Йæ цард, йæ хъысмæт — йæ уацмыстæ

0
578

Фыссæджы йæ дзыллæйы уарзты хорзæх куы уа, уæд уымæй стырдæр хæрзиуæг нæ хъæуы дзырдаивады дæсныйы. РЦИАланийы адæмон фыссæг, Хетæгкаты Къостайы номыл паддзахадон премийы лауреат, Уæрæсейы Федерацийы Фысджыты цæдисы уæнг, публицист АГЪНАТЫ Гæстæн уыцы æрдхæрæны хæрзиуæгæй раджы кæй фæхайджын, уымæн ирд æвдисæн уыд, Национ наукон библиотекæйы йын бæстæзонæн хайады хъæппæрисæй цы зæрдæмæдзæугæ фембæлд арæзт æрцыд, уый. Æрбацыдысты йæм фысджытæ, литературæиртасджытæ, ахуыргæнджытæ, студенттæ, скъоладзаутæ, Гæстæны хæстæджытæ, зонгæтæ æмæ чиныгкæсджытæ.

Фембæлды райдайæны уазджытæ федтой Агънаты Гæстæны цардыл æмæ сфæлдыстадон фæндагыл дзурæг видеослайдтæ. Уый фæстæ фембæлд йæ цыбыр, фæлæ мидисджын раныхасæй байгом кодта газет «Рæстдзинад»-ы сæйраг редакторы хæдивæг Колыты Иринæ. Уый ныхасы бар радта Гæстæны æмхъæуккаг, РЦИАланийы адæмон æмæ Уæрæсейы Федерацийы сгуыхт нывгæнæг, Хетæгкаты Къостайы номыл паддзахадон премийы лауреат Дзбойты Михалæн: — Æз Гæстæнимæ рагæй зонгæ дæн. Йæ радзырдты фыццаг чиныг «Кæстæр чындз»-æн йæ нывгæнæг дæр æз уыдтæн, — загъта Михал, — уæдæй абонмæ йын йе сфæлдыстадмæ мæ хъус дарын, йæ уацмыстæ йын кæсын æхсызгон æмæ цымыдисæй. Йæ ног роман «Темыры кæстæр чызг» журнал «Мах дуджы» куы цыди, æз æй уæд дæр бакастæн, хицæн чиныгæй куы рацыд, уæд дæр ыл æхсызгонæй сæмбæлдтæн. Ацы уацмысы нæ абоны æхсæнады уавæр йæ цинтæ æмæ риссæгтимæ автор иттæг хорз равдыста. Æвзæр нæ уаид ацы роман пьесæйы æвзагмæ раивын æмæ йæ Ирон академион театры сценæйы сæвæрын. Мæнмæ гæсгæ дзы рауаид хорз спектакль. Театрдзаутæ йæм æхсызгонæй кæсиккой. Уый фæстæ фембæлды раныхас кодта Хетæгкаты Къостайы номыл паддзахадон премийы лауреат, РЦИАланийы адæмон поэт, журнал «Ногдзау»-ы сæйраг редактор Дзасохты Музафер: — Гæстæн хорз лæг æмæ хорз фыссæг кæй у, ууыл дзурæг у, ацы фембæлдмæ цас адæм æрбацыд, уый, — загъта Музафер. — Махæн у хорз хæлар, стæй журнал «Ногдзау»-ы редколлегийы уæнг. Стыр æххуыс нын кæны прозæйы. Мæ курдиатмæ гæсгæ ныффыста зæрдæмæдзæугæ радзырд «Бæх куыдта». Журнал «Ногдзау»-ы йæ ныммыхуыр кодтам, æмæ йæ сабитæ æхсызгонæй бакастысты. Уæдæ йæ ног чиныг «Темыры кæстæр чызг» Хетæгкаты Къостайы номыл преми райсыныл конкурсы кæй архайдта æмæ йыл куыд къамисы уæнг, афтæ кæй схъæлæс кодтон, ууыл нæ фæсмон кæнын. Агънаты Гæстæны сфæлдыстадон архайды æмæ йæ роман «Темыры кæстæр чызг»-ы тыххæй ма зæрдæагайгæ ныхæстæ загътой Дзæуджыхъæуы Хетæгкаты Къостайы номыл 13æм астæуккаг скъолайы дирекор, РЦИ-Аланийы сгуыхт ахуыргæнæг Сæлбиты Иринæ, филологон наукæты кандидат, литературæиртасæг Тъехты Тамерлан. Агънаты Гæстæны уацмысты хъомыладон ахадындзинады, стæй сын ахуырадон программæты цы бынат ис, уыдæтты тыххæй сæ хъуыдытæ загътой Сунжæйы хъæуы астæуккаг скъолайы ирон æвзаг æмæ литературæйы ахуыргæнæг Багаты Еленæ, Дзæуджыхъæуы 24-æм астæуккаг скъолайы ирон æвзаг æмæ литературæйы ахуыргæнæг Бичилты Антонинæ, Дзæуджыхъæуы 5-æм скъола-гимназы ирон æвзаг æмæ литературæйы ахуыргæнæг Дзоблаты Светланæ. Агънаты мыггаджы номæй фембæлд саразджытæн æмæ уазджытæн зæрдиаг арфæ ракодта Агънаты Георги. Кæронбæттæн ныхасы бар лæвæрд æрцыд Агънаты Гæстæнæн. Уый бæлвырд æмæ мидисджынæй радзырдта йæ ног сфæлдыстадон фæндты тыххæй, стæй дзуапп радта фембæлды архайджыты фæрстытæн. Фембæлдмæ æрбацæуджыты зæрдæтæ йæ аив фæндыры цагъдæй барухс кодта Дзæуджыхъæуы Гергиты Валерийы номыл аивæдты колледжы студенткæ Лианты Регинæ. Фембæлды фенæн уыд Агънаты Гæстæны чингуыты æмæ йе сфæлдыстадыл фыст критикон, публицистон æрмæджыты равдыст.

ГАСАНТЫ Валери

ОСТАВЬТЕ ОТВЕТ

Please enter your comment!
Please enter your name here