Битарты Вячеслав: «Цӕгат Ирыстонӕн Мӕздӕджы район уӕлдай ахсджиаг у»

0
68

Мӕздӕджы кусӕг балцы уӕвгӕйӕ, Цӕгат Ирыстоны Сӕргълӕууӕг БИТАРТЫ Вячеславӕн уыд цалдӕр ахсджиаг фембӕлды район ӕмӕ горӕты администрациты разамонджытимӕ. Республикӕйы разамонӕг архайдта ӕндӕр мадзӕлтты дӕр.

Районы администрацийы Битарты Вячеслав цы уӕрӕх ӕмбырд сарӕзта, уым архайдтой республикон министрадтӕ ӕмӕ ведомствӕты бӕрнон кусджытӕ, районы сӕргълӕууӕг Гугиты Геннади, районы администрацийы хицау Олег Яровой ӕмӕ муниципалитеты структурон дӕлхайӕдты разамонджытӕ.

Ӕмбырды архайджытӕ сӕйраг ӕргом аздӕхтой, Мӕздӕжды районы со­циалон-экономикон райрӕзтӕн ахъазгӕнӕг мадзӕлттӕ 2020-2022 азты куыд ӕххӕстгонд цӕуынц, уымӕ.

— Зындгонд куыд у, афтӕмӕй Мӕздӕджы райо ны социалон-экономикон райрӕзты программӕйы мадзӕлттӕ ӕмӕ ӕмгъуыд фӕфылдӕр кодтам. Иухатт ма мӕ зӕгъын фӕнды, Цӕгат Ирыстонӕн Мӕздӕджы район стратегион ӕгъдауӕй уӕлдай ахсджиаг кӕй у, уый. Уыцы ӕууӕл хынцгӕйӕ, республикӕйы Хицауады ӕргом сӕрмагондӕй аздахын хъӕуы районы цардарӕзты лыггӕнинаг фарстытӕм. Кӕй зӕгъын ӕй хъӕуы, районы разамындӕй дӕр бирӕ аразгӕ у. Ӕрмӕстдӕр ӕппӕт хъарутӕ ӕрбангом кӕнгӕйӕ, бафтдзӕн нӕ къухы райо­ны социалон-экономикон цард бӕрзонддӕр къӕпхӕнмӕ сисын, йӕ раныхасы фӕнысан кодта Битары-фырт.

Фембӕлды архайджытӕ бӕстон ӕрдзырдтой, 2019 азы районы хъӕуты цӕрджытимӕ фембӕлдтыты фӕстӕ Цӕгат Ирыстоны Сӕргълӕууӕг бынӕттон цӕрджыты тыхстаг фарстытӕ алыг кӕныны фӕдыл министрадтӕ ӕмӕ ведомствӕты разамонджытӕн цы бӕлвырд амынддзинӕдтӕ радта, уыдон куыд ӕххӕстгонд цӕуынц, ууыл дӕр.

Афтӕ, Хъызлары хъӕуы цӕрджытӕ республикӕйы разамонӕгмӕ бахатыдысты, цӕмӕй сын баххуыс кӕна бынӕттон Культурӕйы хӕдзары цалцӕджы хъуыддаджы. Олег Яровой куыд фехъусын кодта, афтӕмӕй культурӕйы уыцы артдзӕсты бындурон цалцӕгӕн хъӕугӕ хыгъды гӕххӕттытӕ ныридӕгӕн лӕвӕрд ӕрцыд РЦИ-Аланийы Капиталон арӕзтады управленимӕ. Битарты Вячеслав Финансты министрады разамындӕн бахӕс кодта, цӕмӕй Хъызлары Культурӕйы хӕдзары цалцӕгӕн хъӕугӕ фӕрӕзтӕ радих кӕна 2021 азы республикон бюджетӕй. Уыимӕ, республикӕйы Сӕргълӕууӕджы ныхасмӕ гӕсгӕ, Культурӕйы хӕдзар цалцӕджы фӕстӕ хъӕугӕ ифтонггӕрзтӕй баххӕст кӕнынӕн ӕхцайы фӕрӕзтӕ хъуамӕ бацагура Мӕздӕджы районы администраци.

Куыст цӕуы районы Центрон рынчындоны цур зӕрдӕ ӕмӕ дадзинты низтӕ дзӕбӕхгӕнӕн центр байгом кӕныныл дӕр. Республикӕйы ӕнӕниздзинад хъахъхъӕнынады министры хӕдивӕг Томайты Тамарӕйы ныхасмӕ гӕсгӕ, уыцы центрӕн 2020 азы балхӕндзысты компьютерон то­мограф ӕмӕ ӕндӕр хъӕугӕ медицинон техникӕ. Уый фадат ратдзӕн, цӕмӕй уал фыццаг къӕпхӕны кусын райдайа фидӕны центры дадзинты низтӕ дзӕбӕхгӕнӕн хайад. Куыд нысангонд цӕуы, афтӕмӕй центр ӕппӕт хъарутӕй скусдзӕн 2024 азмӕ. Фарстыл дзургӕйӕ,  Битарты Вячеслав профилон ведомствӕты разамонджытӕн бахӕс кодта, центр ифтонг кӕныны хъуыддаг фӕрӕвдздӕр кӕнын, цӕмӕй районы цӕрджытӕн уа хуыздӕр медицинон лӕггӕдтӕ исыны фадат.

