Рахизфарсы районы рынчындоны сӕвӕрдзысты ног томограф

0
35

Битарты Вячеслав дзы сӕрдариуӕг кодта, афтӕмӕй уыд коронавирусы инфекци парахат кӕнынӕн гӕрӕнтӕ ӕвӕрыны фарстыты фӕдыл республикон оперативон штабы ӕмбырд.

Ног низӕфтауӕджы ныхмӕ Рахизфарсы районы медицинон кусджытӕ куыд тох кӕнынц, ууыл дзургӕйӕ, Центрон рынчындоны сӕйраг дохтыр Ӕлбегаты Батрадз куыд фехъусын кодта, афтӕмӕй хӕстӕгдӕр рӕстӕг стационарон хайады сӕвӕрдзысты ног компьютерон томограф.

— Ныртӕккӕ цалцӕггонд цӕуы, уыцы ахсджиаг медицинон техникӕ кӕм сӕвӕрдзыстӕм, уыцы бынат. Ныридӕгӕн ӕххӕстгонд цӕуынц хъӕугӕ инженерон куыстытӕ дӕр, — загъта Ӕлбеджы-фырт.

Зындгонд куыд у, афтӕмӕй фӕстаг рӕстӕг хуыздӕр кӕны фыццаг къӕпхӕны медицинон ӕххуысы кусӕндӕтты техникон ифтонгад. Афтӕ, ӕрӕджы компьютерон томограф фӕзынд Ӕрыдоны районы Центрон рынчындоны. Ныр та ахӕм аппарат сӕвӕрдзысты Рахизфарсы районы Центрон рынчындоны дӕр. Уыцы техникӕ балхӕнынӕн фӕрӕзтӕ радих кодтой регионалон бюджетӕй. Уыимӕ, профилон ведомствӕйы минӕвӕртты ныхасмӕ гӕсгӕ, тагъд рӕстӕг компьютерон томографи скӕнӕн уыдзӕн Дзӕуджыхъӕуы 1-ӕм поликлиникӕйы дӕр.

Оперативон штабы архайджытӕ ӕркастысты ӕндӕр фарстытӕм дӕр. Афтӕ, видеоконференцийы бастдзинады фӕрцы республикӕйы иннӕ медицинон кусӕндӕтты сӕйраг дохтыртӕ дӕр радзырдтой сӕ ӕрвылбоны архайды тыххӕй. Уыимӕ, специалисттӕ куыд фӕбӕрӕг кодтой, афтӕмӕй, уавӕр кӕд вазыгджын у, уӕддӕр йӕ банывыл кӕнынӕн ӕппӕт хъӕугӕ мадзӕлттӕ арӕзт цӕуынц. Ӕмткӕй райсгӕйӕ, рынчындӕттӕ ӕмӕ поликлиникӕтӕ ӕххӕссынц рынчынтӕн ӕппӕтвӕрсыг медицинон ӕххуыс бакӕныныл.

Ӕмбырды архайджытӕ сӕрмагондӕй ӕрдзырдтой, республикӕйы хъӕууон районты ныртӕккӕ цы фелсырон-акушерон пункттӕ аразынц, уыдоны цӕттӕдзинадыл дӕр. Битарты Вячеславы ныхасмӕ гӕсгӕ, уыцы ахсджиаг социалон объекттӕ хъуамӕ байгом уой нысангонд ӕмгъуыдтӕм. Республикӕйы разамонӕг районты рынчындӕтты сӕйраг дохтыртӕн бахӕс кодта, цӕмӕй уыдоны ‘рдыгӕй дӕр ацы фарстмӕ уа ӕрвылбоны цӕстдард.

Зындгонд куыд у, афтӕмӕй фыццаг къӕпхӕны медицинон-санитарон ӕххуысы системӕйы хъомыс фӕбӕрзонддӕр кӕнынӕн регионалон программӕйы фӕлгӕты 2020 азы Цӕгат Ирыстоны сараздзысты 36 фелсырон ӕмӕ фелсырон-акушерон пункты.

Ӕмбырды архайдтой РЦИ-Аланийы Хицауады Сӕрдар Тускъаты Таймураз, республикӕйы Сӕргълӕууӕджы ӕххуысгӕнӕг ӕнӕниздзинад хъахъхъӕнынады фарстыты фӕдыл Тебиаты Сослан, ӕнӕниздзинад хъахъхъӕнынады министрад ӕмӕ иннӕ профилон ведомствӕты разамонджытӕ.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here