Битарты Вячеслав: «Национ проекттӕ ӕмӕ паддзахадон программӕтӕ — ӕхсӕнады фӕрныгадӕн»

0
33

Фыццаградон национ проекттӕ ӕмӕ сӕрмагонд паддзахадон программӕты фӕлгӕты республикӕйы азы кӕронмӕ цы объекттӕ саразын хъӕуы, уыдон ӕмбӕлгӕ ӕмгъуыдтӕм хъуамӕ лӕвӕрд ӕрцӕуой эксплуатацимӕ.

Ахӕм амынддзинад РЦИ-Аланийы Сӕргълӕууӕг Битарты Вячеслав радта республикӕйы Хицауады уӕнгтӕн, профилон ведомствӕтӕ ӕмӕ ӕндӕр цӕстдарӕг структурӕты разамонджытӕн. Ӕппӕт уыцы фарстытыл бӕстон ныхас рауад фыццаградон национ проекттӕ ӕмӕ сӕрмагонд паддзахадон программӕтӕ ӕххӕст кӕныны фарстыты фӕдыл регионалон штабы радон ӕмбырды.

Ныхасы архайдтой Цӕгат Ирыстоны Хицауады Сӕрдары фыццаг хӕдивӕг Сӕбӕтхъуаты Ӕхсарбег, республикӕйы премьер-министры хӕдивджытӕ Иринӕ Азимова, Фадзайты Ӕхсарбег ӕмӕ Кӕсӕбиты Игор, республикӕйы финансты министры фыццаг хӕдивӕг Оксанӕ Карова, экономикон рӕзты министр Томайты Хъазыбег, видеоконференцийы бастдзинады фӕрцы та — контролон-цӕстдарӕг оргӕнты, энергетикон компанитӕ ӕмӕ муниципалон скондты разамонджытӕ, стӕй ӕндӕр бӕрнон кусджытӕ.

Фембӕлды райдайӕны Битарты Вячеслав куыд фӕбӕрӕг кодта, афтӕмӕй национ проекттӕ ӕмӕ сӕрмагонд паддзахадон программӕты фӕрцы фӕстаг азты республикӕйы арӕзт цӕуы бирӕ ахсджиаг социалон объекттӕ. Ӕрмӕст ацы азы кӕронмӕ уыдонӕй хъуамӕ сцӕттӕ уа 46 алыхуызон нысаниуӕджы кусӕндоны. Сӕ нымӕцы — скъолатӕ, рӕвдауӕндӕттӕ, фелсырон-акушерон пункттӕ, спортивон фӕзтӕ ӕмӕ афтӕ дарддӕр.

— Ӕхсӕнады размӕ цы бирӕ лыггӕнинаг фарстытӕ ис, уыдон аиуварс кӕныны хъуыддаджы уӕлдай ахадындзинад ис фыццаградон национ проекттӕ ӕмӕ сӕрмагонд паддзахадон программӕтӕн. Паддзахад зынгӕ фылдӕр фӕрӕзтӕ дих кӕны регионты социалон инфраструктурӕйы дарддӕры райрӕзтӕн. Фӕлӕ, адӕмы цард цас фӕрогдӕр ӕмӕ хуыздӕр уыдзӕн, уый бирӕ аразгӕ у, бынӕтты кусӕг структурӕтӕ уӕлдӕр амынд проекттӕ ӕмӕ программӕтӕ цас бӕстон ӕххӕст кӕнынц, уымӕй. Ӕмӕ ӕппӕт уыцы ӕууӕлтӕ хорз хъуамӕ ӕмбарой, ахсджиаг социалон объектты арӕзтад кӕй бӕрны ис, ӕппӕт уыцы разамонджытӕ ӕмӕ иннӕ специалисттӕ дӕр. Махӕн не ‘ппӕтӕн дӕр сӕйрагдӕр нысан хъуамӕ уа не ‘мзӕххонты хуыздӕр цардыл кусын. Уый та къухы ӕфтдзӕн, химӕрайст хӕстӕ ӕнаиппӕй куы ӕххӕст кӕнӕм, ӕрмӕстдӕр уӕд, — фӕнысан кодта Битарты Вячеслав.

