Кадджын хæрзиуджытæ

0
678

Знон Цæгат Ирыстоны Национ наукон библиотекæйы культурæйы кусæджы æппæтуæрæсеон боны фæдыл уыд кадджын æмбырд. Архайдтой дзы республикæйы Хицауады, Парламенты æмæ Культурæйы министрады, стæй Дзæуджыхъæуы бынæттон хиуынаффæйады администрацийы бæрнон кусджытæ, районты культурæйы артдзæстыты минæвæрттæ.

Фембæлды райдайæны уæрæх экраныл æвдыст æрцыдысты Ирыстоны культурæйы æмæ аивады æнтыстытæ æвдисæг видеослайдтæ. Уый фæстæ раныхас кодта нæ республикæйы культурæйы министры хæстæ рæстæгмæ æххæстгæнæг Атайты Мæдинæ. Уый загъта, кæд ивгъуыд аз культурæйы къабазы кусджытæн æнцон нæ уыд, уæддæр зæрдиагæй кæй архайдтой сæ размæ æвæрд хæстæ æххæст кæныныл. — Нæ паддзахадон театрты спектакльтæ æмæ кафты академион ансамбль «Алан»-ы концерттæ цыдысты æнтыстджынæй. Æвзæр нæ рауад нæ æвзонг, курдиатджын дирижертæ Зæнджиаты Тимуры, Муриты Данæ æмæ Тедеты Хетæджы концертон архайд дæр. Сæ æрмдзæфæн сын хорз аргъ скодтой канд Ирыстоны нæ, фæлæ æппæт Уæрæсейы аивадуарзджытæ дæр. Фидæны та фæнд кæнæм нæ республикæйы курдиатджын фæсивæды концерттæ æвдисын. Ацы аз дæр нæм ис хорз фæндтæ, æмæ иумæйаг хъаруты фæрцы нæ къухы кæй бафтдзысты, ууыл дызæрдыг нæ кæнын, — загъта Атайты Мæдинæ. Ивгъуыд аз нæ бæстæйы нымад уыд Литературæйы азыл. Уыимæ баст бæрæгбæттæ, тематикон изæртæ, конференцитæ кæй скодтой, уый тыххæй «Литературæйы аз» сбæрæг кæныны организацион комитеты номæй сæрмагонд майдантæ саккаг кодтой: Национ наукон библиотекæйы директор Хайманты Иринæ, йæ хæдивæг Бибуаты Иринæ, Цæгат Ирыстоны адæмон поэт Гуырдзыбеты Иринæ, рауагъдад «Респект»-ы директор Абайты Ларисæ, Мамсыраты Дæбейы номыл сывæллæтты республикон библиотекæйы директор Мæхъиты Лианæ. Майдантæ сын радта РЦИ-Аланийы Хицауады Сæрдары хæдивæджы хæстæ рæстæгмæ æххæстгæнæг Огъуаты Алан. Культурæ æмæ аивады кусджыты къордæн та лæвæрд æрцыд РЦИ-Аланийы Культурæйы министрады Кады гæххæттытæ æмæ æхцайы премитæ. Фембæлды сæ арæхстдзинæдтæ равдыстой нæ республикæйы аивады дæснытæ, стæй Аивæдты æмæ республикæйы культурæйы колледжы ахуырдзаутæ.

ГАСАНТЫ Валери

ОСТАВЬТЕ ОТВЕТ

Please enter your comment!
Please enter your name here