Промышленнон куыстады индекс сырӕзт

0
62

Фӕстаг ӕхсӕз азы дӕргъы промышленнон куыстады индексы бӕрц ацы азы фараст мӕйы рауад нывыл — 130,7 проценты (фароны уыцы ӕмгъуыдимӕ абаргӕйӕ). Уый тыххӕй РЦИ-Аланийы Сӕргълӕууӕг Битарты Вячеславӕн фехъусын кодта Цӕгат Кавказы федералон зылды паддзахадон статистикӕйы федералон службӕйы разамонӕджы хӕдивӕг Олег Быкадоров.

Индексы рӕзтыл фӕбӕрӕг хомагкуыстгӕнӕг къабаз, уыдонимӕ — дзидза ӕмӕ маргъ, къалбӕстӕ, шампайнаг сӕнтӕ, минералон дӕттӕ рауадзын. Уӕдӕ 2020 азы Зӕрӕмӕджы ГЭС кӕй скуыста, уый дӕр у ахъаззаг ӕвдисӕн. «Хъӕууон хӕдзарады индексы кой куы кӕнӕм, уӕд ам дӕр ис размӕцыд. Хъӕууонхӕдзарадон продукцийы рауагъд, ивгъуыд рӕстӕгимӕ абаргӕйӕ, фӕфылдӕр», — загъта Олег Быкадоров.

Ацы аз фӕфылдӕр хъӕууонхӕдзарадон культуртӕн лӕвӕрд фӕзуат, ссис 167,8 мин гектары. Садзынц дзы хор ӕмӕ хоры-хъӕдуры культуртӕ, нартхорӕн лӕвӕрд фӕзуат фӕфылдӕр 10,9 проценты. Кировы районы ӕрӕмбырд кодтой 48,8 центнеры иу гектарӕй. Фосдарынады дӕр ис ӕнтыстдзинӕдтӕ, сентябры кӕрон фӕфылдӕр стурвосы бӕрц, рауад 94,7 мин сӕры, сӕгътӕ ӕмӕ фысты нымӕц та — 122,6 мин сӕры.

Цӕрӕнуӕтты арӕзтады дӕр 2020 азы январӕй сентябрмӕ хицӕн адӕймӕгтӕ ӕмӕ хиисбонады ӕппӕт хуызты организацитӕ сарӕзтой хӕдзӕрттӕ 206,8 мин квадратон метры. Фембӕлды сӕйраг ныхас бацахста, республикӕ ӕппӕтуӕрӕсеон сфыстмӕ куыд цӕттӕ у, уый. Хъуамӕ йӕ скӕной 2021 азы. «Цӕрджыты сфыст у паддзахады царды ахсджиагдӕр цау. Йӕ бацӕттӕ кӕнын ӕмӕ йӕ царды сӕххӕст кӕнынӕн ис стыр ахадындзинад. Стыр ӕргом аздахын хъӕуы фӕсвӕд ӕмӕ дӕрддзӕф уӕвӕг хъӕутӕм. Сфысты хатдзӕгтӕй аразгӕ уыдзӕн бӕстӕ ӕмӕ регионы социалон-экономикон, демографион уавӕр», — загъта Битарты Вячеслав.

Ӕппӕтуӕрӕсеон сфыст конд ӕрцӕудзӕн нымӕцон хуызы, фыццаг хатт спайда кӕндзысты сӕрмагонд программон ифтонгадимӕ планшеттӕй. Уыдон бӕрӕггӕнӕнтӕ рӕвдз, ӕнӕ рӕдыдтытӕй бакусдзысты. Нӕ республикӕйы цӕрджытӕн уыдзӕн «Паддзахадон лӕггӕдтӕ»-йӕ спайда кӕныны фадат. Олег Быкадоров республикӕйы разамонӕгӕн куыд бацамыдта, афтӕмӕй ӕппӕт нысантӕ дӕр афойнадыл ӕххӕстгонд цӕуынц. «Сфидар кодтам, ӕмӕ кусынц иу республикон ӕмӕ 9 муниципалон къамисы, ныридӕгӕн сбӕрӕг кодтам адристӕ. 2010 азы сфысты бӕрӕггӕнӕнтӕ сног кодтам, ӕппӕт цӕрӕнбынӕтты нымӕцон картографион ӕрмӕг бацӕттӕ кодтам. Цӕгат Ирыстоны пълан у рӕвдз», — загъта Олег Быкадоров.

Цӕрджыты ӕппӕтуӕрӕсеон сфыст хъуамӕ скодтаиккой 2020 азы октябры, фӕлӕ йӕ пандемийы аххосӕй ахастой 2021 азы 1—30 апрелмӕ. Битарты Вячеслав куыд фӕбӕрӕг кодта, афтӕмӕй паддзахадон статистикӕйы архайд у тынг ахсджиаг. Йӕ ныхасмӕ гӕсгӕ, фидӕны хъуамӕ федералон ведомствӕ йӕ архайд фӕтынгдӕр кӕна бынӕттон хицауадимӕ. Уый фӕрцы 2021 азмӕ нысангонд, социалон ахадындзинадимӕ хӕстӕ ӕххӕстгонд ӕрцӕудзысты республикӕйы цӕрджыты раз.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here