Ӕрыдоны район: йӕ абоны цард ӕмӕ йӕ фидӕн

0
47

Ирыстоны цӕрджытӕ ӕвдисӕн сты, фӕстаг азты нӕ републикӕйы цы стыр арӕзтӕдтӕ цӕуы, уыдонӕн. Паддзахадон ӕмӕ регионалон программӕты бындурыл Дзӕуджыхъӕуы ӕмӕ районты хъӕуты арӕзт цӕуынц скъолатӕ, Культурӕйы галуантӕ, амбулаторитӕ, спортивон ӕмӕ хиирхӕфсӕн фӕзтӕ, фӕндӕгтӕ ӕмӕ ӕндӕр ахсджиаг социалон объекттӕ.

Уӕдӕ Ӕрыдоны район дӕр фӕстейы нӕ баззад. Афӕдзы кӕроныл цавӕр бӕрӕггӕнӕнтимӕ сӕмбӕлдысты, адӕмы цард фӕнывылдӕр кӕныны хъуыддаджы сӕ къухы цы бафтыд, уый тыххӕй республикӕйы дзыллон хабархӕссӕг фӕрӕзты минӕвӕрттӕн пресс-туры рӕстӕг радзырдта Ӕрыдоны районы бынӕттон хиуынаффӕйады администрацийы сӕргълӕууӕг Мӕхӕмӕтты Зауырбег.

Рассветӕй — Фыййаджыбылмӕ

Фыццаг бабӕрӕг кодтам Рассветы хъӕу, стӕй та Фыййаджыбыл. Ацы дыууӕ хъӕуы дӕр ацы аз арӕзт ӕрцыдысты фелсырон пункттӕ.  Районы администрацийы сӕргълӕууӕг куыд загъта, афтӕмӕй куыстытӕ цӕуынц федералон программӕ «ӕнӕниздзинад»-ы фӕлгӕты. Рассвет стыр хъӕу нӕу, цӕры дзы ӕрмӕстдӕр 459 адӕймаджы. Нырмӕ дзы фелсырон пункт нӕ уыд. Гыццыл, ныллӕг, ӕвадат хӕдзары уыд хъӕуы администраци, посты хайад ӕмӕ фелсыры агъуыст дӕр. Ног фелсырон пункты бӕстыхай у райдзаст, ис дзы ӕппӕт фадӕттӕ дӕр хъӕуы цӕрджыты ӕнӕниздзинад хъахъхъӕнынӕн. Йе ‘нӕниздзинад хъыгдард кӕмӕн у, ӕмӕ йӕхи къахӕй йӕ бон ӕрбацӕуын кӕмӕн нӕу, уыдонӕн ӕвӕрд ӕрцыдысты пандустӕ. Сӕ арӕзтадмӕ сын бавнӕлдтой июлы ӕмӕ 1 октябрмӕ уыдысты цӕттӕ.

Рассветы администрацийы сӕргълӕууӕг Бирӕгъты Вадим куыд загъта, афтӕмӕй хъӕуы нӕй фелсыр, ӕмӕ уый фӕдыл цӕрджытӕ тыхстдзинӕдтӕ ӕййафынц.

— Нӕй нӕм фелсыр, нӕ хъӕуы цӕрджытӕн медицинон ӕххуыс чи кӕна, ахӕм специалисттӕ. Уымӕ гӕсгӕ, медицинон ӕххуыс кӕй бахъӕуы, уыдон фӕцӕуынц сыхаг хъӕутӕм кӕнӕ ӕрыдонмӕ.

Уый фӕдыл Ӕрыдоны районы администрацийы сӕргълӕууӕг Мӕхӕмӕтты Зауырбег зӕрдӕ бавӕрдта Рассветы хъӕуы сӕргълӕууӕгӕн, хӕстӕгдӕр рӕстӕг ацы фарст лыггонд кӕй ӕрцӕудзӕн, уымӕй.

Фыййаджыбылы цӕры 761 адӕймаджы. Хъӕуы цӕрджытӕ ӕхсызгонӕй ӕнхъӕлмӕ кӕсынц, ног фелсырон пункт йӕ куыст кӕд райдайдзӕн, уымӕ.

Нартыхъӕуӕй — Мичуринмӕ

Федералон программӕйы руаджы бындуронӕй цалцӕггонд ӕрцыд, Нартыхъӕуӕй Фыдыбӕстӕйы Стыр хӕсты чи фӕмард, уыдоны ӕфсымӕрон ингӕн.

Нырмӕ зындгонд уыд, ацы ӕфсымӕрон ингӕны ныгӕд ӕрцыдысты 200 ӕфсӕддоны онг, фӕлӕ, фӕстӕдӕр куыд сбӕрӕг, афтӕмӕй дзы разынд 600 ӕфсӕддонӕй фылдӕр. Ацы хъуыддаджы сын стыр ӕххуыс бакодта историк ӕмӕ архивтӕ иртасӕг Алинӕ Акоефф.

Дарддӕр дзыллон хабархӕссӕг фӕрӕзты минӕвӕрттӕ бабӕрӕг кодтой Нартыхъӕуы скъола. Уым ацы аз республикон национ проект «Ахуырад»-ы фӕлгӕты бындуронӕй цалцӕггонд ӕрцыд спортивон зал, дзаумӕттӕ ивӕн кабинеттӕ, ифтонггонд ӕрцыд ӕнӕмӕнгхъӕугӕ ӕрмӕгӕй. Ныр физкультурӕйы уроктӕ цӕудзысты хъарм, ӕппӕт фадӕттӕ дӕр кӕм ис, ахӕм спортивон залы.

