Ног ректор, ног нысантӕ

0
45
????????????????????????????????????

Нӕ республикӕйы Ахуырад ӕмӕ наукӕйы министрады ацыд брифинг. Архайдтой дзы Цӕгат Ирыстоны паддзахадон педагогон институты ректоры хӕстӕ рӕстӕгмӕ ӕххӕстгӕнӕг Гӕджиты Аланӕ ӕмӕ нӕ республикӕйы дзыллон хабархӕссӕг фӕрӕзты минӕвӕрттӕ. Ныхас дзы цыд институты абоны цардыл ӕмӕ йӕ фидӕныл.

— Педагогон институтӕн ис хъӕздыг ӕмӕ фӕрныг истори, ӕмӕ мӕн фӕнды, уыцы историон бынтӕ, ахуырады хорз традицитӕ дарддӕр дӕр куыд рӕзой ӕмӕ ныртӕккӕйы царды домӕнтӕн дзуапп куыд дӕттой. Абоны цард ӕмӕ рӕстӕг нӕ домынц ног ивддзинӕдтӕ. Уымӕ гӕсгӕ нӕ фыццагдӕр хӕс у регионалон проект «Ахуырады системӕйӕн кадртӕ цӕттӕ кӕнын» царды рауадзын. Куыст цӕуы проекты ӕппӕт здӕхтытыл дӕр. Цӕттӕ кӕнӕм ахуыргӕнджытӕ ӕмӕ раздзӕуджытӕ, хъуамӕ скъолаты райдайӕм нӕхицӕн кадртӕ цӕттӕ кӕнын. Уымӕй уӕлдай, куыст цӕуы ӕрыгон ахуыргӕнджытимӕ дӕр. Архайӕм ууыл, цӕмӕй институты бындурыл саразӕм УФ-йы ахуыргӕнджыты ассоциацийы фӕлгӕты «ӕрыгон ахуыргӕндты совет», — загъта Гӕджиты Аланӕ.

Дарддӕр ма Цӕгат Ирыстоны паддзахадон педагогон институты ректоры хӕстӕ рӕстӕгмӕ ӕххӕстгӕнӕг фӕбӕрӕг кодта:

— Нӕ зӕрды ма ис институты материалон-техникон ифтонгад баивын, уымӕн ӕмӕ ныртӕккӕ ахуырадон технологитӕ домынц, цӕмӕй ахуыргӕнӕг уыцы ног технологитӕй пайда кӕнын зона. Уый тыххӕй та сӕ хъуамӕ пайдагонд цӕуа ахуырад рӕзын кӕныны хъуыддаджы. Уымӕ гӕсгӕ хаст ӕрцыд ахӕм уынаффӕ, цӕмӕй Павленкойы уынджы цы ахуырадон агъуыст ис, уый раивӕм Карл Марксы уынджы ахуырадон агъуыстмӕ. Ам раздӕр йӕ куыст кодта скъола «Диалог», фӕлӕ уый ӕрӕджы раивта ног бӕстыхаймӕ. Ацы ахуырадон бӕстыхайы аудиторитӕ сты парахат ӕмӕ райдзаст, ис дзы ӕппӕт фадӕттӕ дӕр, нырыккон царды домӕнтӕн дзуапп чи дӕтты, ахӕм ахуыры рӕзтӕн.

Ныртӕккӕ Цӕгат Ирыстоны паддзахадон педагогон институты ахуыр кӕнынц 1458 студенты. Ахсджиаг у уый, ӕмӕ институты ис ахуыры цалдӕр къӕпхӕны: астӕуккаг ахуырады бындурыл — колледж, бакалавриат, магистратурӕ ӕмӕ аспирантурӕ. Уый дӕтты фадат, бӕрзонд цӕттӕдзинад кӕмӕ ис, ахӕм ахуыргӕнджытӕ цӕттӕ кӕнынӕн.

— Нӕ сӕйрагдӕр хӕс у, фыццаджыдӕр, нӕ республикӕйы скъолатӕн, бӕрзонд профессионалон цӕттӕдзинад кӕмӕ ис, ахӕм кадртӕ цӕттӕ кӕнын, уый фӕстӕ та нӕ сыхаг республикӕтӕн, — бафтыдта ма йӕ ныхасыл Гӕджиты Аланӕ. Институты рӕзтӕн цы нысантӕ сарӕзтам, уыдонмӕ январы мӕй институты ахуыргонд къамисы уӕнгтӕ ӕркӕсдзысты ӕмӕ сыл ӕрдзурдзысты. Дарддӕр ма кусдзыстӕм рӕвдауӕндӕттӕ ӕмӕ райдайӕн скъолаты ахуырадон рӕзтыл.

ХЪОЙБАЙТЫ Галинӕ

ОСТАВЬТЕ ОТВЕТ

Please enter your comment!
Please enter your name here