Фыдбылыз — дохтырты аххосæй

0
523

Хæрз æрæджы Сывæллæтты республикон рынчындоны Зассеты дыууæаздзыд рæзгæ хъæбул Хетæгмæ дохырты ‘рдыгæй афоныл фаг хъусдард кæй не ‘рцыд, уый аххосæй ацы гыццыл сабийыл æнæнхъæлæджы аныгуылд йæ хур. Ацы æнамонд хабар фехъусгæйæ, Ирыстоны цæрджытæй кæй зæрдæ нæ ныккæрзыдта, ахæм нал баззад. Уыцы æвирхъау хабары тыххæй газет «Северная Осетия»-йы 11 октябры номыры рацыд æрмæг «Врачебная ошибка или несчастный случай?». Уый фæстæ нæм Зассеты зианджын бинонтæ æрбахастой ацы æрмæг, куырдтой нæ, цæмæй сын æй рауадзæм нæ ирон газет «Рæстдзинад»-ы дæр. Дæлдæр сын мыхуыр кæнæм се ‘рмæг, куыд нæм æй æрбахастой, афтæмæй.

Зынаргъ газеткæсджытæ! Æнæнхъæлæджы ныл дохтырты аххосæй цы фыдбылыз æрцыд, фæнды мæ уый кой ракæнын. Æртыццæгæхсæвы 28 сентябры изæрæй нæ гыццыл дыууæаздзыд сабийæн йæ тæвд уæлæмæ схызти. Тагъд æххуысы машинæ æрбацыд æмæ йæ ласынмæ дæр нæ хъавыди, йæ хъуыртæ, дам, сырх сты, тæвдæппарæн укол, дам, ын скодтам, æмæ йын ницы уыдзæн. Фæлæ йæ уæддæр хуыздæрæн аласын кодтам. Уымæй размæ, 15 сентябры, йын скодтам анализтæ, æмæ уыдысты хорз, хъыгдаргæ йæ ницы кодта. Сывæллæтты республикон рынчындонмæ йæ куы баластой, уæд æй 9-æм хайады сæвæрдтой. Не ‘намондæн бахаудыстæм, 82 азы кæуыл цæуы, ахæм дохтырмæ. Уым рынчын сывæллæтты ныййарджытæ куыд дзырдтой, афтæмæй сылгоймаг йæхæдæг рынчын у рохнизæй, цыбыр рæстæгмæ дзы айрох вæййы, рынчынтæй кæмæн цы хос кæнын хъæуы, уый. Стæй мæхицæн дæр æнæзонгæ нæ уыд: 15 азы размæ йæм мæ лæппу бахауди, æмæ йæм уæддæр уыдис склероз. Æмæ та йæм мæнæ гъеныр дæр Хетæг куы бахаудис, уæд ын цалдæр хатты скæнын кодта тæвдæппарæн хостæ, æмæ йын æгæр бирæ конд кæй фесты уыцы тыхджын хостæ, уый азарæй нæ саби бабын. Анализтæ йæм куы ‘рбахастой, уæд афтæ, мæ зæрдæмæ, дам, нæ цæуынц, æвæццæгæн, дам, фæрæдыдысты æмæ, дам, сæ ногæй скæнын хъæуы. Æмæ дыууæ боны уыцы анализтæм фенхъæлмæ кастыстæм. Гæнæн ис, æмæ йæм сæ афойнадыл дæр æрбахастой, фæлæ та йæ, æвæццæгæн, айрох сты, уый йеддæмæ фæдис куыд нæ ныхъхъæр кодта, цæуылнæ æрæмбырд кодта дохтырты къорд-консилиум? Æртæ боны дæргъы кæм уыдис хайады сæргълæууæг дохтыр? Цæуылнæ йæм фæдзырдтой сывæллоны фенынмæ? Афойнадыл цæуылнæ сæмбæлын кодтой сывæллоны реанимацийы? Сæйраг дохтыр цæй тыххæй нæ зыдта, 9-æм хайады тыхст рынчын кæй ис, уый? Майрæмбоны сывæллон бынтон ныллæмæгъ ис, æнæхъæн бон йæ цæстытæ æхгæдæй дардта, цыма фынæй кæны, афтæ. Йæ хуыз уыдис фæлурс. Сывæллоны мад та ногæй кæугæйæ бацыд дохтырмæ, цæмæй йæ фена. Йæ риумæ йын байхъуыста, йæ хъуыртæм ын бакаст æмæ, дам, ма гыццыл сырх сты, йæ тæвд, дам, æрхаудта. Изæры 9 сахатыл сывæллоны мад йæ зонгæ дохтырæн бацагурын кодта анализтæ, æмæ сæ куы федта, уæд хорзау нал фæци: сæкæр æрхаудис, лейкоцитты нымæц куынæгмæ цыди, туджы æлхъывдад дæр æрхаудис. Хиуæттæм фæдзырдта мад æмæ ма сæ сæ къæхтыл бæргæ слæууын кодта… Æрбахуыдтой æндæр хайады хистæр дохтыртæй иуы, æмæ сывæллоны ахæм уавæры куы федта, уæд æй æвæстиатæй сæмбæлын кодта реанимацийы. Нæ дохтыртæм иу æнахуыр миниуæг ис — дæ рынчынмæ хивæндæй æндæр дохтыры куы ‘рбакæнай, уæд сын цыма сæ риуы кард ныссадзынц, афтæ зын сын фæвæййы. Реанимацийы кусджытæн Хуыцау раарфæ кæнæд, æгайтма ахæм дохтыртæ ис, æхцайы низ кæй нæ бахордта æмæ сæ рынчынтыл чи мæт кæны, сæ хæс чи ‘ххæст кæны зæрдиагæй. Уæлдай арфæ мæ зæгъын фæнды рады дохтыр Хъуппеты Сергейæн. Куыд федтам, афтæмæй йын дохтыры дæсныдзинад Хуыцауæй лæвæрд у. Тынг архайдтой, сæ бон цы уыдис, уымæй, цæмæй нын нæ гыццыл сабийы фервæзын кæной — суанг райсомы онг нæ уæлхъус лæууыдысты. Фæлæ хуыцаубоны 7 сахатыл нæ чысыл хурыл йæ дуне баталынг ис, 9-æм хайады дохтырты æмæ нæ сывæллоны дзæбæхгæнæг «дохтыры» зивæджы æмæ æнæрхъуыдыйы аххосæй. Диссаг куыд нæ у, сабаты уыйбæрц рынчынфæрсæг адæм куы ‘ртымбыл сты рынчындоны кæрты, уæд иууылдæр катай кодтой, тыхстысты сывæллоны хъысмæтыл. Фæлæ уыйхыгъд 9-æм хайадæй иунæг дохтыр дæр не ‘рхызт сывæллоны бæрæггæнæг. Нæ сывæллоны дзæбæхгæнæг «дохтыр» та уый бæсты, цыма йыл базыртæ базади, уыйау лидзынмæ фæци курдиат фыссынмæ, улæфынмæ ацæуыны ‘фсонæй, стырзæрдæйæ, ницæуыл мæтгæнгæйæ. Уæд та йæм фыны нæ гыццыл Хетæг æрбацыд æмæ йæм йæ чысыл къухтæ куы бадаргь кæна æмæ йæ куы бафæрса: «Цы мын бакуыстай? Цæмæн мæ бабын кодтай? Цы аххосджын уыдтæн дæ разы?» — уæд ын цы ‘фсон хъуамæ скæна, йæхи куыд хъуамæ сраст кæна йæ разы? Иууылдæр сæ йæ зивæджы æмæ йæ кары аххос фæкæндзæн? Æз дис кæнын ууыл, йæ бинонтæ йæ афтæмæй куыд уагътой кусынмæ, сæхицæй йын куыд ничи бауайдзæф кодта, искæй куы бабын кæнай, æмæ куы фæтуджджын уæм, зæгъгæ. Æз æлгъитгæ никæй кæнын, фæлæ сын Хуыцау тæрхонгæнæг фæуæд, махæн не суинаг кæстæр кæй тыххæй бабын ис, уыдонæн. Беслæны цауты фæстæ æз æнхъæл уыдтæн, нæ чысыл хурты цардæн аргъ кæнын базондзыстæм, фæлæ, куыд рабæрæг, афтæмæй нæ уыцы æвирхъау бæллæх дæр ницæуыл сахуыр кодта. 9-æм хайады рынчын сывæллæтты ныййарджытæ нæм телефонæй æрбадзырдтой æмæ афтæ зæгъынц: “Хетæджы фæстæ, дам, нæм афтæ æркаст ис, æмæ диссаг, кæннод, дам, мах дæр æдас нæ уыдыстæм, æвæгæсæгæй сыл исты куы ‘рцæуа, уымæй”. Цымæ сæ Хетæджы размæ цы хъыгдæрдта, цы хæс сыл æмбæлы рынчынты раз, уый кæронмæ æххæст кæнынæн!? Сæйраг дохтыры куы бафарстон, ахæм кардзыд дохтыры цæмæн дарут, йæхи дохтыры ‘ххуыс куы хъæуы, зæгъгæ, уæд мын афтæ: “Закъон, дам, уыдоны фарс у, нæй сын куыстæй æрвитæн, хъасты гæххæтт сыл куы ничи ныффысса, уæд. Хъастгæнджытæ та æрмæст ныхæстæй бамбарын кæнынц сæ хъаст”. Нæ сывæллоны дзæбæхгæнæг «дохтырмæ», дам, иу къуырийы размæ басидтæн æндæр рынчыны тыххæй æмæ йæ фæстаг хатт бафæдзæхстон. Æмæ йæ, зæгъын, фæлтау уæд куы арвыстаис, уæд мах дæр нæ бабын кодтаид. Æз пенсиисæг дохтырты ныхмæ нæ дæн, бирæтæ дзы сты фæзминаг сæ зонындзинæдтæ æмæ сæ куырыхондзинадæй кæстæртæн, фæлæ… Нæ саби нал ис махæн, фæлæ мæ зæгъын фæнды, Ирыстон ахæм æнамонддзинадæй хызт куыд уа, дохтырты æвæгæсдзинады аххосæй куыд ничиуал бабын уа.

ЗАССЕТЫ Болат

ОСТАВЬТЕ ОТВЕТ

Please enter your comment!
Please enter your name here