Битарты Вячеслав: «Дзӕуджыхъӕуӕй Мӕздӕгмӕ фӕндаг хъуамӕ ацы аз срӕвдз уа»

0
22

Цӕгат Ирыстоны Фӕндагон хӕдзарады комитет хъуамӕ ацы аз бацархайа фӕндаг «Дзӕуджыхъӕу-Мӕздӕг»-ы арӕзтад кӕронмӕ сӕххӕст кӕныныл. Ахӕм хӕс РЦИ-Аланийы Сӕргълӕууӕг Битарты Вячеслав кусӕг фембӕлды рӕстӕг сӕвӕрдта комитеты сӕрдар Солиты Тариэлы размӕ.

“Автомобилон фӕндаг баиу кӕндзӕн дыууӕ егъау муниципалом сконды ӕмӕ экономикон хӕрдзтӕ фӕкъаддӕр уыдзысты. Арӕзтадӕн ма ис регионты ‘хсӕн ахадындзинад дӕр: Цӕгат Кавказы скӕсӕйнаг хайӕ рахизӕн уыдзӕн Фӕскавказмӕ хонӕг фӕндагмӕ. «Дзӕуджыхъӕу-Мӕздӕг» саразынӕн стыр куыст бакодтам, объект хъуамӕ сцӕттӕ уа ацы азы кӕронмӕ. Ӕмгъуыдтӕ сты бӕрӕг, уӕдӕ ма фӕндаджы арӕзтады хӕрзхъӕддзинадмӕ дӕр хъуамӕ нӕ цӕст фӕдарӕм», — загъта Битарты Вячеслав.

Зындгонд куыд у, афтӕмӕй 20 азӕй фылдӕр Мӕздӕджы районмӕ цыдыстӕм Кӕсӕг-Балхъары республикӕйыл. 2018 азы Битарты Вячеслав комкоммӕ бастдзинады фарст сӕвӕрдта Уӕрӕсейы Президент Владимир Путины размӕ. Уый сразы ис регионалон разамынды фӕндыл.

Ныхасы рӕстӕг ма фӕбӕрӕг кодтой, хӕххон курорт «Мамысон»-мӕ хонӕг автофӕндаджы тъунелы арӕзтады фарст дӕр. Битарты Вячеславы ныхасмӕ гӕсгӕ, республикӕ федералон бюджетӕй райста 200 милуан сомы ацы объект рацаразынмӕ. Ам ахсджиаг у нырыккон хӕрзхъӕд фӕндаг саразын.

Солиты Тариэл республикӕйы разамонӕгӕн радзырдта, ацы азы куысты бӕрӕггӕнӕнты, национ проект «ӕдас ӕмӕ хӕрзхъӕд автомобилон фӕндӕгтӕ» куыд ӕнтысынц, 2021 азмӕ нысанты тыххӕй. «Цӕгат Ирыстоны фӕндагон хӕдзарады кусджытӕ равдыстой хорз бӕрӕггӕнӕнтӕ. Национ проект «ӕдас ӕмӕ хӕрзхъӕд фӕндӕгтӕ» ӕххӕст кӕнгӕйӕ, республикой бюджеты ӕхца схардз кодтам. Ацы азы кӕронмӕ федералон фӕрӕзтӕй дӕр ӕххӕстӕй спайда кӕндзыстӕм», — фӕбӕрӕг кодта Солийы-фырт.

Кӕронбӕттӕны Битарты Вячеслав комитеты сӕрдарӕн бафӕдзхста, федералон автомобилон фӕндӕгты управлени «Кавказ»-имӕ Дзӕуджыхъӕуы фӕрсты цӕуӕг фӕндаг саразыны тыххӕй ӕмгуыст кӕнын. Ныридӕгӕн проектон-хӕрдзты гӕххӕтт срӕвдз ис. Сӕйраг паддзахадон экспертизӕ йын хорз аргъ скодта. Проект царды рауадзынӕн ӕхца ӕвӕрд ӕрцыд.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here