Кировы район: йӕ абон ӕмӕ фидӕн

0
32

Кировы районы дӕр, республикӕйы иннӕ районты хуызӕн, афӕдзы дӕргъы цӕуынц социалон объектты арӕзтӕдтӕ. Ӕмӕ, уыдон фӕрнджын хъуыддӕгтӕ сты, уымӕн ӕмӕ куыд иннӕ районты, афтӕ ам дӕр нӕ уыд, нырыккон цардӕн нывыл дзуапп чи дӕтты, ахӕм уавӕртӕ.

Тыхст фарстытимӕ — республикӕйы Сӕргълӕууӕгмӕ

Районы цӕрджытӕ сӕ тыхст фарстытӕ бӕлвырд радзырдтой нӕ республикӕйы Сӕргълӕууӕг Битарты Вячеславӕн районы ӕмбырды. Битары-фырт бацархайдта, хӕстӕгдӕр рӕстӕджы ӕнӕкъуылымпыйӕ алыг кӕнӕн кӕмӕн ис, уыцы хъуыддӕгтӕ уал сӕххӕст кӕныныл. Уыцы фарстытӕй иу уыд, Кӕрдзыныхъӕуы федералон фӕндаг срухс кӕнын. Бирӕ азты дзы нӕ уыд рухс ӕмӕ канд бынӕттон цӕрджытӕн нӕ, фӕлӕ фӕндагыл цӕуджытӕн дӕр уавӕр тӕссаг уыд ӕнӕрухсӕй. Уӕлдайдӕр-иу изӕрыгӕтты, фос сӕ хӕдзӕрттӕм фӕндаджы сӕрты куы хызтысты, уӕд-иу бӕллӕхтӕ цыд. Уӕдӕ мӕйдары машинӕтӕ кӕрӕдзи кӕй цавтой, уый дӕр ӕнӕзындгонд никӕмӕн у. Ныр, а дыууӕ боны, Кӕрдзыны сӕйраг фӕндагыл рухсытӕ ссудздзысты. Нырыккон телыхъӕдтӕ сагъд ӕрцыдысты суанг Бехъаны онг ӕмӕ тӕссаг нал уыдзӕн фӕндагыл ӕдасӕй цӕуынӕн. Ацы хъуыддагмӕ Кӕрдзыныхъӕуы цӕрджытӕ рагӕй ӕнхъӕлмӕ кастысты ӕмӕ сӕ бӕллиц сӕххӕст. Ӕнӕ зӕгъгӕ нӕй, Елхоты сидзӕр сывӕллӕттӕн цы ног хӕдзӕртты арӕзтад цӕуы, уый тыххӕй дӕр. Ӕртӕ хӕдзары ӕхсӕз фатеримӕ кӕронмӕ арӕзт ӕрцыдысты. Хъӕуы ма дзы бакӕнын лыстӕг хъуыддӕгтӕ, ӕмӕ сидзӕр сывӕллӕттӕй ӕхсӕз адӕймаджы Кировы районы ӕрцӕрдзысты.

Национ проектты фӕрцы

Журналисттӕн пресс-туры рӕстӕг Кировы районы администрацийы муниципалон сконды сӕргълӕууӕг Батиаты Хъазыбег радзырдта, национ проекттӕ ӕмӕ паддзахадон программӕты бындурыл районы цы бирӕ хорз хъуыддӕгтӕ арӕзт ӕрцыд ӕмӕ цӕуы, уыдӕтты фӕдыл.

