«Адæм уазал фатерты бадой, уымæн быхсæн нæй»

0
507

Зымæджы хъармгæнæн рæстæджы райдайæнимæ бастæй Дзæуджыхъæуы цы уавæр сæвзæрд, ууыл знон Республикæ Цæгат Ирыстон-Аланийы Сæргълæууæг БИТАРТЫ Вячеслав æрныхас кодта республикæйы сæйраг горæты бынæттон хиуынаффæйады администрацийы сæргълæууæг ÆЛБЕГАТЫ Барисимæ.

Хъармгæнæн сезон Дзæуджыхъæуы райдыдта 14 октябры, фæлæ уавæр бынтон нывыл нæма у, хъарм æппæт хæдзæрттæм нæма хæццæ кæны. Уымæн æвдисæн — горæты цæрджыты бирæ хъæстытæ, уыимæ, адæм æрбадзурынц республикæйы Сæргълæууæджы телефонмæ дæр. Битарты Вячеслав куыд фæнысан кодта, афтæмæй ахæм уавæрæн быхсæн нæй æмæ бадомдта, цæмæй æппæт хæдзæрттæ æмæ æндæр социалон объекттæ дæр æвæстиатæй хъармæй ифтонг æрцæуой. «Фæстаг цалдæр боны дæргъы мæм бирæ дзурджытæ ис, адæм хъаст кæнынц, бирæфатерон хæдзæртты, рæвдауæндæттæ æмæ скъолаты уазал кæй у, уымæй. Хъуыддаг цæй мидæг ис? Кæд уæ исты æххуыс хъæуы, уæд æй зæгъут, фæлæ уавæр банывыл кæнын хъæуы», — загъта Битарты Вячеслав. Æлбегаты Барис зæрдæ бавæрдта, уавæрмæ бæстон цæстдард кæй ис, уымæй. Йæ ныхасмæ гæсгæ, зноны бонмæ цæрæн хæдзæрттæ æмæ социалон инфраструктурæйы æппæт иннæ объекттæм дæр хъарм лæвæрд æрцыд. «Знон æрæмбырд кодтон хæдзæртты хицæутты æмбаладты æмæ разамонæг компаниты минæвæртты, бахæс сын кодтон, цæмæй ма ноджыдæр иу хатт æркæсой алкæцы хæдзары уавæрмæ дæр», — загъта горæты администрацийы сæргълæууæг. Кæронбæттæны Битарты Вячеслав куыд фæнысан кодта, афтæмæй цыбыр æмгъуыдмæ фарста хъуамæ нывылгонд æрцæуа. «Æвæстиат мадзæлтты фæрцы фарста алыг кæнын хъæуы. Адæм уазал фатерты бадой, уымæн быхсæн нæй», — загъта республикæйы Сæргълæууæг.

РЦИ-Аланийы Сæргълæууæджы æмæ РЦИ-Аланийы Хицауады пресс-службæ

ОСТАВЬТЕ ОТВЕТ

Please enter your comment!
Please enter your name here