Мидхъуыддӕгты оргӕнты кусджытӕн — арфӕтӕ

0
16

Знон Уӕрӕсейы сбӕрӕг кодтой мидхъуыддӕгты оргӕнты кусджыты бӕрӕгбон. Уый размӕ бон нӕ республикӕйы Сӕргълӕууӕг Битарты Вячеслав, Парламенты Сӕрдар Алексей Мачнев, мидхъуыддӕгты министр Михаил Скоков барадхъахъхъӕнӕг оргӕнты кусджытӕн арфӕ ракодтой.

«Пъӕлицӕйаджы дӕсныйад у ӕппӕты ахсджиагдӕр ӕмӕ лӕгдзинады ӕууӕлтӕй ӕххӕст, домы ӕппӕт хъарутӕ дӕр фыдракӕнды ныхмӕ саразын, ӕппӕтвӕрсыг цӕттӕдзинад ӕмӕ рӕстуд уӕвын. Мах цӕрӕм вазыгджын рӕстӕг, ӕмӕ хъуамӕ нӕ республикӕйы алы цӕрӕг дӕр йӕхи ӕнкъара ӕдас бынаты. Абон мидхъуыддӕгты оргӕнты кусджытӕ архайынц дохтыртимӕ хӕцгӕниз ма ‘руадзыныл. Стыр бузныг уӕ куысты тыххӕй. Мидхъуыддӕгты оргӕнты кусджытӕн мӕ зӕрдӕ зӕгъы сӕ дӕсныйады бӕрзонд домӕнтӕн аккаг дзуапп дӕттын, бӕрнонӕй уӕ хӕс ӕххӕст кӕнын», — раарфӕ кодта Битарты Вячеслав ӕмбырды архайӕг афицертӕн.

Уӕлдай зӕрдӕмӕдзӕугӕдӕр ныхӕстӕ ӕрхауд оргӕнты ветерантӕм. Нӕ республикӕйы ӕдасдзинадмӕ стыр ӕвӕрӕн бахӕссыны тыххӕй майдан «Ирыстоны Намысӕй» хорзӕхгонд ӕрцыдысты мидхъуыддӕгты министры хӕдивӕг Цыбырты Таймураз, экономикон ӕдасдзинады ӕмӕ коррупциимӕ тохы управленийы разамонӕг Гӕдзауты Аслан, мидхъуыддӕгты медико-санитарон хайы хицауы хӕдивӕг Хъӕбӕлоты Зауырбег, Дзӕуджыхъӕуы мидхъуыддӕгты управленийы хицау Саутӕты Вадим.

Сӕ куысты хӕстӕ зӕрдиагӕй ӕххӕст кӕныны тыххӕй нӕ республикӕйы Кады грамотӕйӕ хорзӕхгонд ӕрцыд мидхъуыддӕгты оперативон куысты хицауы хӕдивӕг Наниты Роберт. Ӕмбырды архайджытӕ ӕрымысыдысты, йӕ куысты хӕс ӕххӕст кӕнгӕйӕ чи фӕмард, мидхъуыддӕгты оргӕнты уыцы афицертӕ ӕмӕ рӕнхъонты. «Уыцы ӕцӕг хъӕбатыртӕн — ӕнусон кад. Сӕ нӕмттӕ ӕрмӕст сӕ хиуӕтты зӕрдӕты ӕмӕ цыртдзӕвӕнтыл не сты, фӕлӕ Ирыстоны ӕмӕ Уӕрӕсейы нырыккон историйы», — загъта Битарты Вячеслав.

Йӕ архайдӕй чи фесгуыхт, уыцы кусджытӕ хорзӕхтӕ райстой Парламенты Сӕрдар Алексей Мачневы къухӕй.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here