Битарты Вячеслав: «Ахсджиаг у, цӕмӕй райдайгӕ амалхъомтӕн ӕппӕтвӕрсыг ӕххуыс уа»

0
36

Чысыл ӕмӕ рӕстӕмбис амалхъомады дарддӕры райрӕзтӕн цы уӕлӕмхасӕн мадзӕлттӕ саразын хъӕуы? Ацы къабазы уавӕр фӕхуыздӕр кӕнынӕн паддзахад цавӕр ӕххуысы хай дих кӕны? Ацы ӕмӕ ӕндӕр ахсджиаг фарстытыл ныхас рауад РЦИ-Аланийы Сӕргълӕууӕджы цур Экономикӕйы, инновацитӕ ӕмӕ ерысхъомдзинады политикӕйы фарстыты фӕдыл советы радон ӕмбырды.

Фембӕлд гом кӕнгӕйӕ, Битарты Вячеслав ӕмбырды архайджыты зӕрдыл ӕрлӕууын кодта, ацы структурӕйы архайд регионы дарддӕры райрӕзты программӕтӕ ӕмӕ проекттӕн бӕстон аргъгӕнӕг кӕй вӕййы, хицаудзинады оргӕнты, амалхъомадон компаниты, ахуыргӕндтӕ ӕмӕ иртасджыты хъарутӕ ӕрбангомдӕр кӕныныл кӕй кусы, уыдӕттӕ.

— Советы архайды сӕйрагдӕр ӕргом здӕхт цӕуы, республикӕйы экономикӕйыл хорзӕрдӕм чи сахаддзӕн, чысыл ӕмӕ рӕстӕмбис амалхъомады къабазы размӕцыдӕн ног хъомыс чи ратдзӕн, уыцы хъӕппӕристӕ ӕмӕ проекттӕ цардмӕ рауадзынмӕ. Ӕмӕ ацы куысты уӕлдай ахсджиаг у, цӕмӕй райдайгӕ амалхъомтӕн ӕппӕтвӕрсыг паддзахадон ӕххуыс уа. Уыдонӕн сӕ равзӕрст фӕндаг ӕнцон нӕу, хъӕуы сыл аудын, цӕмӕй сӕ къӕхтыл фидар слӕууой. Кӕй зӕгъын ӕй хъӕуы, фыццаградон ӕххуыс сӕ хъӕуы юридикон ӕмӕ организацион фарстыты дӕр, цӕмӕй сӕ архайд рапарахат кӕной, — загъта Битары-фырт.

Республикӕйы разамонӕджы хъуыдымӕ гӕсгӕ, уыцы нысантыл бӕлвырд куыст кӕны дзӕуджыхъӕуккаг центр «Мӕ бизнес». Уыцы структурӕ байгом чысыл ӕмӕ рӕстӕмбис амалхъомадӕн ӕххуысы фыццаградон национ проекты фӕлгӕты. Ӕмӕ йын йӕ архайд апарахат кӕнын хъӕуы республикӕйы районты дӕр.

Республикӕйы экономикон рӕзты министр Томайты Хъазыбег йӕ раныхасы куыд фӕбӕрӕг кодта, афтӕмӕй ныридӕгӕн уыцы куыст райдыдтой. Йӕ ныхасмӕ гӕсгӕ, центры дӕлхайӕдтӕ республикӕйы районты гом кӕнын райдыдтой июнӕй фӕстӕмӕ.

— Ныридӕгӕн уал центр «Мӕ бизнес»-ы специалисттӕн дӕрддзӕгмӕ кусӕн бынӕттӕ снысан кодта республикӕйы районты. Уыцы хъуыддаг сарӕзтам районты цӕрджыты удӕнцойӕн — уыдоны ныр алыхуызон консультацион ӕмӕ ӕндӕр ӕххуыс райсыны тыххӕй Дзӕуджыхъӕумӕ цӕуын нал хъӕуы, уымӕн ӕмӕ сын центры специалисттӕ бынӕтты аразынц ахӕм консультацион фембӕлдтытӕ. Ныртӕккӕ уал центры специалисттӕ кусынц районты администрациты бӕстыхӕйтты. Уыимӕ, куы бахъӕуы, уӕд центры минӕвӕрттӕ хъӕутӕм дӕр ацӕуынц, цӕмӕй бынаты аргъ скӕной амалхъомадон проектты ахадындзинадӕн, — радзырдта Томайы-фырт.

Министры ныхасмӕ гӕсгӕ, абоны онг центры специалисттӕм алыхуызон фарстыты фӕдыл ӕрбацыд 1331 куырдиаты. Уыцы хъӕппӕристӕ ӕмӕ проекттӕ ӕххӕстгонд цӕудзысты Экономикон рӕзты ӕмӕ Хъӕууон хӕдзарад ӕмӕ хойраджы министрадты сӕрмагонд программӕты фӕлгӕты. Уыимӕ, амалхъомадон компаниты проекттӕ царды рауадзыныл ауды Чысыл ӕмӕ рӕстӕмбис амалхъомады структурӕтӕн ӕххуысы фонд дӕр.

Томайы-фырт ӕмӕ ӕмбырды иннӕ архайджытӕ бӕстон радзырдтой профилон ведомствӕтӕ амалхъомады къабазы архайд (уӕлдайдӕр та — коронавирусы пандемийы ӕууӕлты) банывыл кӕнынӕн цы уӕлӕмхасӕн мадзӕлттӕ аразынц, уыдоны тыххӕй дӕр.

Советы уӕнгтӕ ӕркастысты ӕндӕр ахсджиаг фарстытӕм дӕр.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here