Ӕнӕниздзинад хъахъхъӕнынады фарстытыл ныхас адарддӕр кӕнгӕйӕ, ӕмбырды архай джытӕ ӕркастысты Мӕздӕджы районы Центрон рынчындоны бындурон цалцӕг ӕмӕ дзы арӕндоны хайады арӕзтады фарстытӕм дӕр. Республикӕйы Сӕргълӕууӕг бӕрнон ведомствӕты разамонджытӕн бахӕс код­та, цӕмӕй уыцы куыстытӕн хъӕугӕ ӕппӕт хыгъды гӕххӕттытӕ дӕр цӕттӕ уой 2021 азы 15 январмӕ.

Афтӕ бӕстон ӕркастӕуыд, республикӕйы разамындимӕ фембӕлдтыты районы хъӕуты цӕрджытӕ цы куырдиӕттӕ ӕмӕ фӕндӕттӕ бахастой, уыдон ӕххӕст кӕныны фарстытӕм дӕр.

Фӕстӕдӕр Битарты Вячеслав ӕмӕ районы разамонджытӕ кадджын уавӕры байгом кодтой ног 500-бынатон иумӕйагахуырадон скъола.

Кадджын ӕмбырды йӕ раныхасы республикӕйы Сӕргълӕууӕг куыд фӕнысан кодта, афтӕмӕй Хицауад уӕлӕмхасӕн мадзӕлттӕ аразы, цӕмӕй бындурон цалцӕггонд цӕуой не скъолатӕ, цӕмӕй арӕзт цӕуой ног ахуырадон кусӕндӕттӕ.

— Абон мах гом кӕнӕм ног ӕппӕтфадатджын скъола. Ног ахуырадон кусӕндон дзуапп дӕтты ӕппӕты нырыккондӕр домӕнтӕн. Ацы мӕздӕггаг микрорайоны цӕрджыты нымӕц фылдӕрӕй-фылдӕр кӕй кӕны, уыцы ӕууӕл хынцгӕйӕ, уӕлдай ахсджиаг у, цӕмӕй дзы рӕза ахуырадон ӕмӕ ӕндӕр социалон объектты нымӕц дӕр, — бафиппайдта Цӕгат Ирыстоны Сӕргълӕууӕг.

Фӕстӕдӕр фысымтӕ ӕмӕ уазджытӕ ӕрзылдысты ног скъолайы бӕстыхӕйттыл, сӕхи цӕстӕй федтой, ахуырдзаутӕн дзы цы фадӕттӕ ис, уый. Ӕппӕт кълӕстӕ дӕр ифтонг сты хъӕугӕ ахуырадон ӕмӕ техникон фӕрӕзтӕй, репетицион ӕмӕ ӕмбырдтӕ аразӕн залты ӕвӕрд ӕрцыдысты акустикон системӕтӕ, спортивон зал, хӕрӕндон ӕмӕ иннӕ дӕлхайӕдты бакаст дӕр зӕрдӕйӕн ӕхсызгон у…

Фысымтӕ куыд радзырдтой, афтӕмӕй скъолайы кусдзысты робототехникӕйы ӕмӕ психологон ӕххуысы кабинеттӕ, уӕлӕмхасӕн ахуырады ӕмӕ хиирхӕфсӕн хъӕзтыты кълӕстӕ… Иу ныхасӕй, ӕртӕуӕладзыгон райдзаст агъуысты хорз фадӕттӕ ис ӕппӕтвӕрсыг ахуырадон процесс ӕххӕст кӕнынӕн.

Кадджын ӕмбырды архайджытӕ аразджыты куыстӕн хорз аргъ скодтой.

Фӕстӕдӕр журналистты фарстытӕн дзуапп дӕтгӕйӕ, Битарты Вячеслав зӕрдыл ӕрлӕууын кодта, 2017 азы Уӕрӕсейы Президент Владимир Путины амынддзинадмӕ гӕсгӕ, федералон Хицауад сфидар кодта Республикӕ Цӕгат Ирыстон-Аланийы социалон-экономикон рӕзты фӕдыл сӕрмагонд уынаффӕ. Уыцы документы сӕрмагонд ӕргом здӕхт ӕрцыд Мӕздӕджы районмӕ.

— Федералон центры ӕххуысӕй абон Мӕздӕджы фӕзынд ног скъола. Уымӕй уӕлдай, УФ-йы Хицауад ӕрвылаз сӕрмагонд фӕрӕзтӕ радих кӕны Мӕздӕджы районы дарддӕры райрӕзты программӕ ӕххӕст кӕнынӕн. Уыимӕ, кӕй зӕгъын ӕй хъӕуы, районы бирӕ объекттӕ арӕзт цӕуы республикон бюджеты хардзӕй дӕр. Ӕмӕ уыцы куыстытӕ хӕстӕгдӕр азты адарддӕр кӕндзыстӕм. Зӕгъӕм, ацы аз ног скъолайы арӕзтад райдыдта Хъызлары, фидӕн азы та бавналдзыстӕм Мӕздӕджы ног скъола-интернаты арӕзтадмӕ, — кӕронбӕттӕны загъта Битарты Вячеслав.

Республикӕйы разамонӕджы ныхасмӕ гӕсгӕ, республикӕ зӕрдиагӕй архайы фыццаградон национ проектты уагӕвӕрдтӕ ӕххӕст кӕныныл дӕр. «Национ проекттӕ нын уӕлӕмхасӕн фадӕттӕ дӕттынц ног рӕвдауӕндӕттӕ ӕмӕ скъолатӕ аразыны хъуыддаджы, стӕй ӕндӕр социалон фарстытӕ лыг кӕнынӕн», — фӕнысан кодта Цӕгат Ирыстоны Сӕргълӕууӕг.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here