“Хæлардзинад тауджытæ. Кавказы мæсгуытæ”

0
516

Амæй размæ ма уын куыд хъусын кодтам, афтæмæй ныридæгæн дыууæ къуырийы дæргъы УФ-йы Паддзахадон разамынды университеты ректоры хæдивæг, журналист Руслан ГУСАРОВЫ курдиатмæ гæсгæ нæ республикæйы Туризмы комитеты разамонæг ГАДЖИТЫ Вильям æмæ Мæхъæлы Фæсивæды хъуыддæгты комитеты разамонæг Рамазан УГУРЧИЕВЫ хъæппæрисæй арæзт æрцыд æхсæннационалон фæсивæдон культурон — историон проект «Маяки дружбы. Башни Кавказа». Ацы проекты архайы дыууын студенты, фондз — ирæттæ, фондз — мæхъæлæттæ æмæ дæс та — мæскуыйаг университеттæй. Уыцы дæс мæскуыйаг студентæй фæйнæ къуырийы дæргъы æмбис куыста ирыстойнаг студенттимæ Куырттаты комы Цæлыккаты мæсыджы раз, æмбис та — мæхъæлон студенттимæ Хамхоевты мæсыджы раз. Уый фæстæ мæскуыйæгтæ сæ бынæттæ баивтой.

Проекты сæйраг нысан у Кавказы историон-культурон бынтæ бахъахъхъæныны архайын, алы адæмыхæттыты фæсивæды æхсæн бастдзинад æмæ хæлар ахастытæ парахат кæнын. Уымæй уæлдай проект фæсивæды цымыдис кæны Цæгат Кавказы зæрдылдарæн бынæттæм. Мæскуыйаг студентты базонгæ кодтой Ирыстоны æмæ Мæхъæлы историимæ, сæ адæмты культурæимæ æмæ ‘гъдæуттимæ. Студенттæ сæхæдæг куыд загътой, афтæмæй сын Кавказы цы æгъдау радтой æмæ сæ куыд суазæг кодтой, цы хæлар цæстæй сæм ракастысты дыууæ сыхаг республикæйы дæр, уый сæ зæрдыл дардзысты, цалынмæ цæрой, уæдмæ. Студенттæ æмæ сæ разамонджытæ дыууæ къуырийы, куыд загътам, афтæмæй куыстой мæсгуыты раз. Ссыгъдæг кодтой Цæлыккаты мыггаджы мæсыг, йæ алыварс цы хъамыл æмæ бæрæзе æрзад, уыдонæй. Уый фæстæ нæ республикæйы Культурон объекттæ хъахъхъæныны æмæ пайда кæныны комитеты минæвары разамындæй иу бынатмæ æрæмбырд кодтой, мæсыгæй цы дуртæ æрызгъæлд, уыдон… Сабаты уыд проекты кæронбæттæн бон. Дыууæ къорды дæр баиу сты æмæ схызтысты Чызджыты хохы сæрмæ, ныссагътой дзы проекты тырыса. Изæрæй сын Куырттаты комы АртОтель «Долина солнца»-йы скодтой, бирæ азты ма сæ зæрдыл кæй дардзысты, ахæм изæр. Уазджытæ æмæ фысымтæ кæрæдзийæн арфæ ракодтой æмæ зæрдæ бавæрдтой, ацы проект кæй уыдзæн се стыр хæлардзинады бындур, уымæй, æмæ та иннæ ацафон дæр кæй æнхъæлмæ кæсдзысты кæрæдзи фендмæ.

КАСАТЫ Аламир

ОСТАВЬТЕ ОТВЕТ

Please enter your comment!
Please enter your name here