Кафты стыр бæрæгбон

0
591

Знон Цæгат Ирыстоны Хетæгкаты Къостайы номыл паддзахадон университеты Концертон залы уыд кафты аивады стыр бæрæгбон. Къозаты мыггаджы æртæ минæварæн — УФ-адæмон артист, ансамбль «Владикавказские Аланы»-йы аивадон разамонæг КЪОЗАТЫ Зелим, РЦИ-Аланийы сгуыхт артист, ансамбль «Дети гор»-ы аивадон разамонæг КЪОЗАТЫ Станислав æмæ РЦИ-Аланийы сгуыхт артисткæ, ансамбль «Хуры тын»-ы аивадон разамонæг КЪОЗАТЫ Жаннæйы хъомылгæнинæгтæ иу сценæйыл равдыстой зæрдылдарæн концерт.

«Владикавказские Аланы»-йы цы сывæллæттæ кафы, уыдон сты алы адæмыхæттытæй, сæ репертуары дæр æрмæст ирон кæфтытæ нæй, фæлæ алы адæмты национ кæфтытæ дæр. Цыбыр рæстæгмæ къорды къухы бафтыд бирæ æнтыстытæ. Æртæ хатты систы фестиваль «Танец дружбы»йы уæлахиздзаутæ. Ахсджиаг уыд, æппæтуæрæсеон ерыстæ «Зори Кубани», «Чунга-Чанга», «Казачок»-ы гран притæ куы райстой, уый дæр. Сæ фыццаг къахдзæфтæй адæм баууæндыдысты, къордæн кæй ис стыр фидæн. Къозаты Зелим у кафты стыр дæсны. Æртын азы бакуыста РЦИ-Аланийы паддзахадон ансамбль «Алан»ы. Ныр дæр концерт байгом кодтой йæ хъомылгæнинæгтæ кафт «Мах алантæ стæм»-æй.
Ирыстоны иннæ адæмон кæфтыты æнтыстджын къорд у «Дети гор», йæ аивадон разамонæг — Къозаты Станислав. Уыдон дæр се ‘нтыстытæй дæлдæр нæ лæууынц. Æрвылаз, иу гастрольтæ иннæтæй ивгæйæ, фæархайынц фестивальты æмæ æрхæссынц уæлахизтæ. Ансамбль дыууæ азы размæ сбæрæг кодта йе ссæдз азы юбилей.
Концерты архайджытæй иу — иннæмæй хуыздæр. Æлвæст, хæрзконд, сæ къахайст — аив, цæсгомыл — мидбылхудт, се ‘нкъарæнтæ риуы нал цыдысты, æмæ сын сæ аивадæн аргъ скæнынмæ чи æрбацыд, уыдоныл апырх сты. Зын у аивадмæ уарзондзинад бауромын.
Бирæ зæрдæмæдзæугæ кæфтытæ акодтой Къозаты хъомылгæнинæгтæ: «Æрыгæтты кафт», «Хонгæ кафт», «Чызджыты кафт», «Дондзауты кафт», «Убыхаг кафт», «Дагестайнаг кафт», «Цæцæйнаг кафт», «Хохаг кафт» æмæ æндæртæ.
Зын у се ‘ппæты æхсæнæй иугай адæймæгтыл дзурын, уымæн æмæ иууылдæр уыдысты æнтыстджын. Уый уыд хæлардзинады фембæлд. Фæлæ æнæзæгъгæ нæй, ансамбль, «Дети гор»-ы чызджытæ республикæйы тырысайы æртæ хуызмæ гæсгæ урс, сырх æмæ бур разгæмтты зарæг «Мæ Ирыстон»-мæ куы ракафыдысты, уый. Кæддæр Зелим зæххы къорийыл цы «Хъаматимæ кафт»-имæ æрзылд, уый сценæйыл йæ кæстæр фæдон Икъаты Артур куы акодта, уæд æй адæм сæ къухæмдзæгъдæй тынг бабуц кодтой. Йæ уæлæ та уыд Зелимы уæды цъухъа. Адæм æнæбафиппайгæ нæ фесты Тебиаты Хъазыбеджы дæсны кафт. Йæ алы нуары дæр кафты раст цыма ног хъару бацæуы, уыйау арт фесты йæ цахъхъæн кæстæртимæ. Багаты Сослан кафты рæстæг уæлдæфы цы дæсны сæрбихъуырæйттæ кодта, уыдон сæвзæрын кодтой адæммæ бирæ æнкъарæнтæ. «Хуры тын»-ы сывæллæттæ аив акодтой «Гогонтимæ кафт». Иунæг хъазт дæр нæ фидауы æнæ ирон уæздан «Симд»-æй. Кæронбæттæны йæ акодтой ансамбль «Дети гор». Дидинджытæ, къухæмдзæгъд, арфæйы ныхæстæй сбуц кодтой бæрæгбоны архайджыты. Æртæ ансамблы аивадон разамонæгæн дæр республикæйы Парламент æмæ Культурæйы министрад радтой Кады гæххæттытæ. Дзæуджыхъæуы бынæттон хиуынаффæйады администрацийы сæргълæууæджы номæй Гозымты Раман арфæ ракодта Къозаты мыггаджы кафты дæснытæн, Зелим æмæ Жаннæйы схорзæхджын кодта «Хæстон намысы горæты»-ы майдантæй. Къозаты Станиславæн та уыцы хорзæх лæвæрд æрцыд раздæр. «Беслæны мадæлтæ»-йы комитеты сæрдар Дудиаты Сусаннæ сценæйæ арфæ ракодта, нæ царды рæсугъддзинадыл чи фыдæбон кæны, адæмæн сæ аивадæй цин чи хæссы, уыцы къордты разамонджытæн æмæ сын радта Арфæйы гæххæттытæ. Фæлæ, кафты аивады дæснытæ сæхæдæг куыд загътой, афтæмæй сæ сæйрагдæр хæрзиуæг у адæмы уарзондзинад!

ХЕТÆГКАТЫ-УАНИТЫ Оксанæ Авторы ист къамтæ

ОСТАВЬТЕ ОТВЕТ

Please enter your comment!
Please enter your name here