Уый фӕстӕ ӕмбырды раныхас кодта арӕзтад ӕмӕ архитектурӕйы министр Тотыккаты Артур. Ведомствӕйы разамонӕг йе ‘ргом аздӕхта, контролон-цӕстдарӕг оргӕнтӕ подрядон организациты архайды цы аиппытӕ рабӕрӕг кодтой, уыдон аиуварс кӕныныл цы куыст цӕуы, уымӕ. Министры ныхасмӕ гӕсгӕ, ӕмткӕй райсгӕйӕ, подрядчиктӕ сӕ хӕстӕ бӕстон ӕххӕст кӕнынц. Уыимӕ, бӕрӕггонд хъуагдзинӕдтӕ дӕр афойнадыл аиуварс кӕнынц.

Фӕлӕ иуӕй-иу къуыхцытӕ дӕр ис. Зӕгъӕм, алы аххосӕгтӕм гӕсгӕ цалдӕр ног арӕзт объекты ныронг нӕма баиу кодтой газы хӕтӕлтӕм. Уыдоны нымӕцы — Сывӕллӕтты республикон клиникон рынчындоны поликлиникӕ, стӕй цалдӕр хъӕууон фелсырон-акушерон пункты. Республикӕйы Сӕргълӕууӕг профилон ведомствӕты разамонджытӕн бахӕс кодта, цӕмӕй уыцы фарст лыггонд ӕрцӕуа 10 боны ӕмгъуыдмӕ.

Ӕмбырды архайджытӕ сӕрмагондӕй ӕрдзырдтой, республикӕйы районты спортивон ӕмӕ хъазӕн фӕзтӕ куыд арӕзт цӕуынц, ууыл дӕр. Ацы хъуыддагмӕ дӕр цӕстдарӕг ведомствӕтӕ ӕрхастой иуӕй-иу фаутӕ. Афтӕ, зӕгъӕм, Мӕздӕджы районы бынӕттон хиуынаффӕйады администраци ӕппӕт хъӕугӕ документтӕ афойнадыл кӕй нӕ бацӕттӕ кодта, уый аххосӕй подрядчик иуцасдӕр фӕкъуылымпы, Предгорнӕйы хъӕуы бирӕкъабазджын хъазӕн фӕзы арӕзтады. Иуӕй-иу къуыхцытӕ ис ӕрыдон ӕмӕ Алагиры районы Црауы хъӕуы спортивон фӕзты арӕзтӕдты дӕр. Бӕрӕг куыд у, афтӕмӕй ацы социалон объекттӕ арӕзт цӕуынц регионалон проект «Спорт — царды фӕтк»-ы бындурыл. Республикӕйы разамонӕг профилон ведомствӕтӕ ӕмӕ муниципалитетты минӕвӕрттӕй бадомдта, цӕмӕй уыцы спортивон фӕзты арӕзтад ахицӕн уа 20 декабрмӕ.

Ӕмбырды архайджытӕ куыд фӕнысан кодтой, афтӕмӕй подрядон организацитӕй алчи бӕрнонӕй не ‘ххӕст кӕны йӕ бадзырдон хӕстӕ. Уыцы фарстыл дзургӕйӕ, Битарты Вячеслав куыд фӕнысан кодта, афтӕмӕй уыдонӕй иудадзыгдӕр домын хъӕуы дзуапп.

Ныхасӕн хатдзӕгтӕ кӕнгӕйӕ, Битарты Вячеслав ӕмбырды архайджыты ӕргом иу хатт ма аздӕхта, социалон инфраструктурӕйы ӕппӕт нысангонд объекттӕ дӕр афойнадыл ӕмӕ ӕмбӕлгӕ хӕрзхъӕддзинадимӕ арӕзт кӕй хъуамӕ ӕрцӕуой, уымӕ.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here