Наркотикты ӕнӕзакъон зилдухӕн — цӕлхдур!

0
32

РЦИ-Аланийы Сӕргълӕууӕг Битарты Вячеслав дзы сӕрдариуӕг кодта, афтӕмӕй уыд Наркотикты ӕнӕзакъон зилдухимӕ тохы сӕрмагонд республикон къамисы ӕмбырд. Къамисы уӕнгтӕ бахыгътой ацы азы куысты рагагъоммӕйы бӕрӕггӕнӕнтӕ, стӕй фӕбӕлвырд кодтой фидӕн азы архайды сӕйраг фарстытӕ.

Ныхасы архайдтой Цӕгат Ирыстоны Парламенты Сӕрдар Алексей Мачнев, РЦИ-Аланийы сӕйраг федералон инспектор Челӕхсаты Владимир, Къамисы аппараты разамонӕг Луизӕ Лебедева, видеоконференцийы бастдзинады фӕрцы та — министрадтӕ, барадхъахъхъӕнӕнг оргӕнтӕ ӕмӕ ӕхсӕнадон организациты разамонджытӕ.

Ӕмбырды раныхас кодта Цӕгат Ирыстоны Мидхъуыддӕгты министрады Наркотикты зилдухмӕ цӕстдарды управленийы хицау Хынцӕгты Нодар. Уый бӕстон ӕрлӕууыд, сӕрмагонд оперативон-профилактикон операци «Мак-2020» республикӕйы куыд ӕххӕстгонд цыд, ууыл. Хынцӕджы-фырты ныхасмӕ гӕсгӕ, операцийы мадзӕлттӕ ӕххӕст кӕнгӕйӕ, ӕнӕзакъон зилдухӕй ист ӕрцыд зайӕгой наркотикон буаргъӕдты 46 килограммы. Уымӕй уӕлдай, барадхъахъхъӕнӕг оргӕнты кусджытӕ рабӕрӕг кодтой, хъӕддаг гӕны къутӕртӕ кӕм зад, ахӕм 87 бынаты (сӕ иумӕйаг фӕзуат — 28 гектары). Ӕппӕт уыцы бынӕттӕ дӕр наркотикон зайӕгойӕ бындзарӕй асыгъдӕг кодтой. Хынцӕгты Нодары ныхасмӕ гӕсгӕ, операцийы мадзӕлттыл кусгӕйӕ, Мидхъуыддӕгты министрады службӕгӕнджытӕ ӕнгом ӕмархайд кодтой, фарстмӕ бардарӕг иннӕ ведомствӕтӕ ӕмӕ барадхъахъхъӕнӕг оргӕнты минӕвӕрттимӕ. Хынцӕджы-фырт куыд бафиппайдта, афтӕмӕй уыцы иумӕйаг ӕнгом ӕмархайд хорзӕрдӕм ахады сӕвзӕргӕ уавӕрыл.

Ацы фарстыл ныхас адарддӕр кодта Рахизфарсы районы сӕргълӕууӕг Фрайты Сослан. Уый дӕр бӕстон радзырдта, операци «Мак-2020»-ы фӕлгӕты районы цы куыст бакодтой, уый тыххӕй. Йӕ ныхасмӕ гӕсгӕ, азы дӕргъы сӕрмагонд кусӕг къордтӕ рабӕрӕг кодтой, хъӕддаг гӕн кӕм зад, ахӕм бынӕтты 25 гектары. Абоны онг ӕппӕт уыцы бынӕттӕ наркотикон зайӕгойтӕй асыгъдӕг кодтой.

Лыггӕнинаг фарстӕн хатдзӕгтӕ кӕнгӕйӕ, Битарты Вячеслав куыд фӕнысан кодта, афтӕмӕй наркотикты ныхмӕ профилактикон куыстмӕ здахын хъӕуы фӕсивӕды ӕргом. Йӕ ныхасмӕ гӕсгӕ, фӕсивӕды минӕвӕрттӕй кӕд искӕмӕн зындгонд сты наркотикты ӕнӕзакъон зилдухы цаутӕ, уӕд уыдон уый тыххӕй хъуамӕ ӕвӕстиатӕй хъусын кӕной барадхъахъхъӕнӕг оргӕнтӕм.

Наркотикон буаргъӕдты ӕнӕзакъон зилдухы ныхмӕ республикӕйы дзыллон информацийы фӕрӕзтӕ цы рухстауӕн куыст кӕнынц, уый тыххӕй уыд йӕ ныхас РЦИ-Аланийы Мыхуыр ӕмӕ дзыллон коммуникациты комитеты сӕрдар Фидараты Юрийӕн.

