Арфæтæ — Мæхæмæтты Ахуырбегæн

0
405

30 октябры йæ 80 азы бон сбæрæг кодта историон наукæты доктор, профессор, Цæгат Ирыстоны Хетæгкаты Къостайы номыл паддзахадон университеты президент МÆХÆМÆТТЫ Ахуырбег. Юбиляры кадæн æмбырд арæзт æрцыд ЦИПУ-йы Культурæйы галуаны. Мæхæмæты-фыртæн уыцы бон арфæтæ чи ракодта, уыдонимæ уыд Цæгат Ирыстоны Сæргълæууæг БИТАРТЫ Вячеслав дæр.

Республикæйы разамонæг йæ раныхасы куыд фæбæрæг кодта, афтæмæй Мæхæмæтты Ахуырбег йæ куысты азты дæргъы бацæттæ кодта, ныртæккæ нæ бæстæ æмæ фæсарæнты дæр æнтыстджын куыст чи кæны, уыцы дæсны специалистты цалдæр фæлтæры. «Ды студенттæм алкæддæр дарыс хорз зæрдæйы ахаст, лæмбынæг æмæ бæстон кусыс семæ. Республикæйы Парламенты демæ цы азтæ бакуыстон, уыдоны рæстæджы иу æмæ дыууæ хатты нæ банкъардтон, адæймаджы сæйрагдæр миниуджыты ‘хсæн дæуæн адæмы раз æнæкъæмдзæстыг æмæ дзырддзæугæ уæвын ахсджиаг кæй сты, уый. Дæ куырыхон ныхас алкæддæр вæййы йæ рæстæгыл. Дæу зонынц Ирыстоны, дæуæн аргъ æмæ кад кæнынц иннæ республикæты дæр», — загъта Битарты Вячеслав. Цæгат Ирыстоны Сæргълæууæджы Указæй дæсны специалисттæ цæттæ кæныны хъуыддагмæ стыр бавæрæн æмæ бирæазон пайдайаг куысты тыххæй Мæхæмæтты Ахуырбегæн лæвæрд æрцыд республикæйы сæйрагдæр хæрзиуæг — орден «Ирыстоны Намыс». Хуссар Ирыстоны цæрджыты номæй юбилярæн арфæ ракодта республикæйы Президент Тыбылты Леонид. «Зындгонд ахуыргонд, ирон наукон интеллигенцийы ирддæр минæвæрттæй иу, йæ цард æрыгон ахуыргæндты цæттæ кæнынæн чи снывонд кодта, уыцы Мæхæмæты-фырт алкæддæр архайы фыдыбæстæйаг наукæйы рæсугъд традицитæ бахъахъхъæнын æмæ фæхъæздыгдæр кæныныл. Дæ архайды фæрцы абон Уæрæсейы алы къабæзты кусынц Хуссар Ирыстоны минæвæрттæ дæр», — йæ раныхасы фæбæрæг кодта Тыбылты Леонид. Уый фæстæ республикæйы зындгонддæр сфæлдыстадон коллективтæ юбиляры кадæн радтой стыр концерт.

Нæ уацхæссæг

ОСТАВЬТЕ ОТВЕТ

Please enter your comment!
Please enter your name here