Республикæйæн йæ гæнæнтæ бирæ сты

0
828

Знон Цæгат Ирыстоны кусæг балцы уыд Уæрæсейы Федерацийы æнæниздзинад хъахъхъæнынады министр Вероникæ СКВОРЦОВА. Йемæ иумæ республикæмæ ссыд медицинон къабазæн дзуапдæттæг кусæг къорд, се ‘хсæн: федералон министры хæдивæг Татьянæ ЯКОВЛЕВА, министры æххуысгæнджытæ Иринæ ЗВЕРЕВА æмæ Дмитрий РЫЖОВ, Æнæниздзинад хъахъхъæнынады къабазмæ цæстдарды федералон службæйы разамонæг Михаил МУРАШКО, Æнæмæнг медицинон фæдзæхстады федералон фонды сæрдары хæдивæг Юрий НЕЧИПОРЕНКО æмæ Уæрæсейы æнæниздзинад хъахъхъæнынады министрады коммуникациты æмæ æхсæнадон æнæниздзинады департаменты директор, министрады пресс-секретарь Олег САЛАГАЙ.

Мæскуыйæ ахæм стыр делегацийæн йе ссыды нысан у нæ республикæйы медицинон къабазы уавæр фæхуыздæр кæнын, ноджы бæрзонддæр æмвæзадмæ йæ сисын æмæ дзы цы лыггæнинаг фарстатæ ис, уыдон алыг кæнынæн мадзæлттæ ссарын. Беслæны аэропорты федералон министр æмæ йе ‘мбæлттæн æгасцуай загътой республикæйы Сæргълæууæджы хæстæ рæстæгмæ æххæстгæнæг Битарты Вячеслав, республикæйы Хицауады Сæрдары хæстæ рæстæгмæ æххæстгæнæг Тускъаты Таймураз, йæ хæдивæг Александр Реутов, республикæйы æнæниздзинад хъахъхъæнынады министры хæстæ рæстæгмæ æххæстгæнæг Реуазты Таймураз æмæ иннæ бæрнон кусджытæ. Вероникæ Скворцовайæн уый уыд йæ фыццаг балц Цæгат Ирыстонмæ, уымæ гæсгæ уал аэропортæй уазджытæ бабæрæг кодтой Беслæны мемориалон комплекс. Уырдыгæй та ацыдысты Беслæны бирæпрофилон медицинон центрмæ. Ацы ран министр федта, нырыккондæр компьютерон æмæ медицинон техникæйæ æххæст чи у, æртæ ахæм лабораторийы, стæй операцитæгæнæн блоктæ. Центры сæйраг дохтыр Уыртаты Ролан куыд радзырдта, афтæмæй сæм ис операцитæгæнæн фараст блокы æмæ се ‘ппæт дæр кусынц иудадзыгон уагæй. Бæрæг куыд у, афтæмæй центры æххæст кæнынц бæрзонд технологитыл арæзт медицинон æххуыс. Уый фæстæ Вероникæ Скворцова фембæлд Беслæны медицинон центры дохтыртæ æмæ медицинон кусджытимæ æмæ сын сæ фæрстытæн дзуапп радта. Куыд бафиппайдта, афтæмæй Дзæуджыхъæумæ ссæуыны размæ федералон министрад йæхи цæттæ кодта сæрмагондæй. Уый тыххæй нæ республикæмæ-иу рæстæгæй-рæстæгмæ кусæг балцыты цыдысты федералон министрады специалисттæ, медицинæйы алыхуызон къабæзты эксперттæ, профессортæ æмæ бæрæг кодтой республикæ æнæниздзинад хъахъхъæнынады уавæр. Стæй уыдоны кусæг балцытæн хатдзæгтæ скæныны бындурыл æрцыд уынаффæ хаст Цæгат Ирыстон бабæрæг кæныны тыххæй. Вероникæ Скворцова куыд бафиппайдта, афтæмæй