Сӕ царды уавӕртӕ фӕхуыздӕр уыдзысты

0
25

Уӕззау, зындзӕбӕхгӕнӕн низимӕ чи тох кӕны, уыимӕ ма йӕ царды уавӕртӕ дӕр зӕрдӕмӕдзӕугӕ кӕмӕн не’ сты, ахӕм адӕмӕн Дзӕуджыхъӕуы администрацийы ӕмбырдтӕ аразӕн залы знон радтой сӕ цӕрӕн уавӕртӕ фӕхуыздӕр кӕныны тыххӕй сертификаттӕ.

 

Ӕдӕппӕтӕй номхыгъды ис 48 адӕймаджы. Уыдон 2005 азы январы  сӕ куырдиӕттӕ куы балӕвӕрдтой, уӕдӕй абонмӕ ӕнхъӕлмӕ кӕсынц дзуапмӕ. Ныр фыццаг хатт, паддзахадон программӕйы бындурыл, 19 бинонтӕ ахӕм ӕххуыс райстой. Бюджеты уыцы хӕрдзтӕн бавӕрдтой 20 милуан сомы. Афтӕмӕй алы сертификаты аргъ дӕр у 1  047 990 сомы.

Дзӕуджыхъӕуы муниципалон сконды сӕргълӕууӕг Икъаты Русланбег ӕмӕ горӕты сӕргълӕууӕг Фӕрниаты Тамерлан арфӕ ракодтой, сертификаттӕ чи райста, уыдонӕн.

— Бирӕ рӕстӕг ӕнхъӕлмӕ кастыстут ацы ӕхсызгондзинадмӕ ӕмӕ уӕ циныл цин кӕнӕм. Бацархайдзыстӕм, цӕмӕй алы азы бюджеты дӕр ахӕм фӕрӕзтӕ ӕвӕрд цӕуа, цӕмӕй социалон ӕххуыс райса, закъонмӕ гӕсгӕ кӕмӕн ӕмбӕлы, уыдонӕй алчидӕр, — загъта Икъаты Русланбег.

Гугкаты Жаннӕ

Къам систа Хъайырты Дианӕ

ОСТАВЬТЕ ОТВЕТ

Please enter your comment!
Please enter your name here