Ныхас республикæйы рæзтыл

0
575

Ацы бонты Цæгат Ирыстонмæ кусæг балцы ссыд Уæрæсейы Федерацийы Хицауады Сæрдары хæдивæг Ольгæ ГОЛОДЕЦ. Уый бабæрæг кодта, нæ республикæйы социалон кусæндæттæ, Цæгат Ирыстоны паддзахадон университет, завод «Победит». Уый фæстæ Хицауады хæдзары дзыллон-хабархæссæг фæрæзты кусджытæн скодта пресс-конференци.

«Æз Цæгат Ирыстонмæ ссыдтæн йæ сæргълæууæг Битарты Вячеславы хуындмæ гæсгæ, — загъта Ольгæ Голодец. — Уый тынг фæнды республикæ Уæрæсейы раззагдæр регионты æхсæнмæ ракæнын. Æмæ йыл архайгæ дæр кæны зæрдиагæй. Мах ныхас кодтам ЦИПУ-йы, ахуырады æмæ æнæниздзинад хъахъхъæнынады рæзтыл. Республикæйы разамындыл æууæндæм æмæ йыл нæ зæрдæ дарæм. Уымæн æмæ йын ныридæгæн йæ куысты хорз фæстиуджытæ нæхæдæг федтам. Зæгъæм, арæзт фæци æмæ байгом тугдадзинты медицинон центр. Куыд æй зонут, афтæмæй йæ арæзтад уыд дæргъвæтин. Цы дохтыртæ дзы кусдзæн, уыдон сты фæлтæрдджын специалисттæ. Кæд амæй размæ æндæр рæтты куыстой, уæддæр ссыдысты Ирыстонмæ, æмæ уый æхсызгон хъуыддаг у. Фæнды сæ республикæйы цæрджыты æнæнизæй æмæ амондджынæй уынын. Уымæн та ам ис æппæт гæнæнтæ æмæ фадæттæ. Уымæй уæлдай ма нæ цæст дарæм, цæмæй нæ бæстæйы медицинон фæдзæхстады фондæй дзæбæхгæнæндæттæм æхца лæвæрд цæуа афоныл. Æмæ адæмæн кæной хæрзхъæд медицинон æххуыс. Уымæн æмæ фæдзæхстадон фондтæ æхца исынц сæ куысты бæрæггæнæнтæм гæсгæ. Медицинон фæдзæхстады компаниты куыстмæ нæ бæстæйы хицауад кæсдзæн бæрнондæрæй.

Цæгат Кавказы Гергиты Валерийы номыл культурон центры тыххæй та зæгъдзынæн уый, æмæ йæ, æнæмæнг, Дзæуджыхъæуы саразын хъæуы. Уымæн æмæ Ирыстон йæ аккаг у. Стыр дисы мæ æфтауы, ацы чысыл республикæйы цас курдиатджын дирижертæ, балеты дæснытæ ис, уый: дунейы номдзыд дирижер Гергиты Валери, Мæскуыйы Стыр театры сæйраг дирижер Сохиты Тугъан, ацы театры сæйраг балетмейстер Уазиты Махар. Культурон центр ам арæзт куы ‘рцæуа, уæд уый фадат ратдзæн ног курдиæтты рæзтæн.

Республикæйы разамындимæ куыд баныхас кодтам, афтæмæй хъуамæ 2017 азы райдайой ацы центры арæзтадон куыстытæ. Æмæ йæ хъуамæ арæзт фæуой дыууæ азмæ. Уый фæрцы та республикæйæн йæ бон аразын уыдзæн, дунеон æмæ æппæтуæрæсеон ахадындзинад кæмæн ис, ахæм фестивальтæ æмæ бæрæгбæттæ. Пресс-конференцийы архайдта РЦИ-Аланийы Сæргълæууæг Битарты Вячеслав. Уый бузныг загъта Уæрæсейы Федерацийы Хицауады Сæрдары хæдивæг Ольгæ Голодецæн, республикæйы рæзтмæ йæ хъус кæй дары æмæ бирæ социалон фарстатæ лыг кæнынмæ республикæйы разамындæн комкоммæ кæй æххуыс кæны, уый тыххæй.

ГАСАНТЫ Валери

ОСТАВЬТЕ ОТВЕТ

Please enter your comment!
Please enter your name here