Хæрзаудæн акци — Наркомани хатыр никæмæн кæны

0
809

 

Ирыстоны фæсивæд нæ дуджы стырдæр бæллæх — наркоманийæ бахъахъхъæныны тыххæй нæ республикæйы арæх арæзт æрцæуынц алыхуызон мадзæлттæ, акцитæ æмæ фембæлдтытæ. Радон ахæм акци уыд Дзæуджыхъæуы 7-æм профессионалон училищейы.

Бæрæг у, сæ ахуырдзауты хъомыладмæ, уды сыгъдæгдзинадмæ ацы ахуыргæнæндоны кусджытæ куыдфæндыйы цæстæй кæй нæ кæсынц, уый. Фæсивæды алыхуызон бæллæхтæй, уыимæ наркоманийæ бахъахъхъæныны тыххæй акцитæ æмæ фембæлдтытæ ам арæзт цæуынц рæстæгæй-рæстæгмæ. Ацы хатт сын ахæм хорз хъуыддаг саразынæн фæци æххуысгæнджытæ дæр — Цæгат Ирыстоны республикон æхсæнадон хæрзаудæн фонд «Спасательный круг». Ацы æхсæнадон организаци цы удуæлдай куыст кæны, уымæн аргъ скæнæн нæй. Фонды разамонæг Дзгойты Геннади æмæ йæ цæдисон æмбæлттæн сæ æвæллайгæ хæрзаудæн архайды фæрцы сæ къухы бафтыд æрыгæттæй бирæты наркоманийы дзæмбытæй ратонын. Æмæ æнæ уыдоны æххуысæй мадзал афтæ цымыдис æмæ зæрдæмæхъаргæ кæй нæ рауадаид, уый дызæрдыггаг нæу.

Йæ раныхасы Дзгойты Геннади училищейы ахуыргæнджытæ æмæ специалисттæн, сæ сæргъы директор Цæголты Тамерлан, афтæмæй арфæ ракодта, сæ ахуырдзауты хъомыладмæ ахæм стыр æргом кæй здахынц, уый тыххæй.

Наркоманийы æгъатырдзинады тыххæй, æрыгон адæймаг дзы йæхи цы хуызы бахъахъхъæна, æппæт уыдæтты тыххæй фæсивæдæн дзырдтой наркотикты зилдухмæ цæстдарды республикон управленийы цур æхсæнадон советы сæрдар Бериты Олег, чырыстон дины минæвæр фыд Василий, пысылмæтты муфти Гуæцæлты Хадзымурат, уæгъдибар хъæбысхæстæй дунейы чемпион æфсæддонты ‘хсæн Дзагуырты Инал, барадхъахъхъæнæг, медицинон æмæ æндæр организациты минæвæрттæ. Се ‘ппæт дæр дзырдтой, наркомани парахат кæй кæны нæ куыдфæндыйы цæстæнгасы аххосæй, иу иннæйы рыст кæй не ‘мбары, уый тыххæй, сидтысты фæсивæдмæ, цæмæй сæ тыхтæ æвзарой спорты, аивады, æндæр хорз хъуыддæгты. Сымах стут нæ фидæн, не скаст сымахмæ у, дзырдтой хистæртæ, æмæ нæ фидæн хъуамæ уа æнæниз æмæ цардбæллон.

Училищейы театралон къорд «Ныфс» чысыл спектаклы хуызы равдыста, сæхæдæг наркоманимæ цы цæстæй кæсынц æмæ дзы цы хуызы, цы мадзæлттæй аирвæзæн ис, ахæм ныв. «Спасательный круг»-ы минæвæрттæ та ахуырдзаутæн равдыстой, наркотиктæ адæймаджы цы уавæрмæ æркæнынц, ууыл дзурæг цыбыр киноныв. Æмæ цалынмæ цыд, уæдмæ стыр залы иунæг сыбыртт дæр нæ райхъуыст. Æрмæст уый дæр ууыл дзурæг уыд, æмæ, экраныл цы уæззау æмæ æвирхъау нывтæ уыдтой ахуырдзаутæ, уыдон сæ зæрдæтæм арф кæй райстой.

Наркомани хатыр никæмæн кæны, нæ ныххатыр кæндзæн махæн нæ иунæгæн дæр, стырзæрдæ куы разынæм æмæ нæ фидæн, нæ кæстæрты ацы стыр бæллæхæй бахъахъхъæнын куы нæ базонæм, уæд.

ДЕДЕГКАТЫ З.

 

ОСТАВЬТЕ ОТВЕТ

Please enter your comment!
Please enter your name here