«Мамысон»-ӕн — специалисттӕ, адӕмӕн — кусӕн бынӕттӕ

0
18

Видеоконференцийы бастдзинады фӕрцы уыд Цӕгат Кавказы федералон зылды Уӕрӕсейы Федерацийы Президенты ӕххӕстбарджын минӕвары цур советы радон ӕмбырд.

Президенты минӕвар Юрий Чайка сӕрдариуӕг кӕм кодта, уыцы фембӕлды архайджытӕ ӕрдзырдтой, Цӕгат Кавказы регионты фӕллойы базарады цы уавӕр сӕвзӕрд, стӕй адӕмӕн ног куысты бынӕттӕ дӕттыны нысанимӕ хицаудзинады оргӕнтӕ ӕмӕ бӕрнон ведомствӕтӕ цы уӕлӕмхасӕн мадзӕлттӕ аразынц, ууыл.

Ӕмбырды райдайӕны Юрий Чайка куыд фӕнысан кодта, афтӕмӕй федералон зылды карздӕр фарстытӕй иу у ӕгуыстдзинады бӕрзонд къӕпхӕн.

— Пандемийы ӕууӕлты фӕллойы базарады уавӕр ноджы карздӕр фӕци —афтӕ, цалдӕр мӕймӕ Цӕгат Кавказы регионты ӕгуыст адӕмы нымӕц 5 хатты фӕфылдӕр. Уыимӕ, рохгӕнгӕ нӕу, ӕгуыстдзинады къӕпхӕн ӕппӕты бӕрзонддӕр кӕм у, нӕ федералон зылды субъекттӕ уыцы 10 уӕрӕсейаг регионы номхыгъды рагӕй кӕй сты, уый дӕр. Ӕппӕт уыцы ӕууӕлтӕ хынцгӕйӕ, мах уӕлӕмхасӕн мадзӕлттӕ снысан кӕнӕм, цӕмӕй адӕмӕн фӕзына кусӕн бынӕттӕ. Ӕмӕ уыцы архайды сӕйрагдӕр ӕргом аздахын хъӕуы фӕсивӕдмӕ. Цӕгат Кавказы федералон зылды паддзахад цы социалон-экономикон политикӕ ӕххӕст кӕны, уым хъуамӕ сӕрмагонд ӕргом здӕхт цӕуа ӕгуыстдзинады къӕпхӕн ныллӕгдӕр кӕныны хъуыддагмӕ, — загъта Президенты минӕвар.

Фӕллойы базарады уавӕр фӕнывылдӕр кӕныны, адӕмӕн ног кусӕн бынӕттӕ дӕттыны нысанимӕ бынӕтты цы арӕзт цӕуы, уый тыххӕй дзуаппон докладтӕ скодтой регионты разамонджытӕ.

Уыцы куыст Цӕгат Ирыстоны цавӕр фӕткы бындурыл арӕзт цӕуы, уый тыххӕй бӕстон радзырдта РЦИ-Аланийы Сӕргълӕууӕг Битарты Вячеслав. Йӕ ныхасмӕ гӕсгӕ, «2014-2024 азты Цӕгат Ирыстоны цӕрджытӕн уӕлӕмхасӕн куысты бынӕттӕ дӕттыны» сӕрмагонд программӕйы фӕлгӕты ныридӕгӕн кусын райдыдтой 2 мин адӕймаджы бӕрц, 240 адӕймаджы та фӕбӕрзонддӕр кодтой сӕ дӕсныдзинад, кӕнӕ райстой ног дӕсныйӕдтӕ. Фӕллойы базарады уавӕр фӕнывылдӕр кӕныны ацы ӕмӕ иннӕ мадзӕлттӕ ӕххӕст кӕнынӕн республикӕйы ӕрвылаз дӕр дихгонд ӕрцӕуы ӕппынкъаддӕр 20 милуан сомы бӕрц.

Битарты Вячеслав куыд фехъусын кодта, афтӕмӕй ӕгуыстдзинады къӕпхӕн фӕкъаддӕр кӕныныл республикӕйы куыст цӕуы бӕлвырд пъланты бындурыл. Уымӕн ахъазгӕнӕг сты регионы дарддӕры социалон-экономикон райрӕзты программӕтӕ ӕмӕ проекттӕ.

