Гæззаты Батрадз фесгуыхт Хасавюрты

0
538

Дагестайнаг горæт Хасавюрты 15-16 октябры уæгъдибар хъæбысхæстæй цыдысты континентты ‘хсæн Кубок рамбулыныл ерыстæ.

Дагестанмæ Кубок рамбулынмæ æрбацыдысты Польшæйы, АИШ-ы, Азербайджаны, Белорусы, Казахстаны, Украинæйы æмæ Уæрæсейы богæлттæ. Ерысты уæлахиздзау, майдан, Кубок æмæ æхцайы премийæ уæлдай æмбылдта дунеон турнир Гран-при «Иван Ярыгинмæ» балцæг дæр. Ирон богæлттæй дзы фесгуыхт Гæбæраты Аслан æмæ Хъайсынты Георгийы хъомылгæнинаг Гæззаты Батрадз. Батрадз гауызмæ рацыд цыппар хатты æмæ йæ цыппар ныхмæлæууæгыл дæр фæуæлахиз æнæдызæрдыгæй. Уæлдай хъазуатондæр рауад йæ кæронбæттæны фембæлд. Йæ ныхмæлæууæг уыд америкаг тыхджын уæззаууæзон богал Николас Гвяздиковски. Гæззайыфыртæн бантыст Гвяздиковскийыл 2:1 хыгъдæй фæуæлахиз уæвын æмæ ссис 125 килограммы онг уæзы Кубок рамбулæг. Батрадзы тренер Гæбæраты Аслан зæгъы: «Гæззайы-фырт Хасавюрты равдыста стыр хъару. Йæ ныхмæлæуджыты ‘хсæн уыдысты фарон æмæ ацы аз Уæрæсейы тыхджындæр уæззаууæзонтыл нымад чи уыд, уыцы богæлттæ дæр, фæлæ уыдоныл дæр фæуæлахиз æнæкъуылымпыйæ. Уæдæ йæ кæронбæттæны ныхмæлæууæг дæр хуымæтæг богал нæ уыд. Иу ныхасæй, Батрадзы архайдæй, æз, куыд йæ тренер, баззадтæн тынг разыйæ». Нæ арфæтæ Батрадз æмæ Гæбæраты Асланæн. Хуыцау зæгъæд æмæ Гæззайы-фыртæн уæззау уæзы ноджы стырдæр уæлахиздзинæдтæ куыд бантыса!

БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here