Культурон хæзнатæ хъæуы хъахъхъæнын

0
531

Ивгъуыд æртыццæджы уыд нæ республикæйы Культурон бынтæ хъахъхъæныны æхсæнадон советы æмбырд. Сæрдариуæг дзы кодта ЦИПУ-йы историон факультеты декан, историон наукæты кандидат ЦУЦИТЫ Аслан. Æмбырдмæ æрбахуыдтой советы уæнгты, æхсæнадон архайджыты æмæ дзыллон хабархæссæг фæрæзты минæвæртты.

Æмбырды фыццаг æрдзырдтой, цæмæй, Беслæны теракты чи фæмард, уыдон цы уæлмæрды ныгæд сты, уый нымад æрцæуа Ирыстоны историон хæзнайыл. Ацы хъуыды бахастой æхсæнадон организаци «Беслæны мадæлтæ»-йы уæнгтæ. — Уыцы хъуыддаг, кæй зæгъын æй хъæуы, хъæугæ у, фæлæ ацы фарстамæ куыдфæндыйы цæстæй кæсæн нæй. Фыццаджыдæр уал ын хъæуы сбарын йæ арæнтæ; сæххæст кæнын, закъонæвæрдмæ гæсгæ цы домæнтæ ис, уыдон; скæнын экспертизæ, цæмæй йын раттæн уа сæрмагонд категори. Æнæуи та архайын хъæуы ууыл, цæмæй йын лæвæрд æрцæуа федералон статус, — загъта йæ раныхасы республикæйы Культурон бынтæ хъахъхъæныны æмæ пайда кæныны комитеты разамонæг Сæлбиты Валери. Æмбырды фæлгæты ма æрдзырдтой нæ горæты зæронддæр хидтæй иу, адæм «трамвайный мост» кæй хонынц, ууыл æмæ Афицерты хæдзары бæстыхайы æдзæллаг уавæрыл. Фæлæ цы хид, цы бæстыхайæн сæ хицæуттæ бæрæг не сты. Кæй куыд фæнды, афтæ хъæццул йæхимæ ивазы. Хиды историйæ куыд рабæрæг, афтæмæй ныридæгæн цалдæр хатты хæлд æмæ арæзт æрцыд. Уынгæ та цы кæнæм? Тар хъæды — тæрсынгæнæн хид. Æрмæст йæ уындæй дæр адæймаджы буар баризы. Йæ быны йын нæ «хорз» минæвæрттæ къахæвæрæн скодтой, йæ æнцайæнтæ тагъд Терчы ныххаудзысты, æмæ сæ дон Гандзамæ фæласдзæн. Уæдæ Афицерты хæдзары уавæр дæр бынтон хорз нæу. Йæ хицау чи у, уый дæлимонты бон дæр нæу сбæрæг кæнын. Иутæ уæй кæнынц, иннæтæ йæ дæрæн кæнынц. Ныр та, дам, Регионы райрæзты банчы дæлбар ис. Æмæ, цалынмæ йæ хицау сбæрæг уа, уæдмæ бæстыхай æбæрæгæй фесæфдзæн. Уæвгæ, дам, цалынмæ арв ныннæра, уæдмæ лæг йæхиуыл дзуæрттæ не ‘фтауы. Æмбырды уынаффæтæй адæймагæн йæ зæрдæ цæмæй барухс уа, ахæм дæр уыд. Рахастой уынаффæ, цæмæй Лисрийы, Сатъаты, Нары, Дзывгъисы, Цымытийы, Къæмынтæйы, æндæр рæтты цы архитектурон комплекстæ ис, уыдон бахæссой, æнæмæнг хъахъхъæнын кæй хъæуы, æмæ сæ амфамбылай аразæн кæмæн ницы ис, ахæм культурон хæзнаты номхыгъдмæ. Уый та уымæн, æмæ абон нæ иуæй-иу «царды хицæуттæ», мæгуыр сæ бон, сæ фындзæй дарддæр ницы уынынц, сæ бон у æхцайæ балхæнын иу кæнæ иннæ къуылдым, кæцыйыл ныгæд уыдзæн, Ирыстонæн йæ рæстæджы ном чи скодта, ахæм лæг, кæнæ та йыл уыдзæн зæппадз, æмæ йæ ахафдзæн, уый фæстæ та дзы сараздзæн йæхицæн галуан. Адæм та баззайдзысты æнæ культурон æмæ историон хæзнайæ, æнæ ивгъуыдæй. Æмбырды кæрон ма паддзахадон бюджетон кусæндон «Наследие Алан»-ы сæргълæууæг Габоты Людмилæ бахаста фæндон, цæмæй, Ирыстонæн стыр лæггæдты чи бацыд, уыцы зындгонд историк, кавказиртасæг Евгения Пчелинайæн Уæлладжыры комы, Уыналы сæрмæ æвæрд æрцæуа цыртдзæвæн.

КАСАТЫ Аламир

ОСТАВЬТЕ ОТВЕТ

Please enter your comment!
Please enter your name here