Андиаты Сосланы номыл 38-æм турнир

0
509

Ирыстоны Олимпаг хъæзтыты фыццаг уæлахиздзау Андиаты Сосланы номыл турнир фыццаг хатт уыд 1978 азы. Уæд уыцы фæнд бахастой спортивон æхсæнад «Динамо»-йы кусджытæ.

Тренер Бекмæрзты Константин æмæ консультант Михаил Зильберманы хъæппæрис хорз фæкаст куыд нæ республикæйы мидхъуыддæгты разамонджытæм, афтæ спортивон æхсæнадмæ дæр, æмæ фыццаг хатт Андиаты Сосланы номыл турнир уæгъдибар хъæбысхæстæй ацыд «Динамо»-йы спортивон залы. Турнир рауад арфæйаг æмæ куыдфæстæмæ ссис Æппæтцæдисон. Ацы аз 4—5 ноябры нæ таурæгъон богал, Олимпаг хъæзтыты дыууæ хатты уæлахиздзау, дунейы цыппар хатты чемпион, ССР Цæдисы авд хатты чемпион Андиаты Сосланы номыл турнир нæ республикæйы сæйраг спортивон галуан «Манеж»-ы цыди 38-æм хатт. Куыд алы хатт, афтæ та ацы аз дæр Дзæуджыхъæумæ алы рæттæй æрбацыдысты бирæ уазджытæ. Ирыстоны богæлттæй уæлдай гауызмæ рацыдысты Цæгат Кавказы республикæты, Мæскуыйы, СанктПетербурджы, Ханты-Мансийскы, Абхазы, Сомихы, Казахстаны минæвæрттæ. Турнир бæрæгбонхуызæй гом кæнгæйæ, спортсментæн, тренертæн, уазджытæ æмæ спортуарзджытæн зæрдиаг арфæ ракодтой РЦИ-Аланийы Хицауады Сæрдар Тускъаты Таймураз, Андиаты Сослан, Олимпаг хъæзтыты уæлахиздзаутæ Хæдарцаты Махар æмæ Бæройты Хасан. Зындгонд цæцæйнаг богал, дунейы цыппар хатты чемпион Салман Хасимиков кæддæр гауызыл уыди Сосланы тыхджындæр ныхмæлæууæг, царды та уыдысты стыр лымæнтæ. Уый тыххæй Салман загъта: «Махæн, Советон Цæдисы иугонд командæйы уæвгæйæ, Сослан уыди нæ уарзон æфсымæрау. Æз мæхицæн кадыл нымадтон Сосланæн гауызыл хæцгæйæ фæхæрд уæвын дæр, уымæн æмæ уый мах æнгомгæнæг уыди. Йæ æгъдау æмæ цæстуарзондзинад нын фæзминаг уыдысты. Сосланы номыл турнирмæ æрбацæуын æз мæхицæн нымайын стыр æхсызгон хæсыл». Ерысты æдæппæт цы 250 богалы архайдтой, уыдоны ‘хсæн уыди къорд зындгонд дунеон мастеры. Кæй зæгъын æй хъæуы, ахæм ерысты фæуæлахиз уæвын æнцон нæу. Иннæмæй та ахæм уавæр спортуарзджытæн æхсызгондзинад хæссы. Афтæ рауад ацы хатт дæр. Ерыстæ цы аст уæзы цыдысты, уым алкæцыйы дæр фыццаг бынат бацахсыныл цыди ахъаззаг тох. Æппæты рогдæр уæзы (57 кг) уæлахизмæ чи тырныдта, уыдонæй кæронбæттæнмæ рацыдысты мæскуыйаг спорты мастер Мурат Тезадов (йæ тренер Рæмонты Станислав) æмæ Цогойты Асланы хъомылгæнинаг Сабанты Алыксандр. 