«Ирон дæн æз»

0
947

Фæстаг рæстæг ирон æвзаджы рæзтыл, не ‘гъдæуттæ бахъахъхъæныныл бирæ ныхас кæнæм. Сæ райрæзтыл æмæ сæ кæстæртæм рæсугъдæй адæттыныл ныхасæй нæ, фæлæ бæлвырд хъуыддæгтæй чи архайы, уыдонæй сты æхсæнадон республикон змæлд «Иудзинад»-ы уæнгтæ. Куыд Дзæуджыхъæуы, афтæ республикæйы районты фæсивæды ‘хсæн саразынц алыхуызон фембæлдтытæ, ерыстæ æмæ конкурстæ.

Уымæн та хорз æвдисæн уыд, æрæджы Алагиры фæндзæм астæуккаг скъолайы цы конкурс уыд, «Ирон дæн æз», зæгъгæ, уый. Амæй размæ (фарон ноябры) ацы конкурс арæзт æрцыд лæппуты ‘хсæн. Ныр та дзы архайдтой Алагиры астæуккаг скъолаты, скъола-интернаты æмæ Цæгат Кавказы хъæды хæдзарады техникумы ахуырдзаутæ, чызг-фæсивæд. Конкурсы райдайæны æмдзæвгæ «Ирон фæндыр» бакаст Суададжы скъолайы ахуырдзау Фæрниаты Батрадз. Уый фæстæ скъоладзаутæ акодтой «Чызджыты кафт». Æрыгон курдиатджын зарæггæнæг Суанты Алик та азарыд зарæг «Мæ Ирыстон» Скъоладзауты зонындзинæдтæн æмæ арæхстдзинадæн аргъ кодтой жюрийы уæнгтæ республикон æхсæнадон змæлд «Иудзинад»-æй — Байсонгъуырты Мухтар æмæ Фæрниаты Эльбрус, Алагиры районы газет «Сæуæхсид»-ы сæйраг редактор Суанты Дианæ, Дзæуджыхъæуы бынæттон хиуынаффæйады администрацийы ахуырады управленийы специалист Уататы Оксанæ, Алагиры районы депутаты æмбырды сæрдар Цогойты Феликс. Конкурс «Ирон дæн æз»-ы архайджытæ уыдысты æхсæз: Алагиры цыппæрæм скъолайæ — Байсонгъуырты Лаурæ, скъола-интернатæй — Дриаты Дианæ, æртыккæгæм скъолайæ — Дзасохты Миланæ, дыккæгæм скъолайæ — Боциты Данæ, Цæгат Кавказы хъæды хæдзарады техникумы студент Годызты Аринæ æмæ Алагиры фæндзæм скъолайы ахуырдзау Гогаты Мальвинæ. Конкурсы фыццаг хæслæвæрд хъуамæ баххæст кодтаиккой рагагъоммæ, ныффыстаиккой нывæцæн «Ирон дæн æз». Алчидæр сæ уыцы хæслæвæрд хорз сæххæст кодта. Сæ хъуыдытæ уыдысты сыгъдæг ирон æвзагыл аив нывæзт. Дзырдтой ирон æвзаджы, æгъдæутты æмæ культурæйы ахадындзинадыл, уыдон зонын абон куыд ахсджиаг у, ууыл. Ерысы дыккаг хæслæвæрды чызджытæ æвдыстой сæ зонындзинæдтæ ирон бæрæгбæттæ зонынæй. Æртыккаг хæслæвæрд та баст уыд ирон чындзæхсæвы æгъдæуттимæ. Раппæлинаг ма уый у, æмæ-иу фæсивæд кæм рæдыдысты æгъдæуттыл дзургæйæ, уым сын цæстуарзон фиппаинæгтæ бакодтой конкурсы жюрийы уæнгтæ. Цыппæрæм хæслæвæрды та сæ зонындзинæдтæ равдыстой, ирон хæдзары дзаумæттæ æмæ мигæнæнтæ зонынæй æмæ семæ куыд раст архайын хъæуы, цавæр куыстытæ кæнгæйæ-иу сæ пайда кодтой нæ фыдæлтæ, уымæй. Конкурсы фæндзæм хæслæвæрдмæ дæр йæ архайджытæ сæхи рагацау бацæттæ кодтой. Фæсивæд скодтой ирон рагон нуазинæгтæ æмæ хæринæгтæ: дзыкка, дзæрна, нартхоры кæрдзын, æртхурон, бæгæны æмæ къуымæл. Бæлвырд радзырдтой, нæ фыдæлтæ цавæр хойрæгтæ цавæр бæрæгбæттæм кодтой, уый тыххæй. Æхсæзæм хæслæвæрдмæ гæсгæ та чызджыты бахъуыд сæ арæхстдзинад кафынæй, зарынæй, æмдзæвгæтæ аив кæсынæй, сценикон аивады равдисын. Æмæ дзы алчидæр йæхи равдыста арæхстджынæй. Жюрийы хатдзæгтæм гæсгæ, фыццаг бынат бацахста Алагиры фæндзæм скъолайы ахуырдзау Гогаты Мальвинæ (уый архайдзæн республикон конкурсы Алагиры районæй), Алагиры 4-æм скъолайы ахуырдзау Байсонгъуырты Лаурæ та рацыд дыккаг бынатмæ. Конкурсы æртыккаг бынат æрхауд Алагиры дыккæгæм скъолайы ахуырдзау Боциты Данæмæ. Уæлахиздзаутæн æмæ сæ ахуыргæнджытæн лæвæрд æрцыд æхсæнад «Иудзинад»-ы Кады гæххæттытæ æмæ зæрдылдарæн лæвæрттæ. Сæрмагондæй йæхи номæй конкурсы уæлахиздзаутæн лæвæрттæ скодта Алагиры районы депутатты æмбырды сæрдар Цогойты Феликс. Алагиры фæндзæм скъолайы библиотекæйæн æхсæнад «Иудзинад» балæвар кодта — номдзыд фыссæг Джусойты Нафийы уацмысты дæстомон æмбырдгонд. Кæронбæттæны конкурсы архайджытæн зæрдиаг арфæ ракодтой республикон æхсæнад «Иудзинад»-ы уæнгтæ Фæрниаты Эльбрус æмæ Мæрзойты Тамерлан. Конкурс «Ирон дæн æз» цæудзæн иннæ районты дæр. Кæронбæттæн республикон конкурс та арæзт æрцæудзæн мартъийы кæрон. Архайдзысты дзы районты æркасты фыццаг бынæттæ бацахсæг фæсивæд.

ГАСАНТЫ Валери

Къамтæ систа ЦÆГÆРАТЫ Дауыт

ОСТАВЬТЕ ОТВЕТ

Please enter your comment!
Please enter your name here