Фæстаг къухæмдзæгъд…

0
1047

19 ноябры Иры дзыллæ фæстаг фæндараст загътой УФ-йы аивæдты сгуыхт кусæг, РЦИ-Аланийы адæмон артист, Хетæгкаты Къостайы номыл Паддзахадон премийы лауреат, режиссер, актер, «фыццаг ирон Гамлет», «хуыздæр Сталин» — ДЗИУАТЫ Анатолийæн. Зиан ахастой Цæгат Ирыстоны Тæбæхсæуты Балойы номыл паддзахадон академион театры фæзæй. Уырдæм æрбацыдысты Республикæйы Сæргълæууæг БИТАРТЫ Вячеслав, Хицауады уæнгтæ, артисттæ, фысджытæ, республикæйы интеллигенцийы минæвæрттæ, хæстæджытæ, театрдзаутæ, дзыллон-хабархæссæг фæрæзты минæвæрттæ æмæ, Анатолийы ацыдæй йæ зæрдæйы хъыг кæмæн бацыд, уыдон иууылдæр.

Дзиу, афтæ йæ фæлмæнæй хуыдтой сæхи ‘хсæн йæ хæлæрттæ. Кодтой йын аргъ æмæ кад йæ алы ног фæлгонц, йæ алы ног æвæрд спектакль, йæ алы ног къахдзæфæн, куыд аивады, афтæ царды дæр. Анатолийы номарæн митинджы раныхас кодтой РЦИ-Аланийы культурæйы министр Сихъоты Тимур, УФ-йы сгуыхт æмæ РЦИ-Аланийы адæмон артист Бытъæты Роберт, РЦИ-Аланийы адæмон артист Гæлæуты Анатоли. Хиуæтты номæй республикæйы Хицауады минæвæрттæн, æрцæуæг адæмæн бузныг загъта Остъаты Инал. — Анатолимæ уыд иу ахсджиаг миниуæг, — зæгъы Гæлæуты Анатоли, — йæ зæрдæйы цæхæр лæвар кодта удуæлдайæ аивадæн, ирон дзыллæйæн. Нæ ауæрста йæхиуыл нæдæр сценæйы, нæдæр царды. Хуыцауæй йын цы курдиат лæвæрд уыд, уый райхæлд театр æмæ кинойы аивады. Бæргæ, хъысмæт мах куы фæрсид, уæд абон нæ фарсмæ уаиккой нæ дзырддзæугæ лæгтæ Таутиаты Солæман, Тæбæхсæуты Бало, Уататы Бимболат æмæ иннæтæ, Дзиуимæ иумæ сценæйæ рæвдауиккой нæ зæрдæтæ. Анатоли кæмдæриддæр куыста, уым уыд бæрзонд, уымæн æмæ уыд æцæгдзинад æмæ рæстдзинад хæссæг. Аивады та уый у сæйраг миниуæг. Уыцы фарн куыд нæ фесæфа, ахæм амонд Хуыцау кæстæртæн дæр саккаг кæнæд. Митинджы архайджытæй алчидæр хъыгзæрдæйæ æрымысыд Дзиуы-фырты. Бирæтæ сæ уавæртæм гæсгæ, зианы бон Ирыстоны нæ уыдысты, фæлæ алы рæттæй æрæрвыстой хъыджы телеграммæтæ. Уыдис дзы телеграммæтæ алы адæмыхæттыты минæвæрттæй, æндæр республикæтæ æмæ фæсарæнтæй дæр. Хæларзæрдæ, æмгаруарзаг, курдиатджын артист æмæ режиссер, кæстæртæн царды фæндаг дæттæг æмæ сыл аудæг, куырыхон хистæр… Ацы ныхæстæй аргъ кодтой Дзиуаты Анатолийæн йе ‘нусон фæндагыл, ахæмæй баззайдзæн зæрдиагæй цы адæмæн лæггад кодта, уыдоны зæрдæты.

ХЕТÆГКАТЫ-УАНИТЫ Оксанæ

ОСТАВЬТЕ ОТВЕТ

Please enter your comment!
Please enter your name here