— Нӕ спортивон зал ахӕм уавӕры уыдис, ӕмӕ-иу физкультурӕйы ахуыргӕнӕджы алы бон дӕр урокты фӕстӕ хъуыд пъолы зӕгӕлтӕ дзӕбугӕй хойын, цӕмӕй сыл сывӕллӕттӕ ма фӕкӕлой. Ацы аз нын ӕй бындуронӕй сцалцӕг кодтой, йӕ сӕр ын баивтой, йӕ бындур ын сфидар кодтой, йӕ къултӕ йын кирпичы онг систой, бауагътой йӕм хъармгӕнӕн системӕ, — загъта Нартыхъӕуы скъолайы директор Алхазты Людмилӕ.

Ацы аз ма республикон национ проект «Ахуырад»-ы фӕлгӕты капиталон ӕгъдауӕй цалцӕггонд ӕрцыд Мичурины хъӕуы скъола дӕр. Ивд ӕрцыд скъолайы сӕр, базылдысты йын йе ‘ддаг бакастмӕ. Уымӕй уӕлдай ма базылдысты скъолайы хӕрӕндонмӕ, сифтонг ӕй кодтой ӕппӕт хъӕугӕ техникӕйӕ.

Абалц кодтам Хъӕдгӕронмӕ

Ам ацы аз арӕзт ӕрцыд цалдӕр объекты. Скъолайы директор Цоколаты Заремӕ куыд фехъусын кодта, афтӕмӕй Хъӕдгӕроны скъола арӕзт ӕрцыд 86 азы размӕ. Хӕсты рӕстӕг дзы уыд немыцы госпитӕл. Уӕдӕй нырмӕ скъола капиталон цалцӕг никуы уыд. Ныр бындуронӕй баивтой скъолайы сӕр, хъармгӕнӕн системӕ, дуӕрттӕ. Скъолайы фӕзынд ӕмбырдтӕ аразӕн  зал дӕр. Уымӕй размӕ скъоладзаутӕ сӕ аивадон дӕсныдзинӕдтӕ ӕвдыстой хъӕуы Культурӕйы хӕдзары. Ныр скъоладзаутӕн ис ӕппӕт фадӕттӕ дӕр ахуыр кӕнынӕн ӕмӕ хи ирхӕфсынӕн. Скъолайӕн йе ‘ддаг бакаст дӕр аивта, зӕрдӕ дзы райы.

— Нӕ республикӕйы Сӕргълӕууӕг Битарты Вячеслав нӕ хъӕуы цӕрджытимӕ куы фембӕлд, уӕд ын нӕ куырдиат фехъусын кодтам. Уый нын зӕрдӕ бавӕрдта баххуыс кӕнынӕй, ӕмӕ йӕ дзырд сӕххӕст кодта. Уый тыххӕй дзы тынг сӕрыстыр стӕм. Стыр бузныг ын зӕгъӕм нӕ ахуыргӕнджыты ӕмӕ нӕ хъӕуы цӕрджыты номӕй, — бафтыдта ма йӕ ныхасыл скъолайы директор Цоколаты Заремӕ.

Хъӕдгӕроны ма капиталон ӕгъдауӕй цалцӕггонд  ӕрцыд Культурӕйы хӕдзар. Базылдысты йӕм бындуронӕй, баивтой йын йӕ сӕр, хъармгӕнӕн системӕ, сифтонг ӕй кодтой ног дзаумайӕ, музыкалон инструменттӕй. Кусынц дзы алыхуызон аивадон къордтӕ: ирон кӕфтытӕ, театралон, хор, оркестр, шахмӕтты, дала фӕндыр ӕмӕ ирон фӕндыры къордтӕ. Семӕ кусынц ӕмӕ сын сӕ дӕсныйад ӕнӕвгъауӕй лӕвар кӕнынц хореограф — Баллаты Эльбрус, дала фӕндырӕй сын амоны Мецъыты Джульеттӕ. Сывӕллӕтты аивадон рӕзтӕн дзы ис ӕппӕт фадӕттӕ дӕр.

Национ проект «Цӕрӕнуӕттӕ ӕмӕ горӕтаг алфамбылай»-ы фӕлгӕты Ӕрыдоны цалцӕггонд ӕрцыд Советты уынджы аллей. Йӕ дӕргъ у километры онг. Рӕсугъдгонд ӕрцыдысты фӕндаджы былтӕ, зӕронд асфальты бӕсты дзы  ӕвӕрд ӕрцыд брусчаткӕ, рӕсугъд бандӕттӕ, фӕзынд дзы цырӕгътӕ. Ныр аллей у ӕрыдойнӕгты уарзондӕр хиирхӕфсӕн бынат.

Дзыллон хабархӕссӕг фӕрӕзты минӕвӕрттӕн ма равдыстой, Ӕрыдоны ног спортивон комплексы арӕзтад куыд цӕуы, уый. Йӕ арӕзтадӕн федералон ӕмӕ регионалон бюджеттӕй радих кодтой 250 милуан сомы. Комплекс арӕзт ӕрцӕудзӕн иннӕ азы кӕронмӕ.

Ацы аз Ӕрыдоны районӕн ӕнтыстджын рауад. Цӕрджыты царды уавӕртӕ хуыздӕр кӕй кӕнынц, уый, ӕнӕмӕнгӕй, хорзӕрдӕм сахаддзӕн ӕппӕт районы социалон ӕмӕ экономикон уавӕрыл дӕр.

ХЪОЙБАЙТЫ Галинӕ

Къамтӕ систа ХЪАЙЫРТЫ Дианӕ

ОСТАВЬТЕ ОТВЕТ

Please enter your comment!
Please enter your name here