Эпидемийы ныхмӕ мадзӕлттӕ. Фиддонтӕ

0
50

РЦИ-Аланийы Сӕргълӕууӕг Битарты Вячеслав кӕй амыдта, уыцы ӕмбырды ӕрныхас кодтой ӕххӕстгӕнӕг хицауады ӕмӕ бынӕттон хиуынаффӕйады оргӕнты ӕмархайдыл.

Ӕмбырд скодтой видеобастдзинады фӕрцы, архайдтой дзы Хицауады Сӕрдар Тускъаты Таймураз, сӕйраг федералон инспектор Челӕхсаты Владимир, Хицауады Сӕрдары хӕдивджытӕ Сӕбӕтхъуаты Ӕхсарбег, Иринӕ Азимова, Кӕсӕбиты Игор, Томайты Ирбег, министртӕ, ведомствӕты разамонджытӕ ӕмӕ энергидӕттӕг кусӕндӕтты минӕвӕрттӕ.

Республикӕйы Сӕргълӕууӕг ӕмбырды архайджытӕм фӕсидт, цӕмӕй эпидемийы ныхмӕ мадзӕлттӕм къӕрцхъус уой. Уый фыццагдӕр хауы ахуырады организацитӕм, транспортмӕ ӕмӕ куыстуӕттӕм. «Ӕмбарынгӕнӕн архайд хъӕуы куыстуӕттӕ ӕмӕ базарады центрты разамонджытимӕ. Сӕ ахаст куы нӕ аивой, уӕд профилон организаци бавналдзӕн хиирхӕфсӕн центртӕ, кинотеатртӕ, ӕхсӕнадон фӕлхасады бынӕттӕ ӕхгӕнынмӕ. Адӕм ӕнӕ куыстӕй баззайдзысты. Уымӕ гӕсгӕ уын уе ргом здахын эпидемийы ныхмӕ мадзӕлттӕ ӕххӕст кӕнынмӕ», — бафӕдзӕхста Битары-фырт.

Ног коронавирусон хӕцгӕниз парахат кӕныны рӕстӕг фӕлхасгонд энергофӕрӕзтӕн республикон ӕмӕ бынӕттон бюджеттӕй афойнадыл фидыны хъуыддагыл дӕр рауад бӕстон ныхас. Энергидӕттӕг куыстуӕтты минӕвӕрттӕ куыд бацамыдтой, афтӕмӕй республикон бюджетӕй октябрӕн бафыстой 119 проценты, 10 мӕйӕн — 98 проценты. Уыдонӕй бынӕттон бюджетӕй — 100 проценты, республикон бюджетӕй — 97 проценты. Горӕтгӕрон ӕмӕ Рахизфарсы районтӕй фӕстӕмӕ, ӕппӕт муниципалон скондтӕ дӕр хардзгонд фӕрӕзтӕн 10 мӕйӕн бафыстой 100 проценты.

Ӕмбырды ма равзӕрстой, адӕмы цы кӕлӕддзаг хӕдзӕрттӕй раивтой, уыдон фехалыны, цӕрӕнуӕттӕ аразыны бӕрц Дзӕуджыхъӕу ӕмӕ районты, муниципалон скондты санитарон уавӕры фарстытӕ. Битарты Вячеслав ма районты разамонджытӕн бахӕс кодта сӕ дӕлбар уӕвӕг дӕлхайӕдтӕн хицӕуттӕ сфидар кӕныны тыххӕй бадзырдтӕ бафыссын.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here