— Районы социалон уавӕрты сӕйрагдӕр сты: амбулатори, сывӕллӕтты рӕвдауӕндон, адӕмы ӕнцойбоны мадзӕлттӕн Культурӕйы галуан, ӕрыгон фӕсивӕд спортӕй кӕм архайой, ахӕм залты арӕзтад. Фӕстаг фондз азы Кировы районы материалон-техникон бындуры рӕзт фидар кӕнынӕн бирӕ ахсджиаг хъуыддӕгтӕ арӕзт цӕуы. Ӕнӕниздзинад хъахъхъӕнынады, культурӕйы, спорты ӕмӕ бирӕ ӕндӕр социалон объекттӕ рацарӕзтам, бындурон цалцӕг сӕ скодтам. Арӕзт ӕрцыд цалдӕр ног объекты дӕр. Ӕмӕ ӕппӕт уыцы хъуыддӕгтӕ паддзахадон программӕтӕ, национ проекттӕ нӕ республикӕйы Сӕргълӕууӕг Битарты Вячеславы фӕрцы сӕххӕст кодтам. Даргъ-Къохы  Культурӕйы галуан ӕнӕмӕнгхъӕугӕ объектыл нымад у. Уымӕн ӕмӕ хъӕууон адӕмӕн культурон мадзӕлттӕ сӕ царды чысыл нӕ ахадынц. Ацы хъӕуы ма скъолайы кӕрты сарӕзтам сывӕллӕттӕн хъазӕн фӕз дӕр. Ахӕм фадӕттӕ скъоладзаутӕн нӕ уыд, ӕмӕ уыцы уавӕр дӕр сывӕллӕтты хъомыладыл хорзӕрдӕм нӕ ахадыдта. Хъазӕн фӕз арӕзт у аргъӕутты бӕстӕйы хуызӕн — цымыдисаг, аив ӕмӕ рӕсугъд. Сарӕзтам Змейкӕйы ӕмӕ Даргъ-Къохы спортивон фӕзтӕ дӕр, рӕзгӕ фӕлтӕр ӕмӕ фӕсивӕд спорты сӕхи кӕм фӕлвардзысты, ахӕм фадӕттӕ. Нацпроекттӕ ӕмӕ паддзахадон программӕты архайдзыстӕм дарддӕр. Ныр ма нын ис бирӕ аразинаг хъуыддӕгтӕ, — загъта Батиаты Хъазыбег.

Кӕрдзыны хъӕуы амбулатори

Уӕвгӕ, ацы хъӕуы амбулатори ӕмӕ фелсырон-акушерон пункт ис, фӕлӕ зӕронд бӕстыхӕйттӕ къуындӕг уавӕртимӕ кусынӕн нал бӕззынц. Хъӕуы та цӕры  2400 адӕймаджы, ӕмӕ уыдонӕн, ӕнӕмӕнг, хъӕуы социалон лӕггӕдты ӕххуыстӕ. Кӕрдзинӕгтӕн бирӕ азты се ‘нӕниздзинадмӕ йӕ цӕст дары Моргуаты Светланӕ. У сӕ тагъд ӕххуысы дохтыр.

— Хуымӕтӕг ныхӕстӕй мӕ бон радзурын нӕу зӕронд кусӕнуӕтты фӕдыл. Амбулатори ӕмӕ фелсырон пункт хъӕуы алы рӕтты сты, ныр та сӕ баиу кодтам, ӕмӕ ног амбулаторийы уыдзӕн, куыд профилактикон мадзӕлттӕ, афтӕ дзӕбӕхгӕнӕн хайад дӕр. Ахӕм уӕрӕх фадӕттӕ нын стыр ахъаз уыдзысты зӕрдӕйы, тугдадзинтӕ ӕмӕ онкологон низтӕ рагацау сбӕрӕг кӕнынӕн. ЭКГ, УЗИ, прививкӕтӕ ӕмӕ процедурӕтӕ кӕнӕн кабинеттӕ кусдзысты ногдӕр уавӕрты, нырыккон техникӕйӕ ифтонггондӕй. Ӕрвылбон дзы бӕрӕг кӕндзыстӕм 50 адӕймаджы ӕнӕниздзинад. Ног амбулатори махӕн, Кӕрдзыны хъӕуы цӕрджытӕн, стыр ӕмӕ зынаргъ лӕвар у, — загъта дохтыр Моргуаты Светланӕ.

