Кафт æмæ хæлардзинады фестиваль

0
465

Уазæгуарзаг Ирыстон та ногæй йæ «дуæрттæ» уæрæх байгом кодта хореографион аивады курдиатджын къордтæн. Æвдæм хатт нæм зæрдиагæй æрцыдысты кафты дæснытæ, канд сæ аивад æмæ национ культурæ равдисыны тыххæй нæ, фæлæ хæлардзинады тæгтæ фидардæр кæнынмæ.

Æппæтадæмон фестиваль «Зори «Алании»-йæн бындур сæвæрдта не ‘мзæххон, УФ-йы аивæдты сгуыхт кусæг Уарзиаты Хадзысмел. Уый проектмæ гæсгæ ацы мадзал фыццаг хатт арæзт æрцыд 1990 азы. Уæдæй абонмæ дзы бирæ сфæлдыстадон къордтæ архайдтой Уæрæсе æмæ фæсарæйнаг бæстæтæй — Казахстанæй, Балти æмæ Фæскавказы республикæтæй, Украинæ, Польшæ, Югослави, Франц, Итали æмæ Болгарийæ. Ацы аз нæм æрцыдысты кафæг къордтæ, «Узорыца» (Белорусси); «Кудры» (Абхазы республикæ); «Оровел» (Сомихы республикæ); «Амонд» (Республикæ Хуссар Ирыстон). VII Æппæтадæмон фестиваль «Зори Алании»-йæн фадæттæ сарæзтой Цæгат Ирыстоны Культурæйы министрад æмæ Традицион культурæ æмæ этнотуризмы республикон центр «Фарн». Йе ‘ххуысы хай бахаста УФ-йы Культурæйы министрад дæр. Фестиваль байгом кодтой æмæ уазджытыл сæмбæлдысты нæ республикæйы Сывæллæтты сфæлдыстадон къордтæ кафт «Симд»-æй. Уый фæстæ фестивалы архайджытæн РЦИ-Аланийы культурæйы министр Сихъоты Тимур зæрдиаг арфæтæ ракодта æмæ радзырдта, ахæм мадзæлттæ ахъаззаг кæй сты алы адæмты ‘хсæн хæлар ахастдзинæдтæ аразынæн, уый тыххæй. Министр загъта: — Абон цы рæсугъд бæрæгбон ис Ирыстоны, уымæй ма æхсызгондæр цы уа. Уарзиаты Хадзысмел ацы фæрнджын хъуыддаг саразынвæнд куы скодта, уæд уый хуымæтæджы хъæппæрис нæ уыдис. Мастер хорз зыдта, кафты «æвзагыл» дунейы цæрæг адæмты дæр æрбангом кæнæн кæй ис, сабырдзинад æмæ æфсымæрон ахастдзинæдтæ ноджы фидардæр кæй кæнынц, æппæт адæмтæ кæрæдзи æгъдæуттæ æмæ культурæ базонынмæ куыд фæбæллынц, уыцы æнкъарæнтæ сæвзæрынæн. Кæрæдзимæ куы нæ цæуæм, кæрæдзи куы нæ зонæм, уæд уый цæй цард у. Æхсæнадæн дæр уæд нывыл схонæн нæй. Æмæ ныр бирæ азты дæргъы Хадзысмелы фестивалы арæнтæ иу хаттæй иннæмæ уæрæхдæр кæнынц. Дунескæнæг нын ахæм амонд раттæд, æмæ кафты æппæтадæмон бæрæгбонæн кæрон куыд никуы уа. Кæрæдзи цæхх æмæ къæбæр саходынæн нын æхсызгон æфсæнттæ куыд уа, сабырдзинад æмæ халардзинадыл æмдыхæй, æмзондæй куыд архайæм. Традицион культурæ æмæ этнотуризмы республикон центр «Фарн»-ы разамонæг Цæриаты Валери дæр арфæ ракодта фестивалы архайджытæн. Ныстуаны хуызы курдиатджын лæппутæ æмæ чызджытæн бафæдзæхста кафын, сценæ уарзын æмæ кæрæдзийæн аргъ кæнын. Белоруссийы республикæйæ нæм афтид армæй не ‘рцыдысты. Кафджыты къорд æрластой, сæхимæ Городейаг сæкæры комбинаты продукцийы равдыст. Алкæмæндæр йæ бон уыдис белоруссаг вареннæ, адджын дæттæ æмæ сæкæры алы хуызтæй саходынæн. Уæлдай тынгдæр се ‘ппæтæн дæр сæ зæрдæмæ фæцыд бæрзы дон. Зæрдиагæй йæ нуæзтой фестивалы архайджытæ. Белоруссаг уазджытæ куыд радзырдтой, афтæмæй сæ фæнды Ирыстонимæ базарады фарстайыл бацархайын, кæрæдзи продукци дыууæ республикæйы адæмæн базонын кæнын. VII Æппæтадæмон фестиваль «Зори Алании» цæудзæн æртæ боны. Кафджыты къордтæ сæ аивадæй барухс кæндзысты нæ республикæйы районты цæрджыты зæрдæтæ дæр.

САУТÆТЫ Тамилæ

ОСТАВЬТЕ ОТВЕТ

Please enter your comment!
Please enter your name here