Ног хӕдтулгӕтӕ райстой

0
37

Знон РЦИ-Аланийы Социалон фӕдзӕхстады регионалон фонды хайады кӕрты ӕрцыдис ӕхсызгон хабар.

Уӕрӕсейы Социалон фӕдзӕхстады фонды уагӕвӕрдмӕ гӕсгӕ уыцы бон ног автомобилтӕ «Лада-гранта»-тӕ лӕвӕрд ӕрцыд, йе ‘нӕниздзинад куысты кӕмӕн фӕцудыдта, ахӕм цыппар адӕймагӕн: Сечъынаты Вадим, Милько Роман, Хъоцыты Барис ӕмӕ Бобылев Дмитрийӕн.

Автомобилтӕ инвалидтӕн лӕвар кӕныны мадзалы уыдысты: РЦИ-Аланийы Хицауады Сӕрдар Тускъаты Таймураз, Уӕрӕсейы федералон сӕрмагонд инспектор Челӕхсаты Владимир, Цӕгат Ирыстоны Социалон фӕдзӕхстады регионалон хайады разамонӕг Айларты Зӕлинӕ.

Тускъаты Таймураз зӕрдиаг арфӕ ракодта Айларты Зӕлинӕ ӕмӕ йе ‘мкусджытӕн: «Сымах уӕ профессионалон хӕстӕ иттӕг хорз кӕй ӕххӕст кӕнут, уый тыххӕй стут арфӕйы аккаг. Мӕнӕ та ныр дӕр цы ӕхсызгон мадзалы сӕмбӕлдыстӕм, уый дзурӕг у, ӕххуысхъуаг адӕмыл зӕрдиагӕй кӕй узӕлут, ууыл, ӕмӕ уын мӕ зӕрдӕ зӕгъы царды хорзӕхтӕй хайджын уӕвын. Ноджы фылдӕр уын ӕнтысӕд, цы хорздзинӕдтӕ кӕнут, уыцы фарны хъуыддӕгты!»

Айларты Зӕлинӕ, йе ‘мкусджытӕ ӕмӕ, автомобилтӕ лӕвӕрд кӕмӕн цыдысты, уыдонӕн зӕрдиаг арфӕ ракодта Челӕхсаты Владимир дӕр.

Айларты Зӕлинӕ, автомобилты дӕгъӕлтӕ сӕ хицӕуттӕн дӕтгӕйӕ, загъта: «Нӕ зӕрдӕ уын зӕгъы, ацы хӕдтулгӕтыл ӕдыхстӕй куыд цӕуат, ӕмӕ царды хорзӕхтӕй хайджын куыд уат. Мах архайӕм, куысты уӕвгӕйӕ, йе ‘нӕниздзинад хъыгдард кӕмӕн баййӕфта, ӕмӕ афтӕмӕй инвалид чи ссис, уыцы адӕймӕгтӕн, закъонмӕ гӕсгӕ цы ‘мбӕлы, уый аразын. Уыцы фӕрӕзтӕй иу у, авд азӕй авд азмӕ ног автомобилтӕ дӕттын нӕ инвалидтӕн, ӕмӕ ууыл дарддӕр кусдзыстӕм».

Машинӕтӕ райсӕг инвалидтӕ зӕрдиаг арфӕ ракодтой сӕ хӕрзгӕнджытӕн. Фӕллойы ветеран ӕмӕ инвалид  Сечъынаты Вадим загъта: «ӕз уыдтӕн аразӕг ӕмӕ куысты рӕстӕг бӕллӕхы куы бахаудтӕн, уӕдӕй фӕстӕмӕ ныр исын цыппӕрӕм машинӕ. Раст зӕгъгӕйӕ, фыццаг дыууӕ машинӕйы мын мӕхи ‘хцайӕ балхӕнынӕн баххуыс кодтой, уымӕн ӕмӕ уӕды рӕстӕг ӕндӕр гӕнӕн нӕ уыд. Ныр дыккаг хатт машинӕ лӕвар кӕй исын, уый тыххӕй стыр бузныг зӕгъын, махыл чи тыхсы ӕмӕ нын ахӕм хорздзинад чи кӕны, уыцы адӕймӕгтӕн!»

Ацы ныхӕстӕм ма сӕ бузныджы арфӕтӕ бафтыдтой Роман Милько, Дмитрий Бобылев ӕмӕ Хъоцыты Барис.

Баскаты Уырызмӕг

Къамтӕ сита Хъайырты Дианӕ

ОСТАВЬТЕ ОТВЕТ

Please enter your comment!
Please enter your name here