Ираны сабиты ног рӕвдауӕндон

Хъӕуы ис сывӕллӕтты рӕвдауӕндон, фӕлӕ бӕстыхай у зӕронд, ӕмӕ йӕ фарсмӕ ныр, паддзахадон программӕ «Демографи»-йы бындурыл арӕзт ӕрцыд ног бӕстыхай ӕппӕт фадӕттимӕ, сывӕллӕтты нывыл хъомыладӕн цыдӕриддӕр хъӕуы, ахӕм фӕрӕзтимӕ. Ног рӕвдауӕндоны бынӕттӕ ис 25 сывӕллонӕн. Уыдон фаг сты ахӕм чысыл хъӕуӕн. Рӕвдауӕндоны сӕргълӕууӕг Фидараты Эльзӕ куыд радзырдта, афтӕмӕй зӕронд бӕстыхайы бынтон хорз уавӕртӕ нӕ уыд, фӕлӕ уӕддӕр районы разамынд ӕмӕ рӕвдауӕндоны кусджыты коллектив архайдтой, сӕ фадӕттӕ ӕмӕ гӕнӕнтӕй, сывӕллӕттӕн хъӕугӕ мадзӕлттӕ аразыныл. Подрядон организаци «Альдаир»-ы аразджытӕ сӕ разамонӕг Тотыккаты Олегимӕ бацархайдтой сывӕллӕттӕн цыбыр рӕстӕгмӕ хорз «хӕдзар» саразыныл. Уый уыдзӕн сабитӕн ног азы иумӕйаг лӕвар.

Хӕстонты нӕмттӕ — ног къӕйыл

Комсомольскы хъӕу рӕзы, хуыздӕрӕрдӕм ивы йӕ цард. Ног амбулатори, рӕвдауӕндон, дуканитӕ, скъола ӕмӕ ӕндӕр социалон инфраструктурӕйӕ уӕлдай ма хъӕумӕ бахизӕны сарӕзтой фӕлладуадзӕн аллея дӕр. Кӕронмӕ арӕзт нӕма фӕцис, фӕлӕ дзы ныридӕгӕн рӕсугъд бандӕттӕ ӕвӕрд ӕрцыд, ног телыхъӕдтӕ ног рухсгӕнӕнтимӕ, ӕмӕ уыдон дӕр — паддзахадон программӕты руаджы. Фӕлӕ хъӕуккӕгты цинӕн нӕй кӕрон, хӕстонтӕн цы ног цыртдзӕвӕн арӕзт ӕрцыд ӕнусон цырагъимӕ, уыцы цауы фӕдыл. Хъӕуы администрацийы сӕргълӕууӕг Авлохты Валери куыд радзырдта, афтӕмӕй ам ис, Фыдыбӕстӕйы Стыр хӕсты рӕстӕг ацы хъӕуы тугкалӕн хӕсты Уӕрӕсейы алы рӕттӕй немыцаг фашистты ныхмӕ чи хӕцыдис ӕмӕ иумӕйаг ингӕны ныгӕд чи ӕрцыд, уыцы хӕстонты цыртдзӕвӕн.

— Зынгӕ дӕр нӕ кодта зӕронд цыртдзӕвӕн, бирӕтӕ йӕ нӕ зыдтой. Фӕлӕ йӕ ныр ногӕй куы рацарӕзтам, уӕд нӕ хъӕуы хистӕр фӕлтӕрӕй бузныджы ныхӕстӕ ӕдзухдӕр хъусӕм. 250 салдаты се ‘нусон бынат нӕ хъӕуы зӕххыл ссардтой. Уыдонӕй сӕ нӕмттӕ бӕлвырдгонд ӕрцыдысты 170 хӕстонӕн. Ног къӕйтӕ сӕвӕрдтам сӕ мыггӕгтӕ ӕмӕ нӕмттимӕ. Се ‘хсӕн ис ӕрмӕст иунӕг ирон, беслӕйнаг  ӕмбалты хӕстон. Фӕлӕ, нӕхи хъӕуӕй Фыдыбӕстӕйы Стыр хӕстмӕ чи ацыд ӕмӕ нал ӕрыздӕхт, уыдонӕн та иумӕйаг цыртдзӕвӕн иннӕ аз сӕвӕрдзыстӕм, — загъта Авлохты Валери. Цыбыр дзырдӕй, Кировы район рӕзы, хуыздӕр кӕнынц йӕ фадӕттӕ, ӕмӕ уый сӕйраг хъуыддаг у йӕ цӕрджыты царды.

Саутӕты Тамилӕ

ОСТАВЬТЕ ОТВЕТ

Please enter your comment!
Please enter your name here