йæ кусæг балц Ирыстонмæ Беслæны медицинон центрæй хуымæтæджы нæ райдыдта. Æппæт Цæгат Кавказы центр дæр у, бæрзонд технологитыл арæзт æмæ сæрмагонд медицинон æххуыс кæм кæнынц, иунæг ахæм медицинон кусæндон. Ацы ран кусынц дæсны æмæ фæлтæрдджын дохтыртæ, æмæ сæ къухы æфты хорз æнтыстдзинæдтæ, уымæ гæсгæ центр хъуамæ суа, республикæйы иннæ медицинон кусæндæттæ сæхи кæуыл барой æмæ кæй æнтыстдзинæдтæм тырной, дæнцæджы аккаг ахæм медицинон кусæндон. Сæ размæ сын министр сæвæрдта нысан, цæмæй центр суа наукон-иртасæн æмæ ахуырадон æгъдауæй тыхджындæр медицинон центр. Сæ куысты ма хъуагдзинæдтæ цæмæй æййафынц, зæгъæм, дæсны специалисттæй дæр, уæлæмхасæн медицинон тыхтæ æмæ техникæйæ дæр, уыдонæй министр зæрдæ бавæрдта. Уый фæстæ Мæскуыйæ ссæуæг медицинон къабазæн дзауапдæттæг бæрнон адæймæгты стыр къорд цалдæр дихы фæци, æмæ дзы алчидæр бабæрæг кодта, Дзæуджыхъæуы цыдæриддæр рынчындæттæ æмæ медицинон кусæндæттæ ис, уыдон се ‘ппæт дæр, се ‘хсæн: Тагъд æххуысы клиникон рынчындон, онкологион диспансер, тарнизы ныхмæ диспансер, сывæллæтты 2-æм поликлиникæ æмæ иннæтæ. Вероникæ Скворцова та бабæрæг кодта Республикон клиникон рынчындон. Ацы ран уый æркаст рынчындоны бæстыхæйттæм, бабæрæг кодта рынчындоны реанимацион æмæ кардиологион хайæдтæ æмæ сбæлвырд кодта, æртæ азы размæ хъуамæ кусын чи райдыдтаид, тугдадзинты регионалон центры арæзтад куыд цæуы, уый. Рынчындоны уавæры æмæ йæ лыггæнинаг фарстаты тыххæй йын дзырдтой сæйраг дохтыр Саламты Анатоли, нæ республикæйы Æнæниздзинад хъахъхъæнынады министрады сæйраг специалист-кардиолог Замирæ Астахова æмæ министрады иннæ бæрнон кусджытæ æмæ специалисттæ. Уый фæстæ Вероникæ Скворцова дзуапп радта журналистты фæрстытæн. Фæрстытæ баст уыдысты республикæйы медицинон къабазæн федералон æххуысимæ, дохтыртæ æмæ медицинон кусджыты мыздимæ, хосты ифтонгдзинадимæ, Æнæмæнг медицинон фæдзæхстады фонды цы лыггæнинаг фарстатæ ис, уыимæ æмæ æндæр ахсджиаг хъуыддæгтимæ. Кусæг балцы кæронбæттæны Цæгат Ирыстоны паддзахадон медицинон академийы цы стыр æмбырд уыд, уым хаст æрцыд æмбæлгæ уынаффæтæ. Дзæуджыхъæумæ ссæуæг федералон бæрнон адæймæгтæй уæлдай дзы архайдтой республикæйы æмæ медицинон къабазы разамынд, горæты æппæт рынчындæтты æмæ медицинон кусæндæтты сæйраг дохтыртæ, нæ министрады сæйраг специалисттæ æмæ эксперттæ. Вероникæ Скворцова куыд бафиппайдта, афтæмæй раздæр, советон дуджы, Цæгат Ирыстоны уыд тынг тыхджын медицинæ, республикæйы медицинон