Сергей Зихов — “Азы волонтер”

0
30

Мӕскуыйы онлайн-фӕткмӕ гӕсгӕ хыгъд ӕрцыдысты ӕппӕтуӕрӕсеон конкурс «Уӕрӕсейы бархион — 2020»-ы бӕрӕггӕнӕнтӕ. Конкурсы уӕлахиздзаутӕ ӕмӕ лауреаттӕн арфӕ ракодта Президент Владимир Путин.

Ӕппӕтуӕрӕсеон конкурсы бӕрӕггӕнӕнтӕ хыгъд ӕрцыдысты 5 декабры — уӕд нӕ бӕстӕйы бӕрӕггонд цӕуы Бархионы бон.

Цӕгатирыстойнӕгтӕн уӕлдай ӕхсызгон уыдзӕн, конкурсы номинацитӕй иуы — «Азы волонтер»-ы уӕлахиздзау не ‘мзӕххон, тагъд медицинон ӕххуысы службӕйы дохтыр Сергей Зихов кӕй ссис, уый.

Коронавирусы пандеми куы райдыдта, уӕд фыццаг бонтӕй фӕстӕмӕ Сергей бацыд карз низимӕ тохы. Йӕхӕдӕг дӕр фӕрынчын уыцы низӕй, фӕлӕ йӕхи куыддӕр адзӕбӕх кодта, афтӕ та йӕ куысты балӕууыд. Уыимӕ, ӕрыгон дохтыр кӕны ахадгӕ ӕхсӕнадон архайд дӕр. Зӕгъӕм, Сергейы хъӕппӕрисӕй дыууӕ азы размӕ республикӕйы ӕххӕст кӕнын райдыдтой проект «Мобилон волонтертӕ». Уыцы проекты архайӕг ӕрыгон дохтыртӕ ӕмӕ иннӕ медицинон специалисттӕ бархионты хуызы архайынц ӕппӕтадӕмон диспансеризацийы мадзӕлтты республикӕйы районты. Фӕсивӕд ӕххӕст кӕнынц ӕндӕр ӕхсӕнадон куыстытӕ дӕр.

Ныр, ӕппӕтуӕрӕсеон конкурсы уӕлахиздзау суӕвгӕйӕ, Сергейӕн фадат уыдзӕн йӕ проекты архайд ноджы фӕхъомысджындӕр кӕнынӕн, уымӕн ӕмӕ сӕрмагонд гранты хуызы райсдзӕн 2 милуан сомы.

Сергей Зихов ӕмӕ конкурсы иннӕ уӕлахиздзаутӕн арфӕ ракодта Владимир Путин. «Бархионты змӕлд Уӕрӕсейы уӕрӕхӕй-уӕрӕхдӕр кӕны. Ныртӕккӕ 15 милуан адӕймагӕй фылдӕр архайынц алыхуызон ахсджиаг ӕхсӕнадон акцитӕ ӕмӕ ӕндӕр ахӕм мадзӕлтты — уыдон алкӕддӕр сты ӕххуысхъуаг адӕмы фарсмӕ», — фӕнысан кодта Уӕрӕсейы Президент.

Ӕмткӕй райсгӕйӕ, конкурс «Уӕрӕсейы бархион — 2020»-ы кӕронбӕттӕны архайдтой алыхуызон социалон 210 проекты автортӕ. Конкурсы уӕлахиздзауты ‘хсӕн грантты хуызы адих кодтой 90 милуан сомы бӕрц.

ОСТАВЬТЕ ОТВЕТ

Please enter your comment!
Please enter your name here