Хуыздæрты хуыздæртæн — кадджын хæрзиуджытæ

0
54
Знон кадджын уавæры РЦИ-Аланийы Сæргълæууæг Битарты Вячеслав, РЦИ-Аланийы Хицауады Сæрдар Тускъаты Таймураз æмæ Дзæуджыхъæуы муниципалон сконды Сæргълæууæг Икъаты Русланбег паддзахадон хæрзиуджытæ балæвар кодтой, афæдзы дæргъы йæ куысты мидæг йæхи хъазуатонæй чи равдыста, уыдонæн.
РЦИ-Аланийы Сæргълæууæг Битарты Вячеслав арфæ ракодта бæрæгбоны архайджытæн æмæ загъта:
— Уæ бон хорз уæд, нæ зынаргъ æмбæлттæ! Æмбæлæм Ног азы къæсæрыл. Цалдæр боны фæстæ афæндараст кæндзыстæм 2020 аз. Æрмæст нæ республикæйæн нæ, фæлæ æгас дунейæн дæр уыд зын аз. Пандемийы аххосæй къуылымпыгонд æрцыдысты бирæ хъуыддæгтæ, фæлæ мах иумæйагæй тох кæнæм йæ ныхмæ, æмæ мæн фидарæй уырны, æмдыхæй йыл кæй фæуæлахиз уыдзыстæм, уый. Абон ардæм æрбахуыдтам Цæгат Ирыстоны хуыздæр минæвæртты, йæ куысты фæзминаг чи у, ахæмты. Уыдоны ‘хсæн сты: культурæ, наукæ, ахуырад, хъæууон хæдзарад, æхсæнадон æмæ паддзахадон кусджытæ. Сымахæй алчидæр йæ зæрдæргъæвд архайдæй аккаг æвæрæн бахаста нæ иумæйаг царды хорздзинадмæ. Бирæ азты дæргъы цы удуæлдай фæллой кæнут, уый ирд дæнцæг у кæстæр фæлтæрæн. Уæлдай арфæ мæ фæнды ракæнын медицинон кусджытæн. Уыдоны уæхсчытыл æрæнцад зын рæстæджы уавæр, уыдонæй аразгæ у нæ адæмы æнæниздзинад. Нæ зынаргъ æмбæлттæ, арфæ уын кæнын Ног 2021 азы фæдыл. Мæ зæрдæ уын зæгъы фидар æнæниздзинад æмæ амонд. Уæ бæллицтæ уæ къухы куыд æфтой, ахæм арфæ уæ уæд! Бузныг уын зæгъын, нæ республикæйы сæраппонд цы куыст кæнут, уый фæдыл!
РЦИ-Аланийы Сæргълæууæг Николай Пироговы номыл паддзахадон орден радта хуыздæр дохтыртæ: Татьянæ Аликберова, Бæзойты Михаил, Людмилæ Безбородова, Беккуызарты Зинаидæ æмæ иннæтæн. Уæрæсейы Федерацийы культурæйы райрæзтмæ стыр æвæрæн кæй бахаста, уый тыххæй УФ-йы сгуыхт нывгæнæджы кадджын ном лæвæрд æрцыд Цæллагты Викторæн. УФ-йы культурæйы сгуыхт кусæджы ном лæвæрд æрцыд ансамбл «Хæхты сабитæ»-йы аивадон разамонæг Кодзаты Станиславæн. Бирæ азты дæргъы экологийæ дæсны специалисттæ кæй цæттæ кæны, уый тыххæй УФ-йы кадджын экологы ном лæвæрд æрцыд Хæххон-металлургон институты профессор Æлборты Иванæн.
Бæрæгбоны арфæтæ сын ракодта РЦИ-Аланийы Хицауады Сæрдар Тускъаты Таймураз дæр, æмæ йæ наукон-педагогон куысты тыххæй, бирæ азты дæргъы дæсны специалисттæ кæй цæттæ кæны, уый тыххæй УФ-йы Президенты Арфæйы гæххæтт лæвæрд æрцыд Хæххон-металлургон институты профессор Цалиты Алыксандрæн. УФ-йы Президенты Кады грамотæйæ хорзæхджын æрцыдысты медицинон кусджытæ: Джиоты Анжелæ, Дзагкоты Ольгæ, Икъаты Риммæ æмæ иннæтæ.
Дарддæр бæрæгбоны уазджытæн арфæйы ныхæстæ загъта Дзæуджыхъæуы муниципалон сконды Сæргълæууæг Икъаты Русланбег. Коронавирусы ныхмæ тохы нæ республикæйы цæрджытæн афойнадыл æмæ æнæрынцойæ медицинон æххуыс бакæныны фæдыл РЦИ-Аланийы Кады грамотæтæ балæвар кодта медицинон кусджытæ: Гаппуаты Зирæ, Милдзыхты Алан æмæ иннæтæн.

ОСТАВЬТЕ ОТВЕТ

Please enter your comment!
Please enter your name here