Фидары-фырт куыд радзырдта, афтӕмӕй комитеты цур арӕзт ӕрцыд сӕрмагонд экспертон къамис.  Уыцы структурӕйы уӕнгтӕ бӕстон аргъ скӕнынц наркотикты ӕнӕзакъон зилдухы ныхмӕ информацион ӕрмӕджытӕн. Уымӕй уӕлдай, комитеты сӕрдары ныхасмӕ гӕсгӕ, наркотикты ӕнӕзакъон зилдухӕн гӕрӕнтӕ ӕвӕрыны паддзахадон программӕйы фӕлгӕты кусын райдыдта сӕрмагонд Интернет-портал «Живой город». Ацы бонты хыгъд ӕрцӕудзысты наркотикты ӕнӕзакъон зилдухы ныхмӕ социалон плакатты республикон конкурсы бӕрӕггӕнӕнтӕ дӕр.

Комитет ӕмӕ дзыллон хабархӕссӕг фӕрӕзтӕ аразынц ӕндӕр мадзӕлттӕ дӕр, цӕмӕй адӕммӕ бӕстондӕр хӕццӕ кӕной, наркотикон буаргъӕдтӕ адӕймаджы ӕнӕниздзинад ӕмӕ цардӕн цас тӕссаг сты, стӕй уыцы фӕрӕзты ӕнӕзакъон зилдухӕн гӕрӕнтӕ иумӕйаг хъарутӕй ӕвӕрын кӕй хъӕуы, уыцы хабӕрттӕ.

Цӕгат Ирыстоны Сӕргълӕууӕг профилон ведомствӕйы разамонӕгӕн бахӕс кодта, цӕмӕй уыцы информацион-ӕмбарынгӕнӕн куыст ноджы фӕахадгӕдӕр кӕной, уыимӕ, уӕрӕхдӕр пайда кӕнын хъӕуы социалон хызӕгты фадӕттӕй дӕр.

Къамисы уӕнгтӕ сӕрмагондӕй ӕрдзырдтой, наркотикон буаргъӕдтӕ кӕм ис, уыцы хостӕ афтекты куыд уӕй кӕнынц, уыцы уагӕвӕрд ӕнаиппӕй ӕххӕст кӕныныл дӕр.

Федералон агентад «Росздравнадзор»-ы цӕгатирыстойнаг республикон управленийы разамонӕг Ольгӕ Давыдова куыд радзырдта, афтӕмӕй афтекты архайды цӕстдарды мадзӕлттӕ ӕххӕст кӕнгӕйӕ, сӕрмагонд къорды уӕнгтӕ рабӕрӕг кодтой алыхуызон ӕгъдаухӕлдтытӕ. Зӕгъӕм, хостӕ уӕй кӕныны уагӕвӕрдтӕ фехӕлдтой 3 афтечы кусджытӕ. Ӕппӕт цауты тыххӕй дӕр аххосджынтӕ административон ӕгъдауӕй ӕфхӕрд ӕрцыдысты. Уымӕй уӕлдай, «Росздравнадзор»-ы республикон управленийы домӕнмӕ гӕсгӕ, ӕхгӕд ӕрцыдысты, наркотикон хостӕ кӕм уӕй кодтой, 15 ахӕм сайты.

Боны фӕткы фарстыты фӕдыл ныхас адарддӕр кодта Цӕгат Ирыстоны ӕнӕниздзинад хъахъхъӕнынады министры хӕдивӕг Томайты Тамарӕ. Уый куыд фӕнысан кодта, афтӕмӕй 2018 ӕмӕ 2019 азты иуцасдӕр фӕкъаддӕр, наркотикон хостӕм ӕмхиц чи у, уыцы адӕмы нымӕц (5,4 процентӕй 4,3 проценты онг). Министры хӕдивӕджы бӕрӕггӕнӕнтӕм гӕсгӕ, ацы аз ахӕм адӕмы бӕрц ноджыдӕр фӕкъаддӕр 3,7 проценты онг.

Къамисы уӕнгтӕ куыд фӕнысан кодтой, афтӕмӕй фарстыл бӕрнон ӕппӕт ведомствӕты минӕвӕртты ӕнгом ӕмархайды фӕрцы уавӕр хуыздӕрӕрдӕм фӕивӕн ис.

Ӕмбырды архайджыты докладтӕн хатдзӕгтӕ кӕнгӕйӕ, Битарты Вячеслав профилон ведомствӕты разамонджытӕн бахӕс кодта, цӕмӕй наркотикты ӕнӕзакъон зилдухы ныхмӕ куыст уа ноджы ахадгӕдӕр ӕмӕ хъомысджындӕр.

Кӕронбӕттӕны ӕмбырды архайджытӕ ӕрдзырдтой 2021 азы къамисы куысты рагагъоммӕ пъланыл.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here