Афӕдзы куысты бӕрӕггӕнӕнтӕ

0
88

Знон уыдис РЦИ-Аланийы Мыхуыры хъуыддӕгты фӕдыл ӕмӕ дзыллон коммуникациты комитеты ӕмбырд. Амыдта йӕ сӕрдары хӕдивӕг Гӕбӕлаты Мӕдинӕ.

Архайдтой дзы нӕ республикӕйы дзыллон хабархӕссӕг фӕрӕзты кусджытӕ. Ӕмбырды ныхас цыдис комитеты афӕдзы куысты бӕрӕггӕнӕнтыл ӕмӕ фидӕны нысантыл. Гӕбӕлаты Мӕдинӕ куыд радзырдта, афтӕмӕй комитет ацы аз йӕ куыст арӕзта паддзахадон программӕты бындурыл ӕмӕ афтӕмӕй сӕ къухы бафтыд бирӕ хъуыддӕгтӕ саразын. Уыцы программӕтӕй сӕйрагдӕр иу уыд «Дзыллон-хабархӕссӕг фӕрӕзты рӕзт»-ы нысантӕ.

— Ӕдӕппӕтӕй дзыллон хабархӕссӕг фӕрӕзты  мыхуырӕн ӕмӕ чингуытӕуадзӕн куыстытӕн нӕ республикӕйы бюджетӕй иумӕйагӕй хардзгонд ӕрцыд — 223 милуан ӕмӕ 43 мин сомы. Паддзахадон программӕ «Дзыллон хабархӕссӕг фӕрӕзты рӕзт»-ы бындурыл афӕдзы дӕргъы мыхуыры рацыд 1 милуан экземпляры газеттӕ ӕмӕ журналтӕ. Рауагъдад «Ир»-ы та мыхуыры рацыдысты, социалон ахадындзинад кӕмӕн ис, ахӕм литературӕйы чингуытӕ — 40, 15 мин экземплярӕй.

2020 азы ма рауагъдад бацӕттӕ кодта Аланыстоныл аргъуыды 1100 азы кадӕн чингуыты сери «Алайнаг библиотекӕ». Фыццаг фӕлтӕры куыстмӕ хаст ӕрцыд 7 чиныджы. Стӕй, Абайты Васойы цыппартомон чиныг. Чингуыты мыхуырӕн комитет субсидийы хуызы рауагъдад «Ир»-ӕн радих кодта 370 милуан сомы. Комитеты къамис та равзӕрста 26 чиныджы ирон ӕвзагыл, куыд хуыздӕртӕ, афтӕ. Комитет стыр ӕргом здахы, мадӕлон ӕвзагыл чи фыссы, уыцы ӕрыгон автортӕм дӕр. Нӕ республикӕйы Сӕргълӕууӕг нын нӕ фӕндтӕн, нӕ ног проекттӕн алкӕддӕр аргъ скӕны ӕмӕ вӕййы разы, мадӕлон ӕвзаджы рӕзтӕн цы мадзӕлттыл райдайӕм архайын, уыцы куыстыл. Тынг хорз сфӕлдыстадон фӕз у ӕрыгон фысджытӕн журнал «Мах дуг». Уым сын ис фадӕттӕ, се сфӕлдыстадон курдиат прозӕйы, поэзийы равдисынӕн. Уымӕй уӕлдай ма нӕм ис ӕндӕр журналтӕ дӕр «Ногдзау», «Ирӕф», «Дарьял». Ӕрмӕст «Ногдзау» ацы аз мыхуыры рацыд 15 мин экземплярӕй. РЦИ-Аланийы Сӕргълӕууӕг Битарты Вячеславы ӕххуысӕй Цӕгат ӕмӕ Хуссар Ирыстоны бирӕсывӕллонджын бинонтӕ журнал «Ногдзау» лӕвар райстой 6000 экземпляры. Паддзахадон программӕйы бындурыл бацархайдтам, иннӕ аз мыхуыры фӕрӕзтӕ уӕйгонд кӕм цӕудзысты, ахӕм дыууӕ егъау павильоны ӕмӕ дыууӕ стыр киоскы Дзӕуджыхъӕуы байгом кӕныныл, чысыл киосктӕ та районты. Ацы фарста у вазыгджын, уымӕн ӕмӕ нӕ республикӕйы газеттӕ ӕмӕ журналты киосктӕ ӕхгӕд кӕдӕй ӕрцыдысты, уӕдӕй абонмӕ мыхуыры фӕрӕзтӕ адӕммӕ нал хӕццӕ кӕнынц нывыл.

Паддзахадон программӕйы бындурыл ацы аз фӕцис «Ирон адӕмы национ-культурон рӕзты» телеравдыстыты рухстауӕн, «Имена», зӕгъгӕ, цикл дӕр. Телеравдыстыты сӕйрагдӕр темӕ уыдис, Ирыстоны номдзыд адӕймӕгтӕй фаг ӕрмӕджытӕ кӕуыл нӕ рацыд, уыдоныл саразын. Телепроект «Тропами Алании» та — Аланыстоныл аргъуыды 1100 азы кадӕн, ирон ӕвзагмӕ тӕлмацгонд ӕрцыдысты цалдӕр кинонывы. Декабры астӕу рацӕудзӕн «Иронау дзурӕм»-ы фондз равдысты. Программӕйы фӕрцы ма арӕзт ӕрцыдысты журналтӕ «Мах дуг» ӕмӕ «Дарьял»-ы нырыккон интернет-сайттӕ. Уымӕй уӕлдай, рацараздзыстӕм газет «Рӕстдзинад»-ы интернет-сайт дӕр. Ацы аз национ культурӕ ӕмӕ мадӕлон ӕвзаджы популяризацийы фӕлгӕты журналистты ӕрвылазон ирон ӕвзагыл конкурсы цыппар журналисты райстой премитӕ — 50 мин сомы. Нӕ республикӕйы Сӕргълӕууӕджы премимӕ та райстам 183 куырдиаты. Ӕмгуыст кӕнӕм Ирыстоны ӕппӕт дзыллон-хабархӕссӕг фӕрӕзтимӕ дӕр, архайӕм алыхуызон проектты. Уыдонӕй у «Наркотикты ныхмӕ” арӕзт проект. Ацы ран пайда кӕнӕм наркоманийы ныхмӕ пропагандӕйы фӕрцы телеравдыстыты, газетты фӕрстыл ӕмӕ ӕндӕр ӕхсӕнадон мадзӕлтты ӕвдисын, наркомани цы бирӕ бӕллӕхтӕ хӕссы адӕймагӕн, ӕмӕ сӕ бахизыны фӕдыл фарстытыл ӕрмӕджытӕй. Уыдис  ӕрвылазон конкурс темӕ «Равзар цард». Бацӕттӕ кодтам комплексон мадзӕлттӕ «ӕгас горӕт», зӕгъгӕ, интернет-порталы. Фидӕны нӕ зӕрды ис Ирыстоны журналистты зонындзинӕдтӕ ноджы уӕлдӕр кӕнынӕн сӕрмагонд ахуыртӕ аразын ӕмӕ сӕ стажировкӕмӕ дӕр ӕрвитын, — загъта комитеты сӕрдары хӕдивӕг Гӕбӕлаты Мӕдинӕ.

Саутӕты Тамилӕ

ОСТАВЬТЕ ОТВЕТ

Please enter your comment!
Please enter your name here