Тырыса — адæмы иугæнæг

0
458

Алы адæмæн, алы паддзахадæн дæр ис йæхи национ символтæ. Уыдон сты адæмы сæрыстырдзинады, хæдбардзинады, фарн, бæркад æмæ æндæр нысантæ. Уыдонæй сæйрагдæр у национ тырыса.

Знон Дзæуджыхъæуы Терчы былгæрон, Цæнгæт хидмæ æввахс, æрæмбырд бирæ адæм. Уыдон æрбацыдысты, Аланты тырыса кадджын уавæры тæккæ бæрзонддæр куыд сисдзысты, уымæ. Тырысайы уæрх у фондз метры, йæ дæргъ та — аст метры. Ацы хъуыддаг æрцыд Уастырджимæ кувæн къуыри, стæй нæ номдзыд инæлар Плиты Иссæйы райгуырæн бонмæ. Арфæйаг хъæппæрис равдыстой Дзæуджыхъæуы бынæттон хиуынаффæйады администрацийы сæргълæууæг Æлбегаты Барис æмæ компани «Евродон»-ы генералон директор Уанеты Вадим. Зындгонд артист Бытъæты Роберт хистæры ракуывды загъта: «Уадз, æмæ Ирыстоны тырыса Уæрæсейы тырысаимæ мин-мин азты фæйлауа!» РЦИ-Аланийы Сæргълæууæг Битарты Вячеслав загъта: «Мах баиу кæндзысты патриотизмы æнкъарæнтæ. Уый тыххæй та хъæуынц национ символтæ. Уыцы символтæй иу у национ тырыса — национ хиæмбарынады нысан. Аланты тырыса бæрзонд сисыны хъуыдыимæ мæм æрбацыд Уанеты Вадим æмæ æз йæ фарс рахæцыдтæн». Битарты Вячеслав зæрдиаг арфæ ракодта Вадимæн, æмæ загъта, зæгъгæ, ацы тырысамæ кæсгæйæ, уадз, æмæ алчидæр ахъуыды кæна, чи у æмæ кæцæй у, æвзæра йæм патриотизмы, сæрыстырдзинады æнкъарæнтæ. Аланты тырыса сисыны бар лæвæрд æрцыд Уанеты Вадимæн. Паддзахадон филармонийы зарæггæнджыты хор азарыд Ирыстоны гимн. Хоры разамонæг — Дзанайты Ольгæ.

АБАЙТЫ Эдуард

ОСТАВЬТЕ ОТВЕТ

Please enter your comment!
Please enter your name here