академи та уыд бæстæйы фондз хуыздæр медицинон уæлдæр ахуыргæнæндæттæй иу. Æмæ ныр афтæ саразын хъæуы, цæмæй Цæгат Ирыстоны медицинон къабаз ногæй бацахса аккаг бынат, республикæйы медицинон æххуыс та суа ноджы хæрзхъæддæр æмæ бирæфадатджындæр. Уый тыххæй республикæйы ис æппæт гæнæнтæ дæр. Федералон центрæй та цы æххуыс хъæуа, уымæй министр зæрдæ бавæрдта. Мæскуыйаг уазджытæ ма бабæрæг кодтой республикон онкологион диспансер дæр. Уæрæсейы Федерацийы Æнæниздзинад хъахъхъæнынады министрады медицинон ахуырады æмæ кадрты политикæйы департаменты директоры хæдивæг Хъуппеты Иринæ, нæ республикæйы æнæниздзинад хъахъхъæнынады министрады хистæр кары адæмæн медицинон æххуысы хæрзхъæддзинадмæ цæстдарды хайады сæргълæууæг Цæлыккаты Маринæ, РЦИАланийы Сæргълæууæджы хæстæ æххæстгæнæджы æххуысгæнæг Хуыбиаты Барис фембæлдысты рынчындоны медицинон кусджытимæ. Сæйраг дохтыр Томайты Ирбегимæ бабæрæг кодтой цалдæр хайады. Бæрæггæнæнтæм гæсгæ, алы 100 мин адæймагæй дæр афæдзмæ онкологион низтæй амæлы 169 адæймаджы, Уæрæсейы иннæ регионтимæ абаргæйæ къаддæр у сæ нымæц. Сæрмагонд федералон программæ «Онкология»-ы бындурыл диспансер ифтонг æрцыд ног, нырыккон ифтонггæрзтæй. — Нæ лæггæдтæ иууылдæр сты лæвар, рынчынтæй ницы агурæм, — загъта сæйраг дохтыр. Иммунологон химион лаборатори, операцион блок, реанимацийы хайад, рентгены кабинет, ног цалцæггонд радиологион хайады бæстыхай — алы ран дæр Хъуппеты Иринæ цымыдисæй фарста, куыд сты сæ куысты уавæртæ, цы æххуысмæ æнхъæлмæ кæсынц, сæ мыздæй разы сты, æви нæ. Базонын æй фæндыд, кæм ахуыр кодтой дохтыртæ сæ дæсныйадыл, æмгуыстад сын цавæр кафедрæтимæ, медицинон кусæндæттимæ ис æмæ æндæртæ. Суанг ма, цавæр медицинон журналтæ фыссынц æмæ кæсынц, уымæй дæр. — Абон æппæт медицинæйы къабаз дæр зын уавæры кæй ис, уый сусæггаг нæу. Фæлæ дохтыр иудадзыг хъуамæ куса йæ зонындзинæдтæ бæрзонддæр кæныныл, иу ран лæууæн нæй. Фæзыны ног медицинон техникæйы хуызтæ æмæ сæ зонын хъæуы. Мах цæттæ стæм æххуысмæ, Петербург æмæ Хъазанмæ уæ дохтырты уæлæмхасæн ахуырмæ æрвитут. Хъуппеты Иринæ бахызт палатæмæ, ныфсытæ авæрдта, операци кæмæн скодтой, уыцы рынчыны хиуæттæн. Кæронбæттæны йæхимæ фæнысан кодта, цы курдиæттæ фехъуыста диспансеры кусджытæй, уыдон. Уыдонимæ, хирургийы хайады нæ фаг кæны операциты рæстæг хъæугæ инструменттæ æмæ хуыйæн æрмæг, æмæ æндæр фарстатæ.

ДЕДЕГКАТЫ Зæлинæ, ГУГКАТЫ Жаннæ

ОСТАВЬТЕ ОТВЕТ

Please enter your comment!
Please enter your name here