18-аздзыд Сабаны-фырт фидар ныхкъуырд радта йæ ныхмæлæууæгæн, фæлæ уый фæлтæрдджындæр кæй уыди, уый æппынфæстаг фæзынд сæ ныхмæлæудыл. Цымыдисаг тох ахицæн 13:9 хыгъдæй Тезадовы пайдайæн. 61 кг уæзы кæронбæттæнмæ рацыдысты дагестайнаг богæлттæ Рамазан Ферзалиев æмæ Ислам Мажитов. Фæлæ Ислам, æрдæгкæронбæттæны хæцгæйæ, йæ къух кæй ныццавта, уый тыххæй сæ фембæлд нæ рауад. Афтæмæй 1-аг бынатмæ рацыд Рамазан Ферзалиев. 70 кг онг уæзы дæр фыццаг дыууæ бынаты бацахстой дагестайнаг богæлттæ Гитинмагомед Гаджиев æмæ Муртуз Муслимов. Ацы уæзы æвзæр нæ архайдтой нæ æрыгон богæлттæ Томайты Знауыр æмæ Джиголаты Сослан. Фæлæ дыууæйæ дæр бацахстой 3-аг бынæттæ. Тынг цымыдисаг рауадысты 65 кг онг уæзы хæцæг богæлтты ерыстæ. Ацы уæзы æрдæгкæронбæттæны тохтæм рацыдысты: ирыстойнаг богал Томайты Арсен, мæскуыйаг Рæмонты Гамлет, дагестайнаг дунеон спорты мастер АлибекГаджи Эмеев æмæ казахстайнаг Асхат Слямханов. Эмеев æмæ Рæмоныфырт сæ ныхмæлæуджытыл куы фæуæлахиз сты, уæд кæронбæттæны фембæлдысты фыццаг бынат бацахсыныл тохы. Ацы цымыдисаг фембæлды Эмеевы къухы бафтыд иунæг балл фылдæрæй рамбулын 5:4 хыгъдæй. Асхат Слямханов æмæ 17аздзыд Томайты Арсен та бацахстой 3-аг бынæттæ. 74 кг онг уæзы ирыстойнаг богæлттæй никæмæн бантыст призон бынат бацахсын. Ам 1-аг бынат бацахста Магомед-Хаджи Кадимагомедов (Дагестан), 2-аг бынатмæ рацыди Таджи Даудов (Санкт-Петербург), 3-аг бынæттæ та бацахстой Аманула Гаджимагомедов (Дагестан) æмæ Муса Базиев (Цæцæны республикæ). Ирыстоны богæлттæн 1аг бынæттæ бацахсын бантыст фæстаг æртæ уæзы. 86 кг онг уæзы ирон богæлттæ цалдæрæй тырныдтой уæлахизмæ. Æппынфæстаг кæронбæттæнмæ рацыдысты Уалыты Владислав (йæ тренер Дедегкаты Хъазыбег) æмæ дагестайнаг богал Магомед Курбанов. Сæ ныхмæлæуд рауад хъазуатон. Уалыйыфырт размæ бырсыныл бæргæ фылдæр архайдта, фæлæ Курбанов тынг къæрцхъус уыди æмæ йæхимæ хæстæг баирвæзын нæ уагъта. Тæрхонгæнæг дыууæ хатты фæивар кодта Курбановы, йæхи хъæбысхæстæй кæй фæлывта, уый тыххæй, æмæ афтæмæй Уалыты Владислав фæуæлахиз 2:0 хыгъдæй. Ацы уæзы 3-аг бынæттæ бацахстой Мæхъиты Зауыр æмæ Найфонты Артур. Æрдæгуæззау уæзы (97 кг) йæ ныхмæлæуджытæй зынгæ тыхджындæрæй йæхи равдыста Коциты Знауыр. Уый йæ æппæт фембæлдтыты дæр фæуæлахиз рæстæгæй раздæр. Афтæ кæронбæттæны дæр. Ам йæ ныхмæлæууæг уыди зындгонд абхазаг богал Раш Хутабæйы фырт Бажгур Хутаба. Зæгъын хъæуы уый, æмæ Бажгур ныр æртыккаг аз цæры æмæ йæхи фæцæттæ кæны Ирыстоны Тедеты Валичы разамындæй. Знауыр