмӕн сӕ иууыл уарзондӕр чиныг. ӕмӕ нын йӕ дзырд, йӕ хъуыдытӕ ныры  дуджы дӕр ахсджиаг ӕмӕ зынаргъ кӕй сты, ууыл дзурӕг у абоны бӕрӕгбон дӕр, — загъта Гӕстӕн.

Уый фӕстӕ РЦИ-Аланийы Сӕргълӕууӕг Битарты Вячеслав, нӕ республикӕйы Парламенты Сӕрдар Алексей Мачнев, Культурӕйы министр Къубалты Эльбрус, Фысджыты цӕдисы сӕрдар Агънаты Гӕстӕн, Ирон театры разамынд, ӕхсӕнадон организациты минӕвӕрттӕ дидинджытӕ сӕвӕрдтой Къостайы цыртдзӕвӕныл.

Куыд алы хатт, афтӕ та ныр дӕр Ирон театры артисттӕ поэты райгуырӕн бонмӕ бацӕттӕ кодтой литературон-музыкалон композици, ӕмӕ йӕ равдыстой, Театралон фӕзмӕ чи ӕрбацыд, уыдонӕн. Ам ма ӕвӕрд ӕрцыд «Сӕрибар микрофон», ӕмӕ йӕ цуры бӕрӕгбонмӕ ӕрбацӕуджытӕй алкӕмӕн дӕр бар уыд Къостайы, кӕнӕ йӕхиуыл фыст поэтикон уацмыстӕ бакӕсынӕн.

Гасанты Валери

Къамтӕ систа Хъайырты Дианӕ

ОСТАВЬТЕ ОТВЕТ

Please enter your comment!
Please enter your name here