Абон 75 азы сæххæст Уæрæсейы сгуыхт артист Суанты Кимы райгуырдыл

0
874

Абон 75 азы сæххæст Уæрæсейы сгуыхт артист, Цæгат Ирыстоны адæмон артист, алы фæлтæрты уарзон зарæггæнæг Суанты Кимы райгуырдыл.
Кæд ныр бирæ азты не хсæн нал ис, уæддæр йе сфæлдыстад цæры ирон адæмы зæрдæты. Уымæн æвдисæн, Дзæуджыхъæуы фæсивæдон библиотекæйы цы мысæн изæр арæзт æрцыди, уый дæр. Зарыди зæрдæйæ, зæгъынц йæ айвадуарзджытæ. Цæгат Ирыстоны фыццаг эстрадон зарæггæнæг Суанты Ким ирон адæмæн балæвар кодта, зæгъæн ис, æмæ аивады ног дуг. Æгæрон аргъ ын кодтой йæ курдиатæн æмæ йæ цæстуарзондзинадæн. Уæдæ йын йе сфæлдыстадон бынтæ та абарæн дæр ницæимæ ис.
«Иры сызгъæрин хъæлæс»! Ацы ном Суанты Кимæн саккаг кодтой сæрыстыр дзы цы адæм сты, уыдон. Йæ фæрцы республикæйы фæзынди Национ эстрадон оркестр, абон хæссы Кимы ном.
Номарæн изæрмæ хуынд æрцыдысты зарæггæнæджы хæлæрттæ, йе мкусджытæ, фысджытæ, фæсивæд. Адæм бирæ, фæлæ сæ хъуыды иу – Суанты Кимы хуызæн курдиатджын адæм райгуырынц 100 азы иу хатт, уымæ гæсгæ йын йе сфæлдыстад хъæуы фæлтæрæй-фæлтæрмæ дæттын. Залы хъуыстысты Кимы зарджытæ, йæ хæлæрттæ дзырдтой сæ мысинæгтæ. Кæддæр йæ сфæлдыстадон фæндаг райдыдта Алагиры скъолайы хихъæппæрисадон къорды, фæстæдæр сси Санкт – Петербурджы консерваторийы студент. Уыди фыццаг ирон зарæггæнæг, Хетæгкаты Къостайы æмдзæвгæтыл чи азарыди, ахæм. Ким йæ мадæлон æвзагыл зарыди хæсты тыххæй, уарзондзинадыл, рыст æмæ амондыл. Йæхицæн та йæ уарзондæр зарæг уыди «Æнæ хай». Равдыста дзы, дзырдæй зæгъæн кæмæн нæй, ахæм æнкъарæнтæ. 20 азы размæ йын йæ цард цы трагеди аскъуыдта, уыцы бон дæр йе мгæртты хсæн зарыд уыцы зарæг. Афтæмæй баззад сæ зæрдæты.

ОСТАВЬТЕ ОТВЕТ

Please enter your comment!
Please enter your name here