— Адӕмӕн уӕлӕмхасӕн куысты бынӕттӕ дӕттыны хъуыддаджы хорз ахадындзинад ис мӕгуырдзинадимӕ тохы программӕйӕн дӕр. Уыцы проект республикӕ фӕлварӕны хуызы ӕххӕст кӕнын райдыдта 2019 азы. Зындгонд куыд у, афтӕмӕй хӕстӕгдӕр азты йӕ куыст хъуамӕ райдайа хӕххон-рекреацион комплекс «Мамысон» дӕр. Уыцы туристон кластеры кусдзысты 2 мин адӕймагӕй фылдӕр. Уыцы ӕууӕл хынцгӕйӕ, мах ныридӕгӕн профориентацион куыст райдыдтам фидӕны курортӕн хъӕугӕ специалисттӕ цӕттӕ кӕныны хъуыддаджы. Алагиры ӕмӕ ӕрӕфы районты та сарӕзтам фыццаградон экономикон райрӕзты тӕлмытӕ — уыцы структурӕты сӕйрагдӕр нысан дӕр у бынӕтты амалхъомадон архайд рапарахат кӕнын, цӕмӕй дӕрддзӕф хъӕуты цӕрджытӕн фӕзына уӕлӕмхасӕн кусӕн бынӕттӕ. Уыцы экономикон тӕлмыты амалхъомадон архайд рапарахат кӕныны тыххӕй ныридӕгӕн бадзырдтӕ бафыстам 5 инвесторимӕ. Уыдон сӕхимӕ хӕс исынц сӕ фидӕны компаниты 400 кусӕн бынаты байгом кӕнын, — радзырдта Битары-фырт.

Уыимӕ, Цӕгат Ирыстоны Сӕргълӕууӕджы ныхасмӕ гӕсгӕ, фӕллойы базары уавӕр фӕхуыздӕр кӕныны нысанимӕ республикӕйы Хицауад ӕмӕ Фӕллойы федералон агентад сфидар кодтой иумӕйаг уӕлӕмхасӕн мадзӕлтты пълан. Ахӕм ӕмархайды фӕрцы ӕхсӕнадон куыстытыл бафтыдтой 470 адӕймагӕй фылдӕр. Уыцы пъланы бындурыл профилон ведомствӕтӕ ӕххӕст кӕнынц ӕндӕр ахъазгӕнӕн мадзӕлттӕ дӕр.

Уымӕй уӕлдай, республикӕйы сӕрмагонд ӕргом здӕхт цӕуы чысыл ӕмӕ рӕстӕмбис амалхъомады компанитӕн ӕххуысы мадзӕлттӕм. Амалхъомты проектты царды рауадзынӕн сӕрмагонд фӕрӕзтӕ дих кӕны Чысыл ӕмӕ рӕстӕмбис амалхъомады кусӕндӕттӕн ӕххуысы фонд. Афтӕ, азы райдайӕнӕй нырмӕ ӕрмӕст чысыл куыстуӕттӕн фонд льготон кредитты хуызы радих кодта 129 милуан сомӕй фылдӕр. Ацы фонд ӕмӕ иннӕ структурӕтӕ ӕххӕст кӕнынц ӕххуысы ӕндӕр мадзӕлттӕ дӕр. Уыимӕ, бӕлвырд цӕстдард ис, коронавирусы пандемийы аххосӕй хъыгдард чи баййӕфта, уыцы кусӕндӕтты уавӕрмӕ дӕр.

Советы уӕнгтӕ се ‘ргом аздӕхтой, Уӕрӕсейы Федерацийы Президент Владимир Путины «2024 азы онг Уӕрӕсейы Федерацийы национ нысантӕ ӕмӕ дарддӕры райрӕзты стратегион фӕндӕтты тыххӕй» Указы уагӕвӕрдтӕ бынӕтты куыд ӕххӕстгонд цӕуынц, уымӕ дӕр.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here