«Фæллой у адæмы иугæнæг тых»

0
673

Хъазуатонæй бакуыстой…

Нысангонд куыддæриддæр уыди, афтæ ивгъуыд сабаты республикæйы куыстуæтты, организациты, разамынддæттæг органты коллективтæ, студенттæ раивылдысты зиумæ. Куыд æппæт районты, афтæ Дзæуджыхъæуы дæр зиуы зæрдиагæй бацархайдтой мингай адæймæгтæ. Уынгтæ, доныбылтæ, парктæ æмызмæлд кодтой кусæг адæмæй. Æдæппæт Дзæуджыхъæу дихгонд æрцыд 94 хайыл. Уыцы бон сæ куыст кодтой сæрмагонд техникæ дæр, уæзласæн КАМАЗ-тæ, ЗИЛ-тæ, æвгæнæнтæ. Горæты сæрмæ дендрари æфснайынмæ иннæты æмрæнхъ балæууыдысты республикæйы Сæргълæууæджы хæстæ рæстæгмæ æххæстгæнæг Битарты Вячеслав, Хицауады Сæрдары хæстæ рæстæгмæ æххæстгæнæг Тускъаты Таймураз, Дзæуджыхъæуы сæргълæууæг Хæдарцаты Махарбег, горæты бынæттон хиуынаффæйады администрацийы сæргълæууæг Æлбегаты Барис, министртæ, æхсæнадон организациты минæвæрттæ æмæ цæрджытæ.

— Советон заман-иу кæддæриддæр уыдис зиуы бон, адæм-иу æмхуызонæй рацыдысты æмæиу зæрдиагæй æфснайдтой. Уæд нæ горæт йæ сыгъдæгдзинадæй бæрæг дардта, Советон Цæдисы нымад уыд рæсугъддæрыл. Мах ын хъуамæ уыцы фæлгонц раздахæм, уый ма у хъомылады ахъаззаг мадзал дæр. Абон хистæрты æмхуызон сывæллæттæ дæр кусынц, фæллой у адæмы иугæнæг тых дæр, — загъта Битарты Вячеслав. Ивгъуыды хорз æгъдæуттæ æрымысыд Æлбегаты Барис дæр, студент уæвгæйæ-иу зиуы фæсивæд куыд архайдтой, уый арæх æрхъуыды кæны. «Абон Дзæуджыхъæуы алыхуызон куыстуæттæй зиумæ рацыд 1100 адæймаджы. Æппæт районтыл дæр аххæссыдыстæм, алы парк дæр æфснайд цæуы. Уыимæ, адæм кусынц зæрдæхъæлдзæг æмæ уæнгрогæй. Не ‘ппæт службæтæ дæр цæттæ сты дарддæр дæр афтæ кусынмæ. Фæлæ ма мæ фæнды горæты цæрджытæм дæр фæсидын, цæмæй сæхæдæг дæр сæ цæст дарой сыгъдæгдзинадмæ. Йæ бырæттæ таугæ уынгты чи цæуы, уыдон абон не ‘мхуызон куы балæууыдаиккой, уæд райсом сæ къух нал батасид ахæм митæм», — бафиппайдта Æлбеджы-фырт. Куыд ма хъусын кодтам, афтæмæй къуыри раздæр администрацийы кусджытæ дендрари æфснайдтой. Æппæтреспубликон зиу та алы районы дæр конд æрцыд хорз æмвæзады. Кусæг адæмæй уæлдай зиумæ ранæйрæтты рацыдысты цæрджытæ дæр. Зæгъæм, Фæскомцæдисон парчы депутаттимæ, студенттимæ зæрдиагæй архайдтой цæрджытæ дæр. Тебиаты Ларисæ куыд бафиппайдта, афтæмæй йæ фæнды, цæмæй, кæм цæрынц, уый алфамбылай уа аив, рæсугъд. Дзæуджыхъæуы Минæвæртты æмбырды депутат Баймæтаты Зауыр куыд загъта, афтæмæй йын Фæскомцæдисон парк йæ сабибонтæй фæстæмæ у уарзон бынат. — Мах-иу ардæм æрбацыдыстæм хъазынмæ, фæллад уадзынмæ. Æмæ ныр, паркмæ хæстæг чи цæры, уыдоны сагъæсы æфтауы, æппындæр ыл кæй нæ ауæрдынц, сæ бырæттæ æнæвгъауæй кæй калынц, уыдæттæ. Ахæм хъæппæрис кæй фæзындис, уый мæ зæрдæмæ цæуы, ноджы цæрджытæ дæр хъуыддагмæ уазал цæстæй нæ акастысты, — загъта депутат. Бирæ куыст уыди, «Сапицкая будка» кæй хонынц, уыцы фæлладуадзæн бынаты. Зиууæттæ йæ ссыгъдæг кодтой бырæттæй, къалиутæй, сыфтæртæй. Афтæ — Металлургты парк, Тамайы-фырты æмæ Куйбышевы уынгтæ кæм баиу вæййынц, уым цы сквер ис, уый дæр.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here