Къоста æмæ сабитæ

0
700

Æвæццæгæн æмæ ма иу цалдæр æнусы куы рацæуа, уæддæр цалынмæ зæххыл ирон лæджы къах ‘ндзæва, уæдмæ Шекспиры, Байроны, Руставелийы, Пушкины æмæ æндæр стыр фысджыты æмрæнхъ нæ уыдзæн рох ирон адæмы хуыздæр хъæбулты минæвар, поэт, профессионалон нывгæнæг Хетæгкаты Къостайы ном. Æрвылаз дæр Хетæджы-фырты райгуырæн бон Ирыстоны фæбæрæг кæнынц хъарутыл нæ ауæрдгæйæ. Культурæты галуантæ æмæ хæдзæртты, рæвдауæндæттæ æмæ скъолаты айхъуысынц Къостайы зæрдæриссынгæнæг æмæ цинхæссæг æмдзæвгæтæ. Уыдоны æмрæнхъ Алагиры скъола-интернат дæр.

Ахуыргæнæндоны директор Хъæцмæзты Аланы, ахуырадон куысты хæдивæг Æмбалты Анжелæ æмæ хъомыладон куысты хæдивæг Реуазты Дзерассæйы разамындæй скъолайы æппæт ахуыргæнджытæ æмæ хъомылгæнджытæ æнæвгъауæй канд зонындзинæдтæ нæ дæттынц сæ ахуыргæнинæгтæн, фæлæ ма кæнынц ахадгæ хъомыладон куыст дæр, кæцыйы уæлдай бынат ахсынц культурон æмæ аивадон мадзæлттæ. Къостайы райгуырды 157 азы бонмæ сæхи бацæттæ кодтой уæлдай аивдæрæй. Сабиты фарсмæ балæууыд скъола-интернаты чиныгдоны сæргълæууæг Цомайты Фатимæ, йæ разамындæй бацæттæ кодтой бæрæгбоны изæр. Иумæ равзæрстой Къостайы æмдзæвгæтæ, бацæттæ кодтой чингуыты цæстуынгæ равдыст, æмдзæвгæ «Сидзæргæс»-ы бындурыл скодтой театралон инсценировкæ. Сывæллæттæ уæлдай цымыдисæй кастысты Къостайы къухфыстытæм æмæ йæ конд нывтæм. Бæрæгбон амыдтой фæндзæм къласы ахуыргæнинæгтæ Дианæ Савельева æмæ Рæмонты Сæрмæт. Гыццыл Дианæ кæд уырыссаг чызг у, уæддæр йæ аив ирон ныхас зæрдæмæ арф хъардта. Сывæллæттæ цы æмдзæвгæтæ бакастысты, уыдон иууылдæр уыдысты арфхъуыдыджын æмæ бæстон æвзæрст. Фæлæ бæрæгбоны уазджыты зæрдæмæ уæлдай тынгдæр фæцыд, сывæллæттæ «Сидзæргæс»-ы бындурыл цы чысыл театралон равдыст бацæттæ кодтой, уый. Сидзæргæсы фæлгонц скодта 4-æм къласы ахуыргæнинаг Гаматы Аидæ, æппæты кæстæр сывæллон та сдзырдта 1-æм класы ахуыргæнинаг Æмбалты Зæринæйы хъæлæсæй. Сывæллæтты аив дзырдарæхстмæ хъусгæйæ зын бамбарæн нæ уыд, ацы скъолайы ирон æвзаг, йæ ахуыр кæнын бæрзонд къæпхæныл æвæрд кæй сты, уый. Уымæн ирд æвдисæн уыд, 5-æм къласы ахуырдзау Дзеранты Батрадз Къостайы сурæт куыд ахъазыд, уый. Йæ размæ æвæрд хæсмæ афтæ бæрнонæй бацыд, æмæ йæ алы змæлд дæр уыд æххæст лæджы хуызæн. Бæрæгбонмæ æрбацæуджытæй бирæтæ ракодтой сывæллæттæн арфæтæ. Уыдонимæ хъомылгæнджытæ Бутаты Аллæ, Атайты Альбинæ, Колыты Маринæ. Маринæ цыппор фондз азы йæ цардæй радта ацы скъолайæн. Уый загъта: “Ацы бæрæгбон хорз кæй рауад, уый мын тынг æхсызгон у. Уый тыххæй æмæ та ацы хатт дæр нæ хъомылгæнинæгтæй мæ зæрдæ барухс. Уынын æй, куыд тырнынц зонындзинæдтæм, уый. Сæ тырнындзинады фæндагаразджытæ та сты сæ ахуыргæнджытæ æмæ хъомылгæнджытæ. Уыдон кæддæриддæр æнæзивæгæй сæ ахуыргæнинæгтимæ сæхи бацæттæ кæнынц кæцыфæнды бæрæгбонмæ дæр. Уæлдайдæр та Къостайы райгуырæн бонмæ. Уымæн æмæ Къостайы райгуырд æцæгдæр у ирон адæмæн стыр бæрæгбон. Бузныг уын, æмæ уæ къухы фылдæр æнтыстдзинæдтæ æфтæнт». КАСАТЫ Аламир

ОСТАВЬТЕ ОТВЕТ

Please enter your comment!
Please enter your name here