æмæ Бажгуры фембæлд ахицæн Коцийыфырты уæлахизæй фембæлды фыццаг æмбисы. Ацы уæзы æртыккаг бынæттæм рацыдысты Чертыхъоты Гурам æмæ Джыккайты Тамерлан. Турниры сæйраг лæварыл ерысы бацыдысты 12 уæззаууæзон богалы. Ацы уæзы йæ рæстæджы стыр бæрзæндтæм схызт Андиаты Сослан. Фыццаг бынат бацахсæг сыгъзæрин майданæй уæлдай хъуамæ рамбылдтаид автомобиль «Лада-Калина» дæр. Уыцы лæвар ныр цалдæр азы йæхи хардзæй скæны зындгонд амалхъом адæймаг, ныртæккæ та нæ республикæйы æрдзон фæрæзтæ æмæ экологийы министры хæстæ рæстæгмæ æххæстгæнæг Мамиаты Чермен. Уæззаууæзон богæлттæ иууылдæр тырныдтой сæ хуыздæр миниуджытæ равдисынмæ, Сосланы зæрдæ сæ архайдæй барухс кæнынмæ. Кæддæр, ацы уæзы хæцгæйæ, Андиаты Сослан йæ цырд æмæ дæсны æвнæлды фæрцы иу æмæ дыууæ хатты нæ фæуæлахиз дунейы тыхджындæр богæлттыл. Йæ ныхмæлæуджытæй-иу Сосланæй 70-80 килограммы уæззаудæртæ дæр уыд. Абоны фæткмæ гæсгæ уымæн гæнæн нал ис, уымæн æмæ уæззау уæзы хæцæг богæлттæн сæ уæз хъуамæ 125 килограммæй фылдæр ма уа. Уымæ гæсгæ сæ февнæлд дæр, æмткæй райсгæйæ, цырддæр хъуамæ уа. Афтæ рауад ацы ерысты дæр. Рæвдз архайдтой гауызыл Голойты Витали, Андиаты Георги, Гæззаты Ацæмæз æмæ Батрадз, Хъодалаты Эдуард, Байцаты Владислав… Кæронбæттæнмæ дзы рацыдысты Байцаты Владислав æмæ Гæззаты Батрадз. Сæ фембæлд рауад тынг хъазуатон. Ацы дыууæ богалы æрæджы дæр ма хæцыдысты æрдæгуæззау уæзы (97 кг) æмæ уæд дæр сæ ныхмæлæуд уыдис цымыдисаг. Ацы хатт дæр та суанг фæстаг секунды онг бæрæг нæ уыд, чи фæуæлахиз уыдзæн, уый. Æппынфæстаг сæ фембæлд ахицæн Байцаты Владиславы пайдайæн 2:1 хыгъдæй, æмæ турниры сæйраг лæвар дæр лæвæрд æрцыд уымæн. Хъодалаты Эдуард æмæ Гæззаты Ацæмæз æрлæууыдысты 3-аг къæпхæныл. Уæззаууæзон богæлттæ сæ хæрзиуджытæ райстой Сосланы къухæй. Турнир куыд ацыд, уый тыххæй йæ хъуыдытæ загъта Андиаты Сослан: «Ахæм турниртæ нæ богæлттæн, æнæмæнг, сты пайдайы хос. Æз стыр бузныг зæгъын нæ республикæйы Хицауадæн, Физкультурæ æмæ спорты министрады кусджытæн, мæнæ ацы спортивон галуаны кусджытæн. Уыдоны æмархайды руаджы та æмбæлгæ уавæртæ арæзт æрцыд ерыстæн. Æхсызгон у, турнирмæ уыйбæрц спортуарзджытæ кæй æрбацыд бакæсынмæ, уый. Уæлдай бузныг мæ зæгъын фæнды Мамиаты Черменæн. Уæдæ æхсызгон куыд нæ уыд, алы рæттæй нæм уыйбæрц уазджытæ кæй æрбацыд, уый дæр». БАСКАТЫ Уырызмæг

ОСТАВЬТЕ ОТВЕТ

Please enter your comment!
Please enter your name here