Уæ спортивон уæлахизтæй стæм сæрыстыр

0
523

Спорты алы хуызты сгуыхтдзинад чи равдыста, бирæ ахæм чызджытæ æмæ лæппутæ ис Ирыстоны. 2016 азы æнтыстдзинæдтæ кæй къухы бафтыд, уыдонæн æмæ сæ тренертæн знон Ирон академион театры арфæ кодтой æппæт республикæйы номæй

Ирон театры егъау залы адæмæй къухбакæнæн нал уыд. Сценæйыл — Алайнаг кулдуар. Райхъуыстысты дзы Уæрæсейы æмæ Ирыстоны Гимнтæ.
«Нæ кæстæртæ де ‘уазæг, дæ фæдзæхст», — бакуывта буц хистæр. Стæй ирон хъайтар кафтæй байгом бæрæгбон. Фæстæдæр экраныл равдыстой чысыл киноныв. Ивгъуыд азы спортивон ерыстæй æхсызгон нывтæ уынгæйæ адæм къухæмдзæгъд кодтой. Бæрæгбоны уыдысты РЦИ-Аланийы Сæргълæууæг Битарты Вячеслав, Хицауады Сæрдар Тускъаты Таймураз, Парламенты Сæрдар Алексей Мачнев, æндæр бæрнон кусджытæ.
— Сымах стут стыр арфæйы аккаг. Уымæн æмæ уæ фыдæбонæй, æрвылбоны тухæнтæй ирон лæджы ном дунейы алы бæстæты рæсугъдæй æвдисут. Бузныг, размæ кæй æххуысæй тырнут, уыцы ахуыргæнджытæн, уæ ныййарджытæн, — загъта Битарты Вячеслав. — Нæ кæстæртæн сымах фæзминаг стут, алы хатт уæ фенынмæ бæллынц æмæ уæ рох ма уæд, уæ кад, уе ‘гъдау дæнцæгæн кæй хæссынц.
Хæрзиуджытæ, уæлахизтæ хорз сты, фæлæ спорты архайджытæй æрмæст удæй фидар, зындзинæдтæн фæразонтæ схизынц уæлдæр къæпхæнтæм, свæййынц чемпионтæ. Мингай адæмтæ та сты спортуарзджытæ æмæ уый дæр рох кæнинаг нæу. Республикæйы разамынд архайы, цæмæй нæм фылдæр уа спортивон фæзтæ, стадионтæ. Уым хъомыл кæнынц суинаг фæсивæд, æнæниз цардыуаг йæ царды бындур кæмæн у, уыдон.
Республикæ Цæгат Ирыстон-Аланийы Сæргълæууæджы уынаффæмæ гæсгæ, къорд адæймагæн радтой хæрзиуджытæ. РЦИ-Аланийы физикон культурæ æмæ спорты архайæджы кадджын ном радтой Аграрон университеты спортивон кафедрæйы хистæр ахуыргæнæг Дзагуырты Беллæйæн æмæ спортивон цæттæдзинады центры хистæр инструктор-методист Датиты Ритæйæн. РЦИ-Аланийы сгуыхт дохтыры ном лæвæрд æрцыд Дзукъаты Альбинæйæн. Уый бирæ азты æнæзæрдæхудтæй кусы уæгъдибар хъæбысхæсты республикон иугонд командæйы дохтырæй. Къорд адæймагæн радтой республикæйы Кады грамотæтæ æмæ арфæйы фыстæджытæ. Уыдонæй сты спорты райрæзтмæ аккаг æвæрæн бахæсджытæ Абайты Чермен, Хуыбаты Константин, Гаситы Альбинæ, Гуыриаты Марат, Таболты Вадим æмæ иннæтæ. Спорты алы хуызты архайгæйæ, ивгъуыд аз æнтыстджын кæмæн рауад, уыцы хæрзаив чызджытæ æмæ лæппутæ иугай хызтысты сценæмæ. Сæ кафт æмæ зардæй сæ сбуц кодтой нæ республикæйы зындгонд æмæ курдиатджын артисттæ дæр.

ГУГКАТЫ Жаннæ

ОСТАВЬТЕ ОТВЕТ

Please enter your